លោក ពូទីន ប្រដូចឥទ្ធិពលមីស៊ីល Oreshnik ទៅនឹងអាចម៍ផ្កាយ

ក្នុងកិច្ចប្រជុំកំពូលនៃអង្គការសន្ធិសញ្ញាសន្តិសុខសមូហភាព (CSTO) នៅរដ្ឋធានី អាស្តាណា នៃប្រទេសកាហ្សាក់ស្ថានកាលពីថ្ងៃព្រហស្បតិ៍ទី២៨ខែវិច្ឆិកាឆ្នាំ២០២៤ ប្រធានាធិបតីរុស្ស៊ី បានឆ្លៀតយកឱកាសនោះនិយាយអំពីមីស៊ីលដ៏ទំនើបដែលទីក្រុងមូស្គូបាញ់លើទឹកដីអ៊ុយក្រែន កាលពីប៉ុន្មានថ្ងៃមុន ដោយអះអាងថា កម្លាំងវាយប្រហាររបស់មីស៊ីល Oreshnik គឺខ្លាំងដូចឥទ្ធិពលអាចម៍ផ្កាយអ៊ីចឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំរុស្ស៊ីលើកឡើងថា «វាប្រៀបបាននឹងអាចម៍ផ្កាយ! អ្នករាល់គ្នាដឹងហើយថា ក្នុងប្រវត្តិសាស្រ្ត បើអាចម៍ផ្កាយធ្លាក់ចំកន្លែងណា ទីនោះនឹងមានផលវិបាក។ ឥទ្ធិពលរបស់វា អាចបង្កើតឲ្យមានបឹងមួយបាន»។

មិនត្រឹមប៉ុណ្ណឹង លោកពូទីនអួតថា មីស៊ីលល្បឿនលឿនជាងសំឡេងប្រភេទនេះ គឺអាចហោះបុកទម្លុះខែលការពារគ្រប់ប្រភេទ ទោះខែលការពារនោះខ្លាំងកម្រិតណាក៏ដោយ។

ការអះអាងរបស់លោកពូទីន កើតឡើងបន្ទាប់ពីមេដឹកនាំវិមានក្រឹមឡាំងរូបនេះ បញ្ជាឲ្យផលិតមីស៊ីល Oreshnik ទ្រង់ទ្រាយធំ និងបាញ់សាកល្បងជាបន្តបន្ទាប់។

Oreshnik គឺជាមីស៊ីលជំនាន់ថ្មីដ៏ទំនើប ធ្វើដំណើរលឿនជាងសំឡេង១០ដង ពោលគឺហោះក្នុងល្បឿន២.៥ទៅ៣គីឡូម៉ែត្រក្នុងមួយវិនាទី។

យោងតាមលោកពូទីន ការដែលរុស្ស៊ីបាញ់មីស៊ីលនេះលើអ៊ុយក្រែន គឺដើម្បីឆ្លើយតបទៅទីក្រុងកៀវ ដែលយកមីស៊ីល ATACMS និង HIMARS ផលិតដោយសហរដ្ឋអាមេរិក និងមីស៊ីល Storm Shadow របស់ចក្រភពអង់គ្លេស វាយប្រហារលើទីតាំងយោធាក្នុងទឹកដីរុស្ស៊ីដែលអន្តរជាតិទទួលស្គាល់។

កាលនោះ លោក ពូទីន ព្រមានថា ប្រទេសណាក៏ដោយ ឲ្យតែផ្តល់អាវុធជួយអ៊ុយក្រែនយកមកបាញ់ចូលដីរុស្ស៊ី ទីក្រុងមូស្គូនឹងសងសឹក ដោយវាយប្រហារទីតាំងយោធារបស់ប្រទេសនោះវិញ ហើយលោកចង្អុលចំឈ្មោះសហរដ្ឋអាមេរិក ថា ជាអ្នកបំផ្លាញប្រព័ន្ធសន្តិសុខអន្តរជាតិ បង្កើនហានិភ័យនៃជម្លោះពិភពលោក៕

អត្ថបទ៖ សុខ សុវណ្ណ

ចុចអាន៖ មីស៊ីលរុស្ស៊ី បាញ់លើអ៊ុយក្រែន ជាមីស៊ីលហោះលឿនជាងសំឡេង១០ដង គ្មានអ្វីស្ទាក់ចាប់បាន