វៀតណាម ស្លាប់មនុស្សកាន់តែច្រើន​ដោយសារ​ព្យុះ​ ​ខណៈ​ភាគ​ខាង​ជើង ប្រឈមបំណាក់ដីធ្ងន់ធ្ងរ

គិតត្រឹមព្រឹកថ្ងៃអង្គារទី១០ខែកញ្ញាឆ្នាំ២០២៤ តួលេខមនុស្សស្លាប់ដោយសារព្យុះទីហ្វុង យ៉ាកជី នៅវៀតណាម បានកើនដល់៦៤នាក់ហើយ ខណៈភាគខាងជើងប្រទេសនេះ កំពុងប្រឈមនឹងគ្រោះមហន្តរាយបាក់ដីធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន VN Express, ក្នុងចំណោមមនុស្សស្លាប់ទាំងអស់ គឺមាន៤៩នាក់ ដែលបាត់បង់ជីវិតដោយសារជំនន់ទឹកភ្លៀង។

ក្រៅពីករណីស្លាប់ ក៏មានមនុស្សចំនួន២២៩នាក់រងរបួសផងដែរ ហើយក្នុងនោះគ្រាន់តែនៅខេត្តក្វាងនិញ មានមនុស្សរងរបួសរហូតដល់១៥៧នាក់ទៅហើយ។

ត្បិតតែព្យុះ យ៉ាកជី កន្លងផុតទៅហើយក៏ដោយ ប៉ុន្តែដោយសារតែចំហាយរបស់វានៅតែបន្តជះឥទ្ធិពលនោះ វៀតណាម បានចេញការព្រមានអំពីហានិភ័យនៃបំណាក់ដីធ្ងន់ធ្ងរនៅខេត្ត១៧ក្នុងចំណោមខេត្តភាគខាងជើងទាំង២៥នាក់។

សូមបញ្ជាក់ជាថ្មី យ៉ាកជី ដែលជាព្យុះដ៏មានឥទ្ធិពលបំផុត បានវាយប្រហារ​ភាគខាងជើងប្រទេសវៀតណាម​តាំង​ពី​​ថ្ងៃសៅរ៍​សប្ដាហ៍​មុនមក។

មិនត្រឹមតែបណ្តាលឲ្យមនុស្សស្លាប់ ព្យុះកំណាចនេះក៏បំផ្លាញផ្ទះជាង ៨ ០១០ខ្នង និងពន្លិចកប៉ាល់ខ្នាតតូចចំនួន២៥គ្រឿងនៅខេត្ត Quang Ninh ផងដែរ ខណៈ Hai Phong, Thai Binh, Hai Duong និង Hanoi នៅតែមិនទាន់មានអគ្គិសនីប្រើប្រាស់។

បើនិយាយពីវិស័យកសិកម្មវិញ ស្រូវជិត ១១០ ០០០ហិកតាត្រូវបានជន់លិច ខណៈដំណាំបន្លែ ​១៧ ៩២០​ហិកតា និង​ដំណាំ​ហូប​ផ្លែ​ ៦ ៩០០​ហិកតា​ត្រូវ​ខូចខាត៕

អត្ថបទ៖ សុខ សុវណ្ណ

ចុចអាន៖ ស្ពានដែលបាក់នៅវៀតណាម ត្រូវបានសាងសង់និងដាក់ឲ្យប្រើប្រាស់ ក្នុងឆ្នាំ ១៩៩៥