ព័ត៌មានអន្ដរជាតិ

អ៊ីស្រាអែល គំរាមប្រើការសងសឹកដ៏ខ្លាំងក្លាមិនធ្លាប់មាន បើអ៊ីរ៉ង់ហ៊ានវាយបក

បានផុស

២ years មុន

នៅ

ថ្ងៃពុធ ៣០ តុលា ២០២៤

ដោយ

Chheang

មេដឹកនាំយោធាអ៊ីស្រាអែល កាលពីថ្ងៃអង្គារបានព្រមានដល់ប្រទេសអ៊ីរ៉ង់ឲ្យបញ្ឈប់ការវាយបកផ្សេងទៀតទៅលើអ៊ីស្រាអែល បើមិនដូច្នោះទេនឹងមានការសងសឹកយ៉ាងចាស់ដៃវិញជាក់ជាមិនខាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់លោក Herzi Halevi ធ្វើឡើងក្រោយអ៊ីស្រាអែលបានវាយប្រហារតាមដែនអាកាសលើទីក្រុងតេហេរ៉ង់ កាលពីថ្ងៃសៅរ៍សប្ដាហ៍មុន ដែលជាការសងសឹកចំពោះការបាញ់មីស៊ីលប្រមាណជា២០០គ្រាប់របស់អ៊ីរ៉ង់ចូលដីអ៊ីស្រាអែលកាលពីថ្ងៃទី១ខែតុលា។

ប្រមុខយោធាអ៊ីស្រាអែល បាននិយាយថា៖ «បើអ៊ីរ៉ង់សាងកំហុសដោយការបាញ់មីស៊ីលផ្សេងទៀតលើអ៊ីស្រាអែល យើងនឹងដឹងម្តងទៀតពីរបៀបដើម្បីទៅដល់ប្រទេសអ៊ីរ៉ង់ ជាមួយនឹងសមត្ថភាពដែលយើងមិនធ្លាប់បានប្រើប្រាស់នៅពេលនេះ ហើយវាយប្រហារឲ្យចាស់ដៃខ្លាំងតែម្ដង»។

លោក Halevi បានបន្តថា៖ «យើងធ្វើនេះសម្រាប់មូលហេតុសាមញ្ញជាទីបំផុត នោះគឺយើងត្រូវបង្ខំឲ្យត្រូវតែធ្វើវាម្ដងទៀត» ដោយបន្ថែមថា អ៊ីស្រាអែលនឹងវាយប្រហារលើទីតាំងផ្សេងៗទៀត ដោយមិនមែនត្រឹមតែទីតាំងយោធា ឬមីស៊ីលដូចការវាយបកសប្ដាហ៍មុននោះទេ។

សូមបញ្ជាក់ថា ក្រៅតែពីអ៊ីស្រាអែល សហរដ្ឋអាមេរិកក៏បានធ្វើការព្រមានចំៗដាក់អ៊ីរ៉ង់ផងដែរថា ទីក្រុងតេហេរ៉ង់នឹងជួបវិបត្តិដ៏ធ្ងន់ធ្ងរ ប្រសិនបើខ្លួនហ៊ានអនុវត្តសកម្មភាពឈ្លានពានបន្ថែមទៀតប្រឆាំងនឹងអ៊ីស្រាអែល ឬបុគ្គលិកអាមេរិកនៅតំបន់មជ្ឈិមបូព៌ា៕

ដោយ៖ ឈាង

ចុចអាន៖ អាមេរិក ព្រមានអ៊ីរ៉ង់ថានឹងជួបទុក្ខធ្ងន់ បើហ៊ានវាយបកទៅអ៊ីស្រាអែលវិញ