លោក ហ្សេលេនស្គី ប្តូរជំហរលើបទឈប់បាញ់ជាមួយ រុស្ស៊ី

ក្នុងបទសម្ភាសន៍ជាមួយ Sky News កាលពីថ្ងៃសុក្រទី២៩ខែវិច្ឆិកាឆ្នាំ២០២៤ ប្រមុខដឹកនាំរដ្ឋាភិបាលទីក្រុង កៀវ, វ្ល៉ាឌីមៀរ ហ្សេលេនស្គី បានប្តូរជំហរហើយដោយបញ្ជាក់ថា លោកអាចចុះហត្ថលេខាលើបទឈប់បាញ់ជាមួយរុស្ស៊ី ក្នុងករណីអង្គការណាតូ យល់ព្រមការពារទឹកដីអ៊ុយក្រែន ដែលនៅសេសសល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបទៅសំណួរថាតើ ពាក់ព័ន្ធការដាក់សម្ពាធរបស់ប្រធានាធិបតីជាប់ឆ្នោតអាមេរិក ដូណាល់ ត្រាំ ឲ្យអ៊ុយក្រែន ឈប់ទាមទារមកវិញនូវទឹកដីដែលរុស្ស៊ីកាត់យករួចទៅហើយនោះ ដើម្បីជាថ្នូរចូលជាសមាជិកអង្គការណាតូ, លោកហ្សេលេនស្គី ឆ្លើយថា «បើយើងចង់ចប់សង្គ្រាម វាជារឿងចាំបាច់បំផុតដែលទឹកដីនៅសេសសល់របស់យើងទាំងអស់ ត្រូវដាក់ក្រោមឆ័ត្រអង្គការណាតូ។ យើង​ត្រូវ​ធ្វើ​វា​ឲ្យ​លឿន បើ​ទឹក​ដី​អ៊ុយក្រែនបាត់ អ៊ុយក្រែន​អាច​យក​មក​វិញ​តាម​ផ្លូវ​ការ​ទូត»។

នេះជាការផ្លាស់ប្តូរជំហររបស់លោក ហ្សេលេនស្គី លើបទឈប់បាញ់ ខណៈដើមឡើយលោកតែងអះអាងថា លក្ខខណ្ឌតែម្យ៉ាងគត់ដែលអ៊ុយក្រែន ទទួលយកកិច្ចព្រមព្រៀងនេះ គឺលុះត្រារុស្ស៊ី ដកទ័ពទាំងអស់ចេញពីទឹកដីដែលខ្លួនកាន់កាប់។

កិច្ចសម្ភាសនេះ កើតឡើងមិនដល់ជាង២ខែទៀតទេ ដែលលោក ត្រាំ នឹងចូលកាន់តំណែងជាប្រធានាធិបតីអាមេរិកទី៤៧ជាផ្លូវការ។ អ្នកសាធារណរដ្ឋរូបនេះ គឺជាបុគ្គលដែលមិនពេញចិត្តចំពោះការផ្តល់ជំនួយយោធារបស់ទីក្រុងវ៉ាស៊ីនតោនដល់អ៊ុយក្រែន ហើយតែងប្រឆាំងជានិច្ច។

មិនមែនតែលោក ត្រាំ ទេ សូម្បី​អ្នកស្និទ្ធនឹងលោកជាច្រើននាក់ សុទ្ធតែ​ជឿ​ថា ​ជម្លោះ​អ៊ុយក្រែន​កំពុង​ធ្វើ​ឲ្យ​អ្នក​ជាប់​ពន្ធ​អាមេរិក​ខាតបង់​ប្រាក់​ច្រើន ហើយសង្គ្រាមត្រូវតែចប់ឲ្យបានឆាប់បំផុត៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី​អាច​បោះបង់ដី​បច្ចុប្បន្ន បើ​អាច​ចូល​ណាតូសិន ​ដោយ​យក​គំរូ​ដំណោះស្រាយ​អាល្លឺម៉ង់​ខាងលិច​​