ព័ត៌មានអន្ដរជាតិ

អ្នកការទូតជើងចាស់អ៊ុយក្រែននឹងជំនួសតំណែងរដ្ឋមន្ត្រីការបរទេស Kuleba

បានផុស

៧ ខែ មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

ប្រធានាធិបតីអ៊ុយក្រែន នឹងតែងតាំង លោក Andrii Sybiha ជារដ្ឋមន្ត្រីការបរទេសអ៊ុយក្រែន ក្នុងការរុះរើគណៈរដ្ឋមន្ត្រីដ៏ភ្ញាក់ផ្អើលក្នុងសម័យសង្គ្រាមជាមួយរុស្ស៊ីជាង២ឆ្នាំកន្លះកន្លងមកនេះ។

Andrii Sybiha អនុរដ្ឋមន្ត្រីការបរទេសអ៊ុយក្រែន។ The Ukrinform

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងការផ្សាយរបស់ Daily Maverick នៅថ្ងៃទី៥ខែកញ្ញានេះ ប្រធានាធិបតីអ៊ុយក្រែន លោក Volodymyr Zelensky គ្រោងនឹងតែងតាំងលោក Andrii Sybiha ដែលជាអ្នកការទូតជាន់ខ្ពស់ និងជាអតីតឯកអគ្គរដ្ឋទូតប្រចាំប្រទេសតួកគី ឱ្យក្លាយជារដ្ឋមន្ត្រីការបរទេសជំនួស Dmytro Kuleba វ័យ៤៣ឆ្នាំដែលបានដាក់ពាក្យលាឈប់កាលពីថ្ងៃពុធ។

បច្ចុប្បន្ននេះ លោក Andrii Sybiha វ័យ៤៩ឆ្នាំកាន់តំណែងជាអនុរដ្ឋមន្ត្រីការបរទេស ដែលត្រូវបានតែងតាំងកាលពីខែមេសាឆ្នាំ២០២៤។ លោកក៏ធ្លាប់បម្រើការងារនៅការិយាល័យប្រធានាធិបតីផងដែរ។

លោក David Arakhamia ដែលជាប្រធានគណបក្សនយោបាយរបស់ហ្សេឡេនស្គី បាននិយាយនៅលើបណ្តាញទំនាក់ទំនងសង្គម Telegram បន្ទាប់ពីប្រធានាធិបតីបានជួបជាមួយសមាជិកសភាថា «លោក Sybiha ដែលជាអនុរដ្ឋមន្ត្រី ដែលទំនងជំនួស Dmytro Kuleba»។

ពីរថ្ងៃចុងក្រោយនេះ ព័ត៌មាននៃការលាឈប់និងការបណ្តេញចេញមន្ត្រីសំខាន់ៗក្នុងគណៈរដ្ឋមន្ត្រីប្រទេសអ៊ុយក្រែន បានធ្វើឲ្យមានមន្ទិលជុំវិញជម្លោះផ្ទៃក្នុងដែលនាំទៅដល់ភាពមានប្រៀបរបស់រុស្ស៊ីក្នុងសង្គ្រាមដែលអូសបន្លាយជិតជិត១០០០ថ្ងៃកន្លងមក។

ការដាក់ពាក្យលាឈប់របស់រដ្ឋមន្ត្រីការបរទេសអ៊ុយក្រែន លោក Dmytro Kuleba ដែលធ្លាប់ហែរហមអមដំណើរលោក ហ្សេឡេនស្គី ចាប់តាំងពីឆ្នាំ២០២០ ក្រោយលោកហ្សេឡេនស្គីកាន់អំណាចចាប់ពីឆ្នាំ២០១៩មក។ យោង Al Jazeera

ព័ត៌មាននៃការលាឈប់និងការបណ្តេញចេញនូវមន្ត្រីជាន់ខ្ពស់សំខាន់ៗបានកក្រើកចាប់តាំងពីកាលល្ងាចថ្ងៃអង្គារ ប៉ុន្តែវាហាក់មិនចម្លែកសម្រាប់លោកហ្សេឡេនស្គីដែលប៉ុនប៉ងផ្លាស់ប្តូរនេះជាយូរមកហើយ ព្រមទាំងបាននិយាយថា អ៊ុយក្រែនត្រូវការ «ថាមពលថ្មី និងដែលរួមទាំងវិស័យការទូត»៕

កម្ពុជាថ្មីនឹងលម្អិតប្រវត្តិអ្នកការទូតថ្មីរបស់អ៊ុយក្រែននៅពេលក្រោយ!

ដោយ រ៉ាន់ រើយ