ព័ត៌មានអន្ដរជាតិ

លោក Netanyahu ឆ្លើយតបនឹងមេដឹកនាំបារាំងដែលថា អ៊ីស្រាអែលកើតចេញពី UN

បានផុស

៦ ខែ មុន

នៅ

ថ្ងៃពុធ ១៦ តុលា ២០២៤

ដោយ

Chheang

លោក Benjamin Netanyahu បានចេញសេចក្ដីថ្លែងការណ៍មួយ ដើម្បីជាការប្រឆាំងនឹងប្រធានាធិបតីបារាំង លោក Emmanuel Macron ដែលបានលើកឡើងកាលពីថ្ងៃទី១៥ខែតុលាថា អ៊ីស្រាអែលត្រូវបានបង្កើតឡើងដោយអង្គការសហប្រជាជាតិ។

លោក Benjamin Netanyahu និងលោក Emmanuel Macron (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីថ្លែងការណ៍របស់នាយករដ្ឋមន្ត្រីអ៊ីស្រាអែល បានរៀបរាប់ថា៖ «សាររំឭកដល់ប្រធានាធិបតីបារាំង៖ អ៊ីស្រាអែលមិនត្រូវបានបង្កើតឡើងដោយសេចក្ដីសម្រេចរបស់អង្គការសហប្រជាជាតិទេ ប៉ុន្តែតាមរយៈជ័យជម្នះដែលទទួលបានក្នុងសង្គ្រាមទាមទារឯករាជ្យ លះបង់ដោយឈាមរបស់វីរជនប្រយុទ្ធដ៏អង់អាច ដែលភាគច្រើនជាអ្នករស់រានមានជីវិតពីការសម្លាប់រង្គាលក្នុងរបប Holocaust រួមទាំងពីរបប Vichy នៅប្រទេសបារាំងផងដែរ»។

សេចក្ដីថ្លែងការណ៍ដដែល បានបន្តទៀតថា៖ «វាគួរឲ្យកត់សម្គាល់ផងដែរថា ក្នុងប៉ុន្មានទសវត្សរ៍ថ្មីៗនេះ អង្គការសហប្រជាជាតិបានអនុម័តសេចក្ដីសម្រេចប្រឆាំងអ៊ីស្រាអែលរាប់រយដង ដែលមានបំណងបំផ្លាញភាពស្របច្បាប់នៃរដ្ឋជ្វីហ្វតែមួយគត់របស់ពិភពលោក និងសិទ្ធិដើម្បីការពារខ្លួន»។

ទន្ទឹមនោះ លោក Netanyahu ក៏បានប្រាប់ទៅកាន់មេដឹកនាំបារាំងផងដែរថា ប្រទេសអ៊ីស្រាអែលបដិសេធមិនអនុវត្តនូវបទឈប់បាញ់ឯកតោភាគីនៅក្នុងប្រទេសលីបង់នោះឡើយ។ លោកបានសង្កត់ធ្ងន់ថា សកម្មភាពរបស់អ៊ីស្រាអែល មានគោលបំណងកម្ចាត់ការគំរាមកំហែងពីក្រុមសកម្មប្រយុទ្ធហេសបូឡា និងធានាបាននូវសុវត្ថិភាពសម្រាប់ប្រជាជននៅភាគខាងជើងរបស់ខ្លួន។

គួររំឭកថា នៅក្នុងកិច្ចប្រជុំគណរដ្ឋមន្ត្រីបារាំងកាលពីថ្ងៃអង្គារ លោក Macron បានផ្ដាំលោក Netanyahu កុំឲ្យភ្លេចពីដើមកំណើតរបស់អ៊ីស្រាអែល ដែលត្រូវបានបង្កើតឡើងដោយអង្គការសហប្រជាជាតិ ដោយសំដៅលើសេចក្ដីអនុម័តក្នុងខែវិច្ឆិកាឆ្នាំ១៩៤៧ របស់មហាសន្និបាតអង្គការសហប្រជាជាតិស្តីពីផែនការបែងចែកប៉ាឡេស្ទីនទៅជារដ្ឋជ្វីហ្វ និងរដ្ឋអារ៉ាប់។

ភាពតានតឹង បានកើនឡើងរវាងលោក Netanyahu និងលោក Macron ដោយមេដឹកនាំបារាំងកាលពីសប្តាហ៍មុនបានទទូចឲ្យបញ្ឈប់ការបញ្ជូនសព្វាវុធឲ្យទៅអ៊ីស្រាអែលប្រើប្រាស់នៅក្នុងតំបន់ហ្គាហ្សា និងប្រទេសលីបង់ ហើយបញ្ជាក់ថា វាគឺជាវិធីតែមួយគត់ដើម្បីបញ្ចប់ជម្លោះ៕

ដោយ៖ ឈាង

ចុចអាន៖ បារាំង ប្រាប់អ៊ីស្រាអែលថា កុំភ្លេចកំណើតដែលកើតចេញពី UN