ជប៉ុន ចាប់ផ្តើមរកឃើញមនុស្សស្លាប់ ដោយសារគ្រោះទឹកជំនន់ធ្ងន់ធ្ងរ នៅភាគកណ្តាល

ប្រទេសជប៉ុនចាប់ផ្តើមចេញរបាយការណ៍អំពីចំនួនមនុស្សស្លាប់ហើយ ដោយសារគ្រោះទឹកជំនន់ដែលវាយប្រហារភាគកណ្តាល យ៉ាងធ្ងន់ធ្ងរ។

តាមការចុះផ្សាយរបស់ NHK នៅថ្ងៃចន្ទទី២៣ខែកញ្ញាឆ្នាំ២០២៤, មនុស្ស៦នាក់ ត្រូវបាត់បង់ជីវិតបន្ទាប់ពីភ្លៀងធ្លាក់ខ្លាំងបង្កជាគ្រោះទឹកជំនន់និងបំណាក់ដីនៅខេត្ត Ishikawa។

នៅទីក្រុង Wajima, ជនរងគ្រោះចំនួន១០នាក់ត្រូវបានរកឃើញនៅក្បែរផ្លូវក្រោមដី ប៉ុន្តែក្នុងនោះមាន២នាក់ត្រូវបាត់បង់ជីវិត។ ចំណែកករណីផ្សេងទៀតនៅទីក្រុងដដែលនេះ ស្រ្តី២នាក់ ត្រូវស្លាប់ក្នុងផ្ទះដោយសារបាក់ដីសង្កត់ ខណៈបុរសម្នាក់លង់ទឹកស្លាប់។ រីឯនៅតំបន់ Suzu ឯណោះ មនុស្សម្នាក់ក៏ត្រូវដីបាក់សង្កត់ស្លាប់ដែរ។

ស្របពេលជាមួយគ្នានោះ បើតាមការបញ្ជាក់ពីអាជ្ញាធរខេត្ត Ishikawa, ក្រៅមនុស្សស្លាប់ ក៏មានមនុស្សច្រើននាក់ទៀតរងរបួសនិងបាត់ខ្លួន ដោយសារគ្រោះធម្មជាតិនេះដែរ។

លើសពីនេះ ​ក្រុមហ៊ុន Hokuriku Electric Power Company បាន​ឲ្យ​ដឹង​ថា នៅ​ថ្ងៃ​ចន្ទ មនុស្ស ៤ ០០០គ្រួសារ មិនមាន​អគ្គិសនី​ប្រើប្រាស់​ឡើយ បន្ទាប់​ពី​ភ្លៀង​ធ្លាក់ខ្លាំង ខណៈតំបន់ជាង ១០០ ត្រូវកាត់ផ្តាច់ដោយសារបំណាក់ដី ពាំងផ្លូវ។

នៅទីក្រុង Wajima, ទឹកភ្លៀងកម្រិតជិត៥០០មិល្លីម៉ែត្រ បានធ្លាក់ចុះចាប់តាំងពីល្ងាចថ្ងៃសុក្រដល់ម៉ោង១០យប់ថ្ងៃអាទិត្យ ខណៈនៅ Suzu ក៏មានភ្លៀងធ្លាក់កម្រិតជិត ៤០០មិល្លីម៉ែត្រដែរ ដែលតួលេខទាំងពីរនេះ គឺលើសបរិមាណទឹកភ្លៀងជាមធ្យមសម្រាប់ខែកញ្ញាដល់ទៅទ្វេដងឯណោះ ហើយក៏ជាតួលេខខ្ពស់បំផុតក្នុងកំណត់ត្រាផងដែរ។

ពេលនេះជប៉ុនបានដកការប្រកាសអាសន្ននៅខេត្ត Ishikawa ហើយ ប៉ុន្តែនៅតែជំរុញឲ្យប្រជាពលរដ្ឋ បន្តប្រុងប្រយ័ត្ន៕

អត្ថបទ៖ សុខ សុវណ្ណ

ចុចអាន៖ ភាគកណ្តាលជប៉ុន ប្រកាសអាសន្ននិងជម្លៀសមនុស្សទ្រង់ទ្រាយធំ ដោយសារទឹកជំនន់