ព័ត៌មានអន្ដរជាតិ

មេបញ្ជាការកូរ៉េខាងត្បូង៣រូប ត្រូវបញ្ឈរជើង និងយោធា១០នាក់ ត្រូវហាមមិនឲ្យចេញក្រៅប្រទេស

បានផុស

២ years មុន

នៅ

ថ្ងៃសុក្រ ៦ ធ្នូ ២០២៤

ដោយ

Chheang

ក្រសួងការពារជាតិកូរ៉េខាងត្បូង បានប្រកាសនៅថ្ងៃទី៦ខែធ្នូឆ្នាំ២០២៤នេះថា មេបញ្ជាការយោធា៣រូប ត្រូវព្យួរពីការងារ ដោយហេតុថា ពួកគេមានជាប់ពាក់ព័ន្ធនឹងការដាក់ចេញច្បាប់អាជ្ញាសឹករបស់លោកប្រធានាធិបតី Yoon Suk Yeol កាលពីរាត្រីថ្ងៃអង្គារ ដែលបង្កជាភាពចលាចលពេញផ្ទៃប្រទេស។

លោក Lee Jin-woo, លោក Kwak Jong-geun និងលោក Yeo In-hyung (រូបភាព៖ Yonhap)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមការចុះផ្សាយរបស់សារព័ត៌មាន Yonhap មេបញ្ជាការទាំង៣រូប មានដូចជា ឧត្តមសេនីយ៍ឯក Lee Jin-woo ប្រធានបញ្ជាការដ្ឋានការពាររដ្ឋធានី, ឧត្តមសេនីយ៍ឯក Kwak Jong-keun ប្រធានបញ្ជាការសង្គ្រាមពិសេសរបស់កងទ័ព និងឧត្តមសេនីយ៍ឯក Yeo In-hyung មេបញ្ជាការប្រឆាំងនឹងចារកម្ម។

ទន្ទឹមគ្នានេះដែរ រដ្ឋអាជ្ញាយោធា ក៏បានស្នើឲ្យមានការហាមឃាត់លើមន្ត្រីយោធាចំនួន ១០នាក់ មិនឲ្យចាកចេញពីប្រទេសផងដែរ។ ពួកគេកំពុងប្រឈមនឹងការចោទប្រកាន់ពីបទក្បត់ជាតិ និងការចោទប្រកាន់ផ្សេងទៀតទាក់ទងនឹងច្បាប់អាជ្ញាសឹក រួមទាំងមេបញ្ជាការទាំងបីរូបផងដែរ។

ចំណាត់ការនេះ បានធ្វើឡើងក្រោយមានការរិះគន់ចំពោះតួនាទីរបស់យោធាក្នុងការអនុវត្តច្បាប់អាជ្ញាសឹក និងការព្រួយបារម្ភជុំវិញលទ្ធភាពនៃការប្រកាសច្បាប់អាជ្ញាសឹកថ្មីមួយទៀត។

សូមបញ្ជាក់ថា កាលពីថ្ងៃព្រហស្បតិ៍ អតីតរដ្ឋមន្ត្រីការពារជាតិកូរ៉េខាងត្បូង លោក Kim Yong-hyun ក៏ត្រូវបានហាមប្រាមមិនឲ្យចាកចេញពីប្រទេសឡើយ និងត្រូវរងការស៊ើបអង្កេត ពាក់ព័ន្ធនឹងការចោទប្រកាន់ពីបទក្បត់ជាតិ។

កាលពីយប់ថ្ងៃទី៣ធ្នូ លោក Yoon បានបង្កការភ្ញាក់ផ្អើល ដោយប្រកាសច្បាប់អាជ្ញាសឹកយ៉ាងបន្ទាន់ជាទីបំផុត ដោយអះអាងថា នេះជារឿងចាំបាច់ក្នុងការការពារប្រទេសពីក្រុមបក្សពួកកូរ៉េខាងជើងនិងកម្លាំងប្រឆាំងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។ ប៉ុន្តែច្បាប់នោះមានដាក់បានត្រឹម២ម៉ោងប៉ុណ្ណោះ រួចក៏ដកចេញវិញ។

អ្នកជំនាញអះអាងថា មូលហេតុដែលលោកប្រកាសច្បាប់នេះ ព្រោះមើលឃើញស្ថានការណ៍ថា ខ្លួនកំពុងចាញ់ប្រៀបគណបក្សប្រឆាំងក្នុងរឿងនយោបាយរបស់ប្រទេស ហើយច្បាប់នោះទៀតសោត ត្រូវគេបរិហារថា ជាការប្រាសចាករដ្ឋធម្មនុញ្ញ៕

ដោយ៖ ឈាង

ចុចអាន៖ តើច្បាប់អាជ្ញាសឹក ធ្លាប់បានប្រកាសនៅកូរ៉េខាងត្បូងប៉ុន្មានដងមកហើយ?