ព័ត៌មានអន្ដរជាតិ

គ្រាន់តែងាកមើលលោក គីម ជុងអ៊ុន បំពេញទស្សនកិច្ច ទាហានកូរ៉េខាងជើងជាច្រើននាក់ត្រូវចាប់ខ្លួន

បានផុស

២ years មុន

នៅ

ថ្ងៃពុធ ៩ តុលា ២០២៤

ដោយ

យោងតាមកាសែត Daily NK បានឲ្យដឹងនៅថ្ងៃទី៩ខែតុលានេះថា ទាហានរាប់សិបនាក់ដែលចូលរួមក្នុងសមយុទ្ធយោធាអំឡុងដំណើរទស្សនកិច្ចរបស់លោក គីម ជុងអ៊ុន ទៅមូលដ្ឋានកងកម្លាំងពិសេសមួយកាលពីខែមុនត្រូវបានចាប់ខ្លួន ដោយគ្រាន់តែក្រឡេកមើលមេដឹកនាំនេះ។

យោងតាមប្រភពមួយនៅក្នុងទីក្រុងព្យុងយ៉ាង បាននិយាយនាពេលថ្មីៗនេះថា ទាហានប្រហែល២០នាក់ដែលបានចូលរួមក្នុងសមយុទ្ធ ត្រូវបានចាប់ខ្លួននៅថ្ងៃទី១៣ខែកញ្ញាកន្លងទៅ ហើយត្រូវបាននាំយកទៅកាន់ការិយាល័យសន្តិសុខរបស់កងទ័ព។

បញ្ហាចម្បងដែលបណ្ដាលឲ្យមានការចាប់ខ្លួនគឺការរំលោភលើពិធីសារសុវត្ថិភាពផ្ទាល់ខ្លួនរបស់មេដឹកនាំ គីម ជុងអ៊ុន។ ប្រភពបាននិយាយថា ក្រុមសន្តិសុខរបស់លោក គីម មានអារម្មណ៍ថា ទាហានខ្វះការផ្តោតអារម្មណ៍ ហើយហាក់មានភាពច្របូកច្របល់ក្នុងអំឡុងពេលសមយុទ្ធបាញ់ប្រហារ ដែលអាចបង្កគ្រោះថ្នាក់ដល់អាយុជីវិតមេដឹកនាំ។ ក្នុងនោះរួមមានការក្រឡេកមើលទៅមេដឹកនាំកំពូលក្នុងអំឡុងពេលសមយុទ្ធបាញ់គ្រាប់ពិតដែលវាអាចនាំឱ្យមានគ្រោះថ្នាក់។

ប្រភពបានពន្យល់ថា បុគ្គលិកសន្តិសុខរបស់លោក គីម បានរិះគន់ទាហានយ៉ាងខ្លាំងចំពោះអាកប្បកិរិយាមិនសមរម្យបែបនេះ។ ប្រភពបានបន្ថែមថា៖«វាជាបញ្ហាចម្បងដែលពួកគេមិនសប្បាយចិត្ត នៅពេលក្រុមសន្តិសុខរបស់លោក គីម ជាពិសេសចាប់តាំងពីពួកគេបានដឹងអំពីដំណើរទស្សនកិច្ចនេះ និងបានធ្វើការហាត់សម» ខណៈដែលបញ្ហានេះនាំឱ្យមានការចោទប្រកាន់អំពីអាកប្បកិរិយាមិនស្មោះត្រង់ក្នុងអំឡុងពេលសមយុទ្ធ។

ជាមួយគ្នានេះក្រុមសន្តិសុខបានកត់សម្គាល់ពីទង្វើដ៏គ្រោះថ្នាក់របស់ទាហានក្នុងអំឡុងហាត់សម ដោយបានបន្ទោសលើការខ្វះការត្រៀមលក្ខណៈផ្លូវចិត្តរបសកងកម្លាំងពិសេស និងមិនសូវការយល់ដឹងពីបទបញ្ជាប្រតិបត្តិការ។

ប្រភពនោះបាននិយាយថា៖«ឧប្បត្តិហេតុទាក់ទងនឹងការព្រួយបារម្ភរបស់លោក គីម បន្ទាប់ពីការត្រួតពិនិត្យ»។

លោក គីម បានត្អូញត្អែរអំពីអាកប្បកិរិយាមិនល្អរបស់ទាហាន ដោយបន្ទោសមេបញ្ជាការទាំងស្រុង និងធ្វើឲ្យស្ថានការណ៍កាន់តែអាក្រក់។ មេបញ្ជាការនៃអង្គភាព និងអ្នកពាក់ព័ន្ធទំនងជាប្រឈមមុខនឹងការផ្តន្ទាទោសយ៉ាងធ្ងន់ធ្ងរ ដោយសារតែអាជ្ញាធរមានកំហុសបែបនេះ ក្នុងអំឡុងពេលទស្សនកិច្ចរបស់មេដឹកនាំកំពូល។

គួរបញ្ជាក់ថា ចាប់តាំងពីពេលនោះមក ការិយាល័យសន្តិសុខរបស់កងទ័ពបានចេញសេចក្តីជូនដំណឹងដោយសង្កត់ធ្ងន់លើការអនុលោមតាមច្បាប់សុវត្ថិភាពរបស់លោក គីម ជុងអ៊ុន យ៉ាងតឹងរ៉ឹងដោយអំពាវនាវឱ្យមានការហ្វឹកហ្វឺនយ៉ាងយកចិត្តទុកដាក់ ការអប់រំមនោគមវិជ្ជា និងវិន័យខ្លាំងជាងមុន ដើម្បីទប់ស្កាត់ឧប្បត្តិហេតុស្រដៀងគ្នានេះនៅក្នុងព្រឹត្តិការណ៍នាពេលអនាគតដែលចូលរួមដោយលោកគីម ជុងអ៊ុន៕

អត្ថបទ៖ ប៊ុន សុភាព