ព័ត៌មានអន្ដរជាតិ

លោក Netanyahu គំរាមវាយលីបង់ ឲ្យខ្ទេចខ្ទីដូចនៅហ្គាហ្សា

បានផុស

២ years មុន

នៅ

ថ្ងៃពុធ ៩ តុលា ២០២៤

ដោយ

Chheang

លោក Benjamin Netanyahu កាលពីថ្ងៃទី៨ខែតុលាបានព្រមានចំៗទៅកាន់ប្រជាជនលីបង់ឲ្យបណ្ដេញក្រុមសកម្មប្រយុទ្ធហេសបូឡាចេញ ជៀសវាងរងការបំផ្លិចបំផ្លាញ និងការឈឺចាប់ដូចអ្វីដែលបានកើតឡើងនៅឯតំបន់ហ្គាហ្សា ខណៈពេលអ៊ីស្រាអែលកំពុងតែបញ្ជូនកងកម្លាំងរាប់ពាន់នាក់បន្ថែមទៀតសម្រាប់ប្រតិបត្តិការវាយប្រហារជើងគោកចូលទៅក្នុងតំបន់ថ្មីនៃភាគនិរតីប្រទេសលីបង់។

លោក Benjamin Netanyahu (រូបភាព៖ រដ្ឋាភិបាលអ៊ីស្រាអែល)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវីដេអូថ្លែងការណ៍ទៅកាន់ពលរដ្ឋលីបង់ នាយករដ្ឋមន្ត្រីអ៊ីស្រាអែល បាននិយាយថា៖ «អ្នកមានឱកាសជួយសង្គ្រោះលីបង់ មុនពេលវាដួលរលំកាន់តែជ្រៅទៅក្នុងសង្គ្រាមដែលរងការបំផ្លិចបំផ្លាញ និងការឈឺចាប់ដូចអ្វីដែលយើងមើលឃើញនៅតំបន់ហ្គាហ្សា។ ខ្ញុំសូមនិយាយប្រាប់អ្នក ពលរដ្ឋនៃលីបង់ ថា រំដោះប្រទេសអ្នកចេញពីក្រុមហេសបូឡា ដូច្នេះសង្គ្រាមនឹងអាចបញ្ចប់»។

ទន្ទឹមនោះ លោក Netanyahu ក៏បានអះអាងថា កងកម្លាំងពិសេស IDF របស់ខ្លួនបានសម្លាប់មេដឹកនាំថ្មីរបស់ក្រុមហេសបូឡា នៅក្នុងការវាយប្រហារតាមដែនអាកាសកាលពីពេលថ្មីៗ។ យ៉ាងណាមិញ កងកម្លាំង IDF ក្រោយមកបានចេញមកប្រកាសថា ខ្លួនមិនទាន់អាចបញ្ជាក់ជាផ្លូវការនូវឡើយទេនូវការស្លាប់របស់លោក Hashem Safieddine ដែលជាអ្នកទើបឡើងស្នងតំណែងថ្មីពីលោក Hassan Narallah។

ក្រុមហេសបូឡា នៅតែរឹងទទឹង បើទោះជាមានការវាយប្រហារយ៉ាងខ្លាំងក្លារបស់អ៊ីស្រាអែលរយៈពេល៣សប្តាហ៍ និងការវាយប្រហារផ្សេងទៀត ដែលមន្ត្រីលីបង់បាននិយាយថាបានសម្លាប់មនុស្សជាង ១៤០០នាក់ និងបានជម្លៀសមនុស្ស ១,២លាននាក់ផ្សេងទៀត។

កាលពីព្រឹកថ្ងៃអង្គារ អតីតអនុប្រធានក្រុមហេសបូឡា លោក Naim Qassem បានទទូចថា ទោះក្រុមហេសបូឡាបានរង «ការវាយប្រហារដ៏ឈឺចាប់» ពីអ៊ីស្រាអែលនាពេលថ្មីៗ សមត្ថភាពរបស់ក្រុមគឺនៅតែដំណើរការល្អធម្មតានោះទេ។

អរិភាពរវាងភាគីទាំង២បានកើនឡើងជាលំដាប់ ចាប់តាំងពីក្រុមហេសបូឡាបានចាប់ផ្តើមបាញ់រ៉ុកកែតទៅកាន់ភាគខាងជើងអ៊ីស្រាអែល ដើម្បីគាំទ្រដល់ប៉ាឡេស្ទីននៅថ្ងៃទី៨ខែតុលាឆ្នាំ២០២៣ មួយថ្ងៃបន្ទាប់ពីការវាយប្រហារដ៏សាហាវរបស់ក្រុមហាម៉ាសដែលជាសម្ព័ន្ធមិត្តរបស់ខ្លួនទៅលើភាគខាងត្បូងអ៊ីស្រាអែល៕

ដោយ៖ ឈាង