ព័ត៌មានអន្ដរជាតិ

លោក គីម កាត់ទោសប្រហារជីវិតមន្ត្រី៣០នាក់ ព្រោះទឹកជំនន់នៅកូរ៉េខាងជើង

បានផុស

៧ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

Chheang

មេដឹកនាំកូរ៉េខាងជើង លោក គីម ជុងអ៊ុន ប្រហែលជាបានបញ្ជាឲ្យប្រហារជីវិតមន្ត្រីរដ្ឋាភិបាលយ៉ាងហោចណាស់៣០នាក់ បន្ទាប់ពីប្រទេសរបស់លោកបានកើតមានគ្រោះទឹកជំនន់ដ៏ធំមួយ ដែលសម្លាប់មនុស្សអស់រាប់ពាន់នាក់។ នេះបើយោងតាមរបាយការណ៍ថ្មីមួយដោយទូរទស្សន៍ Chosun របស់កូរ៉េខាងត្បូង កាលពីថ្ងៃទី៣ខែកញ្ញា។

សកម្មភាពលោក គីម ជុងអ៊ុន ចុះត្រួតពិនិត្យទឹកជំនន់កាលពីខែកក្កដា (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូរទស្សន៍ Chosun បានរាយការណ៍ថា អាជ្ញាធរកូរ៉េខាងជើងបានកាត់ទោសមនុស្សចន្លោះពី២០ទៅ៣០នាក់កាលពីខែកក្កដាចំពោះការបរាជ័យរបស់ពួកគេក្នុងការបញ្ឈប់គ្រោះទឹកជំនន់ដ៏កាចសាហាវ។ ប្រភពពីមន្ត្រីម្នាក់របស់កូរ៉េខាងជើង បានប្រាប់ Chosun ថា៖ «កម្មាភិបាលពី ២០ ទៅ ៣០នាក់នៅតំបន់រងគ្រោះដោយទឹកជំនន់ ត្រូវបានគេប្រហារជីវិតនៅពេលដូចគ្នាកាលពីចុងខែមុន»។

ដោយឡែកបើយោងតាមទីភ្នាក់ងារព័ត៌មានរដ្ឋ KCNA បុរសខ្លាំងកូរ៉េខាងជើងបានបញ្ជាឲ្យអាជ្ញាធរ «ដាក់ទណ្ឌកម្មយ៉ាងតឹងរ៉ឹង» លើមន្ត្រីរបស់ខ្លួន បន្ទាប់ពីគ្រោះមហន្តរាយទឹកជំនន់វាយប្រហារខេត្ត Chagang ជិតព្រំដែនជាមួយប្រទេសចិន កាលពីខែកក្កដា។

KCNA បានរាយការណ៍ថា ភ្លៀងធ្លាក់ខ្លាំងនៅចុងខែកក្កដាបានធ្វើឲ្យផ្ទះជាង ៤០០០ខ្នង ព្រមទាំងអគារសាធារណៈ រចនាសម្ព័ន្ធផ្លូវ និងផ្លូវដែកបានជន់លិចនៅក្នុងទីក្រុង Sinuiju ភាគពាយ័ព្យ និងនៅក្នុងទីក្រុង Uiju ដែលនៅក្បែរនោះ។

លោក គីម បានស្តីបន្ទោសមន្ត្រីសាធារណៈ ដែលបានធ្វេសប្រហែសក្នុងការទប់ស្កាត់គ្រោះមហន្តរាយចំពោះ «គ្រោះថ្នាក់ដែលមិនអាចអត់ឱនបាន»។

កូរ៉េខាងជើងបានបដិសេធការផ្តល់ជំនួយពីប្រទេសចិន រុស្ស៊ី និងសូម្បីតែកូរ៉េខាងត្បូង ដែលភាពតានតឹងនៅតែមានកម្រិតខ្ពស់ដដែល។

មេដឹកនាំកូរ៉េខាងជើង បានធ្វើដំណើរទស្សនកិច្ចរយៈពេល២ថ្ងៃនៅទីក្រុង Uiju នៅដើមខែសីហា ដើម្បីជួបជនរងគ្រោះដោយសារទឹកជំនន់ និងពិភាក្សាអំពីកិច្ចខិតខំប្រឹងប្រែងស្តារឡើងវិញ។ ខណៈពេលដែលធ្វើដំណើរទៅទីនោះ លោក គីម បានចោទប្រកាន់កូរ៉េខាងត្បូងពីការបំផ្លើសទំហំនៃការខូចខាតដោយសារទឹកជំនន់ ហើយបានចាត់ទុកថាវាជា «យុទ្ធនាការលាបពណ៌» និង «ការបង្កហេតុដ៏ធ្ងន់ធ្ងរ» ប្រឆាំងនឹងរដ្ឋាភិបាលរបស់លោក៕

ដោយ៖ ឈាង

Related Topics:ប្រទេសកូរ៉េខាងជើង