ព័ត៌មានអន្ដរជាតិ

UN ព្រមានរលកថ្មីនៃការសម្លាប់រង្គាលនៅប្រទេសស៊ូដង់

បានផុស

២ years មុន

នៅ

ថ្ងៃចន្ទ ២៨ តុលា ២០២៤

ដោយ

មន្ត្រីជាន់ខ្ពស់អង្គការសហប្រជាជាតិក្នុងប្រទេសស៊ូដង់មានការព្រួយបារម្មណ៍យ៉ាងខ្លាំងចំពោះរបាយការណ៍នៃឧក្រិដ្ឋកម្មដ៏ឃោរឃៅនៅក្នុងរដ្ឋ Gezira រួមទាំងការសម្លាប់ជនស៊ីវិលយ៉ាងច្រើនដោយកងកម្លាំងគាំទ្ររហ័ស (RSF)។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី២៨ខែតុលានេះ។

មន្ត្រីជាន់ខ្ពស់អង្គការសហប្រជាជាតិប្រចាំប្រទេសស៊ូដង់ បានឲ្យដឹងថា យ៉ាងហោចណាស់មនុស្ស១២៤នាក់ត្រូវបានសម្លាប់ដោយ RSF នៅក្នុងការវាយប្រហារលើភូមិនានាកាលពីសប្តាហ៍មុន។

ទោះបី RSF បានបដិសេធការកំណត់គោលដៅជនស៊ីវិល ប៉ុន្តែជម្លោះរយៈពេល១៨ខែនៅក្នុងប្រទេសស៊ូដង់បានសម្លាប់មនុស្សរាប់ម៉ឺននាក់និងជាង១១លាននាក់ផ្លាស់ទីលំនៅ។ រដ្ឋ Gezira បានប្រែក្លាយទៅជាសមរភូមិដ៏សំខាន់មួយកាលពីសប្តាហ៍មុន បន្ទាប់ពី RSF បានរងការវាយប្រហារយ៉ាងធ្ងន់ធ្ងរ លើមេបញ្ជាការម្នាក់របស់ខ្លួនគឺលោក Abu Aqla Kayka ដែលបានរត់ចោលជួរទៅជាមួយកងកម្លាំងយោធា ដែលជាការរត់ចោលជួរដ៏ធំជាលើកដំបូង។

លោកស្រី Nkweta-Salami អ្នកសម្របសម្រួលអង្គការសហប្រជាជាតិ និងមនុស្សធម៌នៅស៊ូដង់ បាននិយាយថា របាយការណ៍បឋមបានបង្ហាញថា RSF បានធ្វើការវាយប្រហារដ៏ធំមួយនៅទូទាំងរដ្ឋរវាងថ្ងៃទី២០ និង២៥ខែតុលា។

វានាំឱ្យមានការសម្លាប់រង្គាល ការរំលោភលើស្ត្រី និងកុមារី ការលួចយកទីផ្សារ និងផ្ទះ និងការដុតបំផ្លាញកសិដ្ឋាន ហើយទាំងនេះគឺជា «ឧក្រិដ្ឋកម្មដ៏ឃោរឃៅ» មានទំហំស្រដៀងគ្នាទៅនឹងអ្វីដែលបានឃើញនៅក្នុងតំបន់ Darfur កាលពីឆ្នាំមុន។

នៅក្នុងសេចក្តីថ្លែងការណ៍មួយកាលពីថ្ងៃសៅរ៍ គណៈកម្មាធិការតស៊ូ Wad Madani ដែលធ្វើយុទ្ធនាការសម្រាប់ការបញ្ចប់ជម្លោះ និងការគ្រប់គ្រងលទ្ធិប្រជាធិបតេយ្យនៅក្នុងប្រទេសស៊ូដង់ បាននិយាយថា RSF កំពុងប្រព្រឹត្ត «ការសម្លាប់រង្គាលយ៉ាងទូលំទូលាយ»។

លើសពីនេះសហជីពរបស់វេជ្ជបណ្ឌិតស៊ូដង់បានអំពាវនាវឱ្យអង្គការសហប្រជាជាតិជំរុញភាគីទាំងពីរនៅក្នុងជម្លោះឱ្យយល់ព្រមលើច្រករបៀងមនុស្សធម៌ដែលមានសុវត្ថិភាពចូលទៅក្នុងភូមិដែលកំពុងប្រឈមមុខនឹង «អំពើប្រល័យពូជសាសន៍» ក្នុងដៃរបស់ RSF។

គួរបញ្ជាក់ថាជម្លោះនៅក្នុងប្រទេសស៊ូដង់បានផ្ទុះឡើងនៅក្នុងខែមេសា ឆ្នាំ ២០២៣ បន្ទាប់ពីជម្លោះវាងមេបញ្ជាការនៃ RSF និងយោធា ឧត្តមសេនីយ៍ Mohamed Hamdan Dagalo និងឧត្តមសេនីយ៍ Abdel Fattah al-Burhan។

អ្នកទាំងពីរបានធ្វើរដ្ឋប្រហាររួមគ្នាក្នុងឆ្នាំ ២០២១ដោយរារាំងការផ្លាស់ប្តូររបស់ស៊ូដង់ទៅកាន់លទ្ធិប្រជាធិបតេយ្យ ។ មេដឹកនាំទាំងពីរបានបដិសេធមិនចុះហត្ថលេខាលើកិច្ចព្រមព្រៀងសន្តិភាពមួយ បើទោះបីជាមានការខិតខំប្រឹងប្រែងពីសំណាក់សហរដ្ឋអាមេរិក និងអារ៉ាប៊ីសាអូឌីត ដើម្បីផ្សះផ្សារបញ្ចប់ជម្លោះក៏ដោយ៕

អត្ថបទ៖ ប៊ុន សុភាព