ព័ត៌មានអន្ដរជាតិ

ការសិក្សា៖ ចំនួនសត្វព្រៃធ្លាក់ចុះ ៧៣ ភាគរយក្នុងរយៈពេល៥០ឆ្នាំចុងក្រោយ

បានផុស

៩ ខែ មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

អង្គការមូលនិធិសត្វព្រៃពិភពលោក (WWF) បានហៅសកម្មភាពរបស់មនុស្សដែលកំពុងប្រព្រឹត្តនាំឲ្យមានមហន្តរាយបាត់បង់ប្រភេទសត្វព្រៃដ៏គួរឲ្យព្រួយបារម្ភ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១០ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាត់បង់នេះរួមមានតាំងពីសត្វដំរីនៅក្នុងព្រៃត្រូពិច រហូតដល់អណ្តើក hawksbill កំពុងធ្លាក់ចុះយ៉ាងខ្លាំង។ នេះបើយោងតាមការសិក្សាសត្វព្រៃរបស់ពិភពលោក។ របាយការណ៍ របស់ Living Planet ដែលជាទិដ្ឋភាពទូទៅនៃស្ថានភាពនៃពិភពធម្មជាតិ បង្ហាញថា ចំនួនសត្វព្រៃទូទាំងពិភពលោក បានធ្លាក់ចុះជាមធ្យម ៧៣ភាគរយក្នុងរយៈពេល ៥០ឆ្នាំកន្លងមកនេះ។

ប្រធានអង្គការ WWF ចក្រភពអង់គ្លេស លោក Tanya Steele បាននិយាយថា ការបាត់បង់ទីធ្លាព្រៃគឺធ្វើឱ្យប្រព័ន្ធអេកូឡូស៊ីជាច្រើនដែលជាទីជម្រកសត្វចាប់ពី Amazon ដល់ថ្មប៉ប្រះទឹកគឺស្ថិតនៅចំណុចដ៏គ្រោះថ្នាក់បំផុត។ ក្នុងចំណោមរូបថតជាច្រើននៃការបាត់បង់សត្វព្រៃដែលបណ្ដាលមកពីមនុស្ស វាបង្ហាញឱ្យឃើញ៦០ភាគរយនៃសត្វផ្សោតទន្លេអាម៉ាហ្សូនពណ៌ផ្កាឈូករបស់ពិភពលោកត្រូវបានបាត់បង់ដោយការបំពុល និងការគំរាមកំហែងផ្សេងទៀត រួមទាំងការជីកយករ៉ែ និងចលាចលស៊ីវិល។

លោក Tom Oliver សាស្ត្រាចារ្យផ្នែកបរិស្ថានវិទ្យានៅសាកលវិទ្យាល័យ Reading ដែលមិនមានទំនាក់ទំនងជាមួយរបាយការណ៍នោះ បាននិយាយថា នៅពេលដែលព័ត៌មាននេះត្រូវបានផ្សំជាមួយសំណុំទិន្នន័យផ្សេងទៀត សត្វល្អិតមានការថយចុះនិងគួរឱ្យព្រួយបារម្ភនៃការដួលរលំនៃជីវចម្រុះពិភពលោក។

សត្វអណ្តើក Hawksbill កំពុងធ្លាក់ចុះ ដោយសំបុកសត្វអណ្ដើកញីនៅភាគឦសាននៃរដ្ឋ Queensland ប្រទេសអូស្ត្រាលី ធ្លាក់ចុះ៥៧ភាគរយក្នុងរយៈពេល ២៨ឆ្នាំ។ របាយការណ៍នេះក៏បានវាស់ស្ទង់ការធ្លាក់ចុះនៃប្រភេទសត្វស្លាបដូចជា chinstrap penguins នៅអង់តាក់ទិកផងដែរ។

របាយការណ៍បានរកឃើញថា ការរិចរិល និងការបាត់បង់ទីជម្រកគឺជាការគំរាមកំហែងដ៏ធំបំផុតចំពោះសត្វព្រៃ បន្ទាប់មកដោយការកេងប្រវ័ញ្ចហួសប្រមាណ ពីប្រភេទសត្វដែលរាតត្បាត ជំងឺ ការប្រែប្រួលអាកាសធាតុ និងការបំពុល។ ជាមួយគ្នានេះអ្នកដឹកនាំអ្នកនិពន្ធ និងជាប្រធានទីប្រឹក្សាវិទ្យាសាស្ត្រ WWF លោក Mike Barrett បាននិយាយតាមរយៈសកម្មភាពរបស់មនុស្សថា «ជាពិសេសវិធីដែលយើងផលិត និងប្រើប្រាស់អាហាររបស់យើង កំពុងនាំឲ្យបាត់បង់ជម្រកធម្មជាតិកាន់តែខ្លាំងឡើង»។

របាយការណ៍នេះក៏ព្រមានផងដែរ ការបាត់បង់ធម្មជាតិ និងការប្រែប្រួលអាកាសធាតុកំពុងជំរុញពិភពលោកយ៉ាងលឿនឆ្ពោះទៅរកស្ថានភាពអាក្រក់ដែលមិនអាចត្រឡប់វិញបាន រួមទាំងសក្តានុពលនៃការបាត់បង់ព្រៃអាម៉ាហ្សូន ដែលវាមិនអាចកាត់បន្ថយកាបូនដែលបង្កើនកំដៅភពផែនដី និងកាត់បន្ថយផលប៉ះពាល់នៃការប្រែប្រួលអាកាសធាតុបានទៀតទេ ។

បញ្ហានេះបាននាំឲ្យមានការអំពាវនាវឱ្យមានការប្រកាសអាសន្នសម្រាប់សត្វព្រៃរបស់ភពផែនដីកើតឡើង ខណៈមេដឹកនាំពិភពលោករៀបចំប្រមូលផ្តុំសម្រាប់សន្និសីទស្តីពីជីវចម្រុះរបស់អង្គការសហប្រជាជាតិក្នុងប្រទេសកូឡុំប៊ី ដើម្បីពិភាក្សាអំពីវិធីស្តារធម្មជាតិ។

ក្នុងនោះប្រទេសជិត២០០បានប្តេជ្ញាចិត្តចំពោះកិច្ចព្រមព្រៀងដ៏សំខាន់របស់អង្គការសហប្រជាជាតិឆ្នាំ២០២២ ដើម្បីដោះស្រាយការបាត់បង់ធម្មជាតិ រួមទាំងការទុកចោល៣០នៃភពផែនដីសម្រាប់ធម្មជាតិនៅឆ្នាំ២០៣០។ លើសពីនេះចក្រភពអង់គ្លេសបានចុះហត្ថលេខាលើការសន្យានេះ ដោយរដ្ឋមន្ត្រីការបរទេសបានប្រកាសអំពីបញ្ហាអាកាសធាតុ ហើយការធ្លាក់ចុះនៃធម្មជាតិនឹងក្លាយជា គោលដៅចម្បងចំពោះគោលនយោបាយរបស់រដ្ឋាភិបាល៕