អារ៉ាប់រួម ផ្អាកកិច្ចព្រមព្រៀងទិញយន្តហោះចម្បាំង៨០គ្រឿងពីបារាំង ព្រោះខឹងរឿងចាប់ខ្លួនមេ Telegram 

តាមការចុះផ្សាយរបស់គេហទំព័រ First Post នៅថ្ងៃពុធទី២៨ខែសីហឆ្នាំ២០២៤, ប្រទេសអារ៉ាប់រួម បានផ្អាកកិច្ចព្រមព្រៀងទិញយន្តហោះចម្បាំងចំនួន៨០គ្រឿងពីបារាំងសិន ព្រោះខឹងចិត្តរឿងដែលរដ្ឋាភិបាលទីក្រុងប៉ារីស ចាប់ខ្លួនមេ Telegram លោក Pavel Durov។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍នោះ អារ៉ាប់រួម មិនមែនត្រឹមផ្អាកទិញយន្តហោះចម្បាំងប៉ុណ្ណោះទេ ប៉ុន្តែថែមទាំងពិចារណាលើលទ្ធភាព បញ្ចប់កិច្ចសហប្រតិបត្តិការបច្ចេកទេសយោធាជាមួយប្រទេសបារាំងទាំងស្រុងផងដែរ ជុំវិញការចាប់ខ្លួនលោក Durov នេះ។ មិនត្រឹមប៉ុណ្ណឹង ក្រសួងការបរទេសអារ៉ាប់រួម ថែមទាំងអំពាវនាវឲ្យបារាំង ផ្តល់សិទ្ធិកុងស៊ុលនិងតម្រូវការចាំបាច់ទាំងអស់ដល់លោក Durov ផងដែរ។

ក្រោយការផ្អាកនេះ ក្រុមអ្នកជំនាញបានចោទជាសំណួរថា តើទំនាក់ទំនងបារាំង-អារ៉ាប់រួមនាពេលអនាគត នឹងទៅជាយ៉ាងណា ហើយកិច្ចសហប្រតិបត្តិការលើវិស័យផ្សេងៗ នឹងរងផលប៉ះពាល់ដែរឬក៏អត់?

សូមជម្រាបថា ក្រោយការចាប់ខ្លួនកាលពីថ្ងៃទី២៤ខែសីហា រដ្ឋអាជ្ញាទីក្រុងប៉ារីសលោក Laure Beccuau បានបង្ហាញបញ្ជីនៃការចោទប្រកាន់ ១២ករណីប្រឆាំងនឹងលោក Durov។

ក្នុង១២ករណីនេះ គឺបូករួមទាំងការចោទប្រកាន់ធ្ងន់ធ្ងរមួយចំនួនផងដែរដូចជា ពាក់ព័ន្ធការចែកចាយរូបភាពអាសអាភាសរបស់កុមារ បទល្មើសទាក់ទងនឹងគ្រឿងញៀន ការក្លែងបន្លំ និងលាងលុយកខ្វក់។ លើសពីនេះ លោក Durov ថែមទាំងរងការចោទប្រកាន់ពីបទបដិសេធសហការជាមួយអាជ្ញាធរលើសំណើផ្តល់ទិន្នន័យដោយស្របច្បាប់ និងសមគំនិតចែកចាយឧបករណ៍ឧក្រិដ្ឋកម្មតាមអ៊ីនធឺណិតទៀតផង៕

អត្ថបទ៖ សុខ សុវណ្ណ

ចុចអាន៖ មេ Telegram ប្រឈមការចោទប្រកាន់ ១២ករណីនៅបារាំង