ព័ត៌មានអន្ដរជាតិ

ពូទីន៖ អ៊ុយក្រែន ព្យាយាមវាយប្រហាររោងចក្រនុយក្លេអ៊ែររុស្ស៊ី

បានផុស

២ years មុន

នៅ

ថ្ងៃសុក្រ ២៣ សីហា ២០២៤

ដោយ

ក្នុងកិច្ចប្រជុំគណៈរដ្ឋមន្ត្រីកាលពីថ្ងៃព្រហស្បតិ៍ទី២២ខែសីហាឆ្នាំ២០២៤, ប្រធានាធិបតីរុស្ស៊ីលោក វ្ល៉ាឌីមៀរ ពូទីន និយាយថា កងកម្លាំងអ៊ុយក្រែន ប៉ុនប៉ងវាយប្រហាររោងចក្រនុយក្លេអ៊ែរ Kursk Nuclear Power Plant (NPP) របស់រុស្ស៊ី។

ប្រធានាធិបតីរុស្ស៊ីលោក វ្ល៉ាឌីមៀរ ពូទីន (រូបថត៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីដើមខែនេះ ទីក្រុងកៀវ បានបញ្ជូនទ័ពរាប់ពាន់នាក់ចូលទៅក្នុងតំបន់ Kursk របស់រុស្ស៊ី ដោយព្យាយាមសម្រុកចូលទៅទីប្រជុំជន Kurchatov ដែលមានរោងចក្រនុយក្លេអ៊ែរ ខណៈទីក្រុងមូស្គូប្រកាសចាត់ទុកការលុកលុយនេះជាអំពើភេរវកម្ម ហើយក៏ដាក់ទ័ពបន្ថែម ដើម្បីទប់ទល់ផងដែរ។

លុះមកដល់ថ្ងៃព្រហស្បតិ៍ លោក ពូទីន និយាយថា «កាលពីយប់មិញ ខ្មាំងបានប៉ុនប៉ងវាយប្រហាររោងចក្រថាមពលនុយក្លេអ៊ែរ។ “ទីភ្នាក់ងារថាមពលបរមាណូអន្តរជាតិ [IAEA] ត្រូវបានជូនដំណឹងរួចហើយ ដោយពួកគេសន្យាថានឹងមកមើលផ្ទាល់ ហើយបញ្ជូនអ្នកឯកទេសមកវាយតម្លៃស្ថានភាពថែមទៀត។ ខ្ញុំសង្ឃឹមថា ពួកគេនឹងធ្វើដូច្នេះ»។

រោងចក្រនុយក្លេអ៊ែរ Kursk Nuclear Power Plant (រូបថត៖ Tass)

ស្របពេលជាមួយគ្នានោះដែរ នាយកប្រតិបត្តិក្រុមហ៊ុន Rosatom លោក Alexey Likhachev បានពិភាក្សាអំពីស្ថានភាពទាំងនៅរោងចក្រនេះនិងនៅ Zaporozhye ជាមួយនាយក IAEA លោក Rafael Grossi ហើយថែមទាំងអញ្ជើញគាត់ឲ្យទៅតំបន់ Kursk ដើម្បីវាយតម្លៃស្ថានភាពដោយផ្ទាល់ទៀតផង។

អ្នកនាំពាក្យ IAEA បានប្រាប់ AFP ថា លោក Grossi បានទទួលយកការអញ្ជើញ ហើយគ្រោង ធ្វើទស្សនកិច្ចនៅ Kursk នាសប្តាហ៍ក្រោយ។ បន្ទាប់មក លោកនឹងទៅកាន់ទីក្រុងកៀវ និយាយជាមួយមេដឹកនាំអ៊ុយក្រែន លោក វ្ល៉ាឌីមៀរ ហ្សេលេនស្គី។

ជុំវិញបញ្ហានេះដែរ ទីក្រុងមូស្គូបានរិះគន់ម្តងហើយម្តងទៀតចំពោះទីភ្នាក់ងារអន្តរជាតិ ដែលមិនហ៊ានចង្អុលចំមុខជនល្មើសនៃការវាយប្រហារលើទីតាំងនុយក្លេអ៊ែរ ថ្វីបើបុគ្គលិក IAEA បានដឹងយ៉ាងច្បាស់ទៅហើយថា ជាទង្វើរបស់ទីក្រុងកៀវក៏ដោយ៕

អត្ថបទ៖ សុខ សុវណ្ណ

ចុចអាន៖ រោងចក្រនុយក្លេអ៊ែរធំបំផុតនៅអឺរ៉ុប ត្រូវអគ្គិភ័យឆាបឆេះ