ព័ត៌មានអន្ដរជាតិ

និស្សិតចិនម្នាក់ចាក់សម្លាប់មនុស្ស៨នាក់ និង១៧នាក់រងរបួសធ្ងន់ធ្ងរ

បានផុស

១ year មុន

នៅ

ថ្ងៃចន្ទ ១៨ វិច្ឆិកា ២០២៤

ដោយ

ការវាយប្រហារដោយកាំបិតយ៉ាងសាហាវព្រៃផ្សៃនៅសាលាវិជ្ជាជីវៈមួយក្នុងទីក្រុង Wuxi ភាគខាងកើតប្រទេសចិនកាលពីថ្ងៃសៅរ៍បានបណ្តាលឲ្យមនុស្ស ៨នាក់ស្លាប់ និង១៧នាក់ផ្សេងទៀតរងរបួសធ្ងន់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៧ខែវិច្ឆិកា។

យោងតាមប៉ូលិសបានឲ្យដឹងថា ការវាយប្រហារនេះបានកើតឡើងនៅវិទ្យាស្ថានសិល្បៈនិងបច្ចេកវិទ្យាវិជ្ជាជីវៈ Wuxi ក្នុងទីក្រុង Yixing ដែលជាទីក្រុងតូចមួយនៅក្នុងទីក្រុង Wuxi នៅម៉ោងប្រហែល៦:៣០ ល្ងាចម៉ោងក្នុងស្រុក។

ជនសង្ស័យឈ្មោះ Xu ភេទប្រុស អាយុ២១ឆ្នាំ ជានិស្សិត ត្រូវបានឃាត់ខ្លួននៅនឹងកន្លែងកើតហេតុភ្លាមៗ។ ប៉ូលិសបានឲ្យដឹងថា Xu បានប្រលងធ្លាក់ ហើយមិនអាចបញ្ចប់ការសិក្សាបានទេ ហើយថាគាត់មិនពេញចិត្តចំពោះប្រាក់ខែរបស់គាត់នៅឯកម្មសិក្សាមួយ ទើបគាត់សម្រេចចិត្តបញ្ចេញការខកចិត្តរបស់គាត់តាមរយៈការវាយប្រហារនេះ។

យោងតាមវីដេអូដែលផ្សព្វផ្សាយនៅលើប្រព័ន្ធផ្សព្វផ្សាយសង្គម X បានបង្ហាញអ្នករងរបួសដេកនៅតាមផ្លូវបន្ទាប់ពីការវាយប្រហារ ខណៈអ្នកផ្សេងទៀតប្រញាប់ទៅជួយ។ នេះជាការវាយប្រហារលើកទីពីរក្នុងរយៈពេលមួយសប្តាហ៍បន្ទាប់ពីបុរសម្នាក់បានបើករថយន្តបុកមនុស្សនៅកន្លែងលេងកីឡាមួយក្នុងទីក្រុង Zhuhai ភាគខាងត្បូង ប្រទេសចិនដោយបានបណ្តាលឱ្យមនុស្ស ៣៥នាក់ស្លាប់ និង៤៣នាក់ផ្សេងទៀតរងរបួស។

គួរបញ្ជាក់ថាប្រទេសចិនជាញឹកញាប់មានការវាយប្រហារជាច្រើនដែលជនសង្ស័យធ្វើការវាយប្រហារសំដៅលើសាធារណៈជនដោយចៃដន្យ។ កាលពីខែតុលា បុរសម្នាក់ត្រូវបានឃុំខ្លួនបន្ទាប់ពីគាត់បានវាយប្រហារកូនដោយកាំបិតនៅសាលាក្នុងទីក្រុងប៉េកាំង ក្នុងហេតុការណ៍នោះក៏មានមនុស្សប្រាំនាក់បានរងរបួស។

កាលពីខែកញ្ញា មនុស្សបីនាក់បានស្លាប់ក្នុងការវាយប្រហារដោយកាំបិតក្នុងផ្សារទំនើបក្រុងសៀងហៃ ហើយមនុស្ស ១៥ នាក់ផ្សេងទៀតបានរងរបួស។ ក្នុងខែដដែលនោះ សិស្សសាលាជនជាតិជប៉ុនម្នាក់បានស្លាប់ បន្ទាប់ពីត្រូវបានចាក់សម្លាប់នៅពេលធ្វើដំណើរទៅសាលារៀនក្នុងទីក្រុង Shenzhen ភាគខាងត្បូង៕