ព្យុះមួយទៀត កំពុងហោះសំដៅទៅវាយប្រហារប្រទេស វៀតណាម

តាមសេចក្តីរាយការណ៍របស់ VN Express កាលពីថ្ងៃអង្គារទី២២ខែតុលាឆ្នាំ២០២៤ ព្យុះមួយទៀតឈ្មោះ ត្រាមី «Trami»​ កំពុងបោះពួយសំដៅទៅវាយប្រហារភាគកណ្តាលប្រទេសវៀតណាម ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមថ្ងៃពុធ ព្យុះនេះកំពុងស្ថិតក្នុងសមុទ្រ ភាគខាងកើតប្រទេសហ្វីលីពីននៅឡើយ ដោយ មានកម្លាំងខ្យល់៧៤គីឡូម៉ែត្រក្នុងមួយម៉ោង។

យ៉ាងណា បើយោងតាមទីភ្នាក់ងារឧតុនិយមជប៉ុន, ព្យុះនេះនឹងហោះចូលសមុទ្រចិនខាងត្បូងសិន ដោយនៅទីនោះវានឹងបង្កើនឥទ្ធិពលខ្លាំងជាងមុនពោលគឺមានកម្លាំងខ្យល់រហូតដល់១០៨គីឡូម៉ែត្រក្នុងមួយម៉ោង រួចនឹងរំកិលខ្លួនសំដៅទៅប្រទេសវៀតណាម ក្នុងរយៈពេល២៤ម៉ោងបន្ទាប់។ 

ជាការត្រៀមលក្ខណៈ ក្រសួងកសិកម្មនិងអភិវឌ្ឍន៍ជនបទវៀតណាម បានចេញសេចក្តីប្រកាសមួយ ស្នើឲ្យបណ្តាខេត្តជាប់មាត់សមុទ្រ ចាប់ពី ក្វាងនិញ ដល់ ប៊ិញឌិញ ត្រូវតាមដានការវិវត្តរបស់ព្យុះ ត្រាមី ឲ្យបានដិតដល់ជាទីបំផុត ខណៈអាជ្ញាធរក៏ដាក់ពង្រាយ​កម្លាំង​ចុះ​ពិនិត្យ​តំបន់​ដែល​មាន​ហានិភ័យ​ខ្ពស់​នៃ​ការ​បាក់​ដី និង​ទឹកជំនន់​ភ្លាមៗ រួចហើយដែរ។

សូមបញ្ជាក់ថា ចាប់តាំងពីដើមឆ្នាំនេះមក សមុទ្រចិនខាងត្បូងកើតមានព្យុះចំនួន៥ហើយ ក្នុងនោះរួមមានទាំងព្យុះ យ៉ាកជី ដ៏មានឥទ្ធិពល ដែលបណ្តាលឲ្យមនុស្ស ៣៤៤នាក់ស្លាប់និងខាតបង់ផ្នែកសេដ្ឋកិច្ចជាង៨១ ០០០ពាន់លានដុងផងដែរ។

មិនត្រឹមប៉ុណ្ណឹង វិទ្យាស្ថានឧតុនិយម ជលសាស្ត្រ និងបម្រែបម្រួលអាកាសធាតុ ព្យាករថា មុនដាច់ឆ្នាំ២០២៤ សមុទ្រចិនខាងត្បូងនឹងមានព្យុះពី ៤ទៅ៥ ខណៈក្នុងនោះមានព្យុះ ២ទៅ៣ ដែលនឹងវាយប្រហារដីគោកវៀតណាម៕

អត្ថបទ៖ សុខ សុវណ្ណ

ចុចអាន៖ អ្នកជំនាញព្រមានឲ្យវៀតណាម ត្រៀមខ្លួនទទួលកំពូលព្យុះទីហ្វុង ខែក្រោយ