ព័ត៌មានអន្ដរជាតិ

បាតុកម្មផ្ទុះឡើងនៅអ៊ីស្រាអែល ក្រោយលោក Netanyahu បណ្ដេញរដ្ឋមន្ត្រីការពារជាតិ

បានផុស

២ years មុន

នៅ

ថ្ងៃពុធ ៦ វិច្ឆិកា ២០២៤

ដោយ

Chheang

បាតុកម្មបានផ្ទុះឡើងនៅក្នុងប្រទេសអ៊ីស្រាអែល បន្ទាប់ពីលោក Yoav Gallant ត្រូវបានបញ្ចប់តំណែងជារដ្ឋមន្ត្រីការពារជាតិអ៊ីស្រាអែលដោយលោកនាយករដ្ឋមន្ត្រី Benjamin Netanyahu កាលពីថ្ងៃទី៥ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុកររាប់ពាន់នាក់នៅតាមដងផ្លូវ បាននាំគ្នាអំពាវនាវឲ្យលោក Netanyahu ចុះចេញពីតំណែង និងទាមទារឲ្យរដ្ឋមន្ត្រីការពារជាតិថ្មីផ្ដល់អាទិភាពលើកិច្ចព្រមព្រៀងដោះលែងចំណាប់ខ្មាំង។

ក្រុមតំណាងគ្រួសារចំណាប់ខ្មាំងដែលត្រូវបានចាប់ខ្លួនដោយក្រុមសកម្មប្រយុទ្ធហាម៉ាសកាលពីថ្ងៃទី៧ខែតុលាឆ្នាំមុន ក៏បានចូលរួមថ្កោលទោសចំពោះការសម្រេចចិត្តរបស់លោក Netanayahu ផងដែរ ដោយចាត់ទុកថា វាជារឿងដែលធ្វើឲ្យកិច្ចព្រមព្រៀងដោះលែងចំណាប់ខ្មាំងកាន់តែយ៉ាប់យ៉ឺនឡើង។

លោក Netanyahu បញ្ជាក់ច្បាស់ៗថា លោកលែងទុកចិត្តលើលោក Yoav Gallant ប៉ុន្មានខែមកហើយ។ រឿងធំមួយដែលគេដឹងថា ធ្វើឲ្យទំនាក់ទំនងរវាងអ្នកទាំងពីរប្រេះឆា គឺជុំវិញប្រតិបត្តិការយោធាក្នុងតំបន់ហ្គាហ្សា ដោយលោក Netanyahu នៅតែរឹងទទឹងប្រកាន់ជំហរម៉ឺងម៉ាត់ ទាំងដែលលោក Gallant អះអាងថា អ៊ីស្រាអែលចាំបាច់ត្រូវធ្វើសម្បទានក្នុងការចរចាបទឈប់បាញ់ជាមួយក្រុមឥស្លាមហាម៉ាស ដើម្បីធានាការដោះលែងចំណាប់ខ្មាំង។

ក្រោយការបញ្ចប់តួនាទីនេះ លោក Netanyahu នឹងតែងតាំងរដ្ឋមន្ត្រីការបរទេស Israel Katz មកជំនួសតំណែងលោក Gallant វិញ។

ប៉ុន្មានខែមុនចាប់ផ្ដើមសង្គ្រាមនៅហ្គាហ្សា លោក Netanyahu ធ្លាប់បានបណ្ដេញលោក Gallant ម្ដងរួចមកហើយ ប៉ុន្តែត្រូវបានជ្រើសតាំងលោកសាជាថ្មីវិញ បន្ទាប់ពីមានប្រតិកម្មជំទាស់ខ្លាំងពីសាធារណជន៕

ដោយ៖ ឈាង

ចុចអាន៖ មន្ទីរបញ្ចកោណ ថា រដ្ឋមន្ត្រីការពារជាតិដែលអ៊ីស្រាអែលបណ្ដេញ ជា «ដៃគូគួរឲ្យទុកចិត្ត»