ប៉ូលិសជប៉ុន ចាប់ខ្លួនជនជាតិថៃមួយក្រុម ដែលលួចខ្សែភ្លើងពីរោងចក្រ  

តាមការចុះផ្សាយរបស់ NHK នៅថ្ងៃសុក្រទី១៨ខែតុលាឆ្នាំ២០២៤, ប៉ូលិសក្រុងតូក្យូ បានចាប់ខ្លួនជនជាតិថៃមួយក្រុម ដែលលួចខ្សែភ្លើងពីរោងចក្រផលិតថាមពលពន្លឺព្រះអាទិត្យមួយកន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសនិយាយថា ជនជាតិថៃចំនួន៤នាក់នេះ ត្រូវចោទប្រកាន់ពាក់ព័ន្ធការលួចខ្សែភ្លើងប្រវែង៨៤០ម៉ែត្រមានតម្លៃប្រហែល១.៩លានយ៉េនឬ១២ ៩០០ដុល្លារពីរោងចក្រក្នុងទីក្រុង Hinode។

ប៉ូលិសបញ្ជាក់ថា ពួកគេមិនមែនទើបធ្វើសកម្មភាពម្តងទេ ហើយក៏មានបណ្តាញច្រើនដែរ។ ក្រោយការតាមដាននិងកំណត់មុខសញ្ញា ប៉ូលិសក៏ឈានដល់ការចាប់ខ្លួនពួកគេតែម្តង។

ក្នុងចំណោមអ្នកទាំង៤ មានមេក្រុមម្នាក់ដែលជាអ្នកមើល App ផែនទី ហើយបញ្ជាឲ្យកូនក្រុមធ្វើសកម្មភាពកាត់ខ្សែភ្លើងយកទៅលក់ ហើយពេលលួចបានម្តង មេក្រុមនោះទទួលបានលុយប្រហែល ១០០ ០០០យ៉េន ឬ៦៧០ដុល្លារ ហើយលុយនៅសល់ ត្រូវចែកឲ្យអ្នកធ្វើសកម្មភាពស្មើៗគ្នា។

ប្រភពរបស់ NHK បញ្ជាក់ថា លុយដែលពួកគេបានពីលក់ខ្សែភ្លើង គឺយកទៅចាយវាយនៅជប៉ុន ឬ​បញ្ជូន​ខ្លះទៅ​ស្រុក​កំណើត​របស់​ពួកគេ៕

អត្ថបទ៖ សុខ សុវណ្ណ