កូរ៉េខាងជើងកំពុងទាញយកសារធាតុគីមីភ្លុយតូនីញ៉ូម ផលិតអាវុធនុយក្លេអ៊ែរបន្ថែម

កូរ៉េខាងជើងប្រហែលជាកំពុងព្យាយាមទាញយកសារធាតុគីមីភ្លុយតូនីញ៉ូម (Plutonium) ដើម្បីផលិតអាវុធនុយក្លេអ៊ែរបន្ថែមទៀតនៅឯទីតាំងបរមាណូដ៏សំខាន់របស់ខ្លួន ។ នេះបើយោងតាមរូបថតពីផ្កាយរណបថ្មីៗនេះនៅប៉ុន្មានសប្តាហ៍ បន្ទាប់ពីមេដឹកនាំ គីម ជុងអ៊ុន ប្តេជ្ញាពង្រីកឃ្លាំងអាវុធនុយក្លេអ៊ែរ ។

វេបសាយ 38 North ដែលមានឯកទេសក្នុងការសិក្សាលើកូរ៉េខាងជើងបានដកស្រង់រូបភាពដែលបង្ហាញថា រោងចក្រចំហេះដោយធ្យូងថ្មនៅឯទីតាំងនុយក្លេអ៊ែរ Yongbyon របស់កូរ៉េខាងជើងកំពុងដំណើរការ បន្ទាប់ពីផ្អាកអស់រយៈពេល ២ ឆ្នាំ ។ ផ្សែងត្រូវបានគេសង្កេតឃើញចេញពីបំពង់ផ្សែងរបស់រោងចក្រនៅពេលវេលាផ្សេងៗគ្នាចាប់ពីចុងខែកុម្ភៈ និងដើមខែមីនា ។

វេបសាយនេះបាននិយាយកាលពីថ្ងៃពុធថា “នេះបង្ហាញពីការត្រៀមរៀបចំសម្រាប់ការផលិតឡើងវិញនូវឥន្ធនៈ ហើយវាអាចនឹងដំណើរការដើម្បីទាញយកសារធាតុគីមីភ្លុយតូនីញ៉ូម (Plutonium) ដែលត្រូវការសម្រាប់អាវុធនុយក្លេអ៊ែររបស់កូរ៉េខាងជើង ។ វាក៏អាចមានន័យថា កន្លែងនេះត្រូវបានគេរៀបចំដើម្បីដោះស្រាយកាកសំណល់វិទ្យុសកម្មផងដែរ” ។

សារធាតុគីមីភ្លុយតូនីញ៉ូម (Plutonium) គឺជាធាតុផ្សំមួយក្នុងចំណោមធាតុផ្សំសំខាន់ពីរក្នុងការផលិតអាវុធនុយក្លេអ៊ែររួមជាមួយសារធាតុអ៊ុយរ៉ានីញ៉ូមដែលសំបូរទៅដោយថាមពលខ្ពស់ ។ មណ្ឌល Yongbyon ដែលមានទីតាំងនៅភាគខាងជើងនៃរដ្ឋធានីព្យុងយ៉ាងមានកន្លែងសម្រាប់ផលិតធាតុផ្សំទាំងពីរនេះ ។ វាមិនច្បាស់ទេថាតើភ្លុយតូនីញ៉ូម ឬអ៊ុយរ៉ានីញ៉ូមត្រូវបានផលិតនៅឯមណ្ឌល Yongbyon និងកន្លែងផ្សេងទៀតក្នុងប្រទេសកូរ៉េខាងជើងឬក៏យ៉ាងណានោះ ។

ទន្ទឹមនោះការប៉ាន់ស្មានខាងក្រៅរបស់ឃ្លាំងអាវុធនុយក្លេអ៊ែររបស់កូរ៉េខាងជើងគឺខុសគ្នា ។ ក្នុងឆ្នាំ ២០១៨ មន្ត្រីកូរ៉េខាងត្បូងបានប្រាប់សភាថា កូរ៉េខាងជើងអាចមានគ្រាប់បែក ២០ គ្រាប់រហូតដល់ ៦០ គ្រាប់ ។

កាលពីខែមករាលោក គីម បានប្តេជ្ញាពង្រីកឃ្លាំងអាវុធនុយក្លេអ៊ែរ និងបានបង្ហាញប្រព័ន្ធអាវុធបច្ចេកវិទ្យាខ្ពស់ជាច្រើនប្រភេទសំដៅទៅសហរដ្ឋអាមេរិកដោយនិយាយថាជោគវាសនានៃទំនាក់ទំនងទ្វេភាគីពឹងផ្អែកលើថាតើក្រុងវ៉ាស៊ីនតោនដកគោលនយោបាយអរិភាពរបស់ខ្លួនលើកូរ៉េខាងជើងឬក៏យ៉ាងណា ។

អ្នកជំនាញខ្លះនិយាយថា លោក គីម កំពុងព្យាយាមដាក់សម្ពាធលើរដ្ឋាភិបាលរបស់លោកប្រធានាធិបតី ចូ បៃដិន ឲ្យវិលត្រឡប់មករកការទូតវិញ និងបន្ធូរបន្ថយទណ្ឌកម្មលើកូរ៉េខាងជើង ៕

ប្រែសម្រួលដោយ ៖ ជីវ័ន្ត

ប្រភព ៖ CTV

ចុចអាន ៖ កម្មវិធីនុយក្លេអ៊ែររបស់កូរ៉េខាងជើងនៅតែបង្កការព្រួយបារម្ភយ៉ាងខ្លាំងដល់ពិភពលោក

ចុចអាន ៖ អាមេរិកបញ្ជាឲ្យកូរ៉េខាងជើងបង់សំណង ២.៣ ពាន់លានដុល្លារលើការចាប់នាវាស៊ើបការណ៍នៅឆ្នាំ ១៩៦៨