ក្បួនរថយន្តដឹកឯកអគ្គរដ្ឋទូតច្រើនប្រទេស បើកកិនមីននៅ ប៉ាគីស្ថាន

តាមការចុះផ្សាយរបស់ RT កាលពីថ្ងៃអាទិត្យទី២២ខែកញ្ញឆ្នាំ២០២៤, ក្បួនរថយន្តដឹកឯកអគ្គរដ្ឋទូតច្រើនប្រទេស បានបើកកិនមីន ក្នុងស្រុក Swat នៃខេត្ត Khyber Pakhtunkhwa នាភាគពាយព្យប្រទេសប៉ាគីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើង ពេលអ្នកការទូតមកពីប្រទេសរុស្ស៊ី វៀតណាម អេត្យូពី រវ៉ាន់ដា ស៊ីមបាវ៉េ ឥណ្ឌូណេស៊ី និងគណប្រតិភូមកពីប្រទេសផ្សេងទៀត កំពុងធ្វើដំណើរក្នុងក្បួន មកពីចូលរួមវេទិកាទេសចរណ៍ដែលរៀបចំដោយសភាពាណិជ្ជកម្មនិងឧស្សាហកម្មនៃទីក្រុងអ៊ីស្លាម៉ាបាដ។

ក្រោយមក ស្ថានទូតរុស្សីចេញសេចក្តីថ្លែងការណ៍ថា ប៉ូលិសម្នាក់ស្លាប់និងច្រើននាក់ត្រូវរបួសក្នុងហេតុការណ៍នេះ ប៉ុន្តែគ្មានបេសកជនណាម្នាក់រងរបួសទេ។

ស្របពេលជាមួយគ្នានោះ អាជ្ញាធរប៉ាគីស្ថានក៏ទទួលស្គាល់ឧបទ្ទវហេតុនេះដែរ ដោយបញ្ជាក់ថា គណៈប្រតិភូទាំងអស់ត្រូវជម្លៀសចេញដោយសុវត្ថិភាពពីកន្លែងកើតហេតុ។

ទោះបីជាយ៉ាងណាក៏ដោយ គ្មានក្រុមណាចេញមុខអះអាងទទួលខុសត្រូវចំពោះការវាយប្រហារដោយបង្កៃមីនតាមផ្លូវដ៏កម្រនេះឡើយប៉ុន្តែគេដឹងថា ស្រុក Swat គឺជាអតីតមូលដ្ឋានឈរជើងយ៉ាងរឹងមាំរបស់ក្រុម Terik-i-Taliban Pakistan ឬ TTP ដែលតែងបើកការវាយប្រហារយ៉ាងសាហាវលើកងកម្លាំងយោធា និងប៉ូលិសនៅក្នុងខេត្ត និងកន្លែងផ្សេងទៀត៕

អត្ថបទ៖ សុខ សុវណ្ណ

ចុចអាន៖ ក្នុងឆ្នាំនេះ អៀរឡង់ ផ្តល់ជំនួយ៨០ម៉ឺនអ៊ឺរ៉ូ សម្រាប់សកម្មភាពកម្ចាត់មីនរបស់អង្គការហេឡូត្រាស្តនៅកម្ពុជា