បាញ់មីស៊ីលស្រោចលើអ៊ុយក្រែនថ្ងៃមុន រុស្ស៊ីចាយអស់ ១.៣ពាន់លានដុល្លារអាមេរិក

កាលពីថ្ងៃចន្ទទី២៦ខែសីហាឆ្នាំ២០២៤ រុស្ស៊ី បានបើកការវាយប្រហារទ្រង់ទ្រាយធំទូទាំងប្រទេសអ៊ុយក្រែន ជាមួយមីស៊ីលនិងដ្រូនរាប់រយគ្រឿង ហើយក្រោយគណនាលើតម្លៃសព្វាវុធនីមួយៗ ទស្សនាវដ្តី Forbes Ukraine និង Ekonmichna Pravda បានប៉ាន់ប្រមាណថា រុស្ស៊ី ចាយប្រាក់អស់ប្រហែល១.២ទៅ១.៣ពាន់លានដុល្លារអាមេរិក សម្រាប់ប្រតិបត្តិការនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនោះក៏បណ្តាលឲ្យមានមនុស្សស្លាប់និងបំផ្លាញហេដ្ឋារចនាសម្ព័ន្ធមួយចំនួនផងដែរ ហើយត្បិតតែវាមានទ្រង់ទ្រាយធំក៏ពិតមែន ប៉ុន្តែមិនទាន់ធំដូចខែធ្នូឆ្នាំ២០២៣ទេ ដែលកាលនោះរុស្ស៊ីបានបាញ់មីស៊ីលរហូតដល់ទៅ១៥៨គ្រាប់ ស្រោចលើអ៊ុយក្រែនឯណោះ។

មេបញ្ជាការកងទ័ពអាកាសអ៊ុយក្រែន ឧត្តមសេនីយ៍ឯក Mykola Oleschuk និយាយថា រុស្ស៊ីបានបើកការវាយប្រហារទ្រង់ទ្រាយធំលើអ៊ុយក្រែន ដោយប្រើមីស៊ីលជាច្រើនប្រភេទ បាញ់ពីលើអាកាសផង ដីគោកផង និងចេញពីសមុទ្រផង។

តាមការបញ្ជាក់ពីលោក Oleschuk, រុស្ស៊ីបានប្រើប្រាស់ដ្រូន Shahed ចំនួន១០៩គ្រឿង, មីស៊ីល Kh-101 ៧៧គ្រាប់, មីស៊ីល Kh-22 ៣គ្រាប់, មីស៊ីលបាញ់ពីនាវាមុជទឹកប្រភេទ Kalibr ២៨គ្រាប់, មីស៊ីលបាលីស្ទិក Iskander-M ៦គ្រាប់, មីស៊ីលបាញ់ពីអាកាស Kh-47M2 Kinzhal ៣គ្រាប់និង​មីស៊ីល Kh-59/Kh-69 ចំនួន១០គ្រាប់។

ទោះបីជាយ៉ាងណាក៏ដោយ គេមើលឃើញថា សកម្មភាពរបស់រុស្ស៊ីចុងក្រោយនេះ គឺមានចេតនាបង្ហាញពីភាពខ្លាំងរបស់ខ្លួនក្នុងជម្លោះជាមួយអ៊ុយក្រែន បន្ទាប់ពីកងកម្លាំងរបស់លោក Zelensky​ បើកប្រតិបត្តិការវាយលុកឆ្លងដែនយ៉ាងភ្ញាក់ផ្អើលចូលដីរុស្ស៊ី ហើយថែមទាំងដណ្តើមការគ្រប់គ្រងទីតាំងមួយចំនួនទៀតផង។

ជុំវិញប្រតិបត្តិការរបស់អ៊ុយក្រែននេះដែរ រដ្ឋមន្ត្រីក្រសួងការបរទេសរុស្ស៊ី Sergey Lavrov បានព្រមានខ្លាំងៗថា ប្រសិនបើលោកខាងលិចពិតជាយល់ព្រមសំណើរបស់ទីក្រុងកៀវ អនុញ្ញាតឲ្យបាញ់មីស៊ីលរយៈចម្ងាយឆ្ងាយ Storm Shadow ចូលជ្រៅក្នុងប្រទេសរុស្ស៊ីមែននោះ វាប្រៀបបាននឹងការលេងជាមួយភ្លើងអ៊ីចឹង។

រដ្ឋមន្ត្រីរូបនេះគំរាមថា លោកខាងលិចនឹងបើកផ្លូវដ៏គ្រោះថ្នាក់ ប្រសិនបើបើកដៃឲ្យអ៊ុយក្រែនប្រើប្រាស់អាវុធរបស់ខ្លួន កាន់តែទូលំទូលាយមែន។ នោះប្រៀបបាននឹងការលេងជាមួយភ្លើង ហើយពិតជារឿងដ៏គ្រោះថ្នាក់បំផុត៕

អត្ថបទ៖ សុខ សុវណ្ណ

ចុចអាន៖ រុស្ស៊ី ព្រមានលោកខាងលិច កុំអនុញ្ញាតឲ្យអ៊ុយក្រែន បាញ់មីស៊ីល Storm Shadow ចូលដីខ្លួនឲ្យសោះ