ប្រធានាធិបតី​កូរ៉េ​ខាង​ត្បូង ប្រាប់​ថា​នឹង​មិន​ប្រកាស​ច្បាប់​អាជ្ញាសឹក​ម្ដង​ទៀត​ឡើយ

ប្រធានាធិបតីកូរ៉េខាងត្បូង បាននិយាយ​នៅ​ថ្ងៃ​ទី​៧​ធ្នូ​នេះ​ថា លោកមានការសោកស្តាយជាខ្លាំងចំពោះការបង្កក្ដី​ព្រួយ​បារម្ភ និងចលាចល​ ជុំវិញ​ការប្រកាសច្បាប់អាជ្ញាសឹកកាលពីដើមសប្តាហ៍ ហើយបានសន្យាថានឹងមិន​ប៉ុនប៉ង​
ធ្វើ​​រឿង​នេះ​ម្តងទៀតឡើយ។

ការ​បង្ហាញ​មុខ​សុំទោស​ជា​សាធារណៈ​​នេះ ធ្វើ​ឡើង​ប៉ុន្មានម៉ោងមុនការបោះឆ្នោតសភាលើសំណើចោទប្រកាន់​ទៅ​លើ​​លោក​ប្រធានាធិបតី Yoon Suk Yeol។

លោក Yoon បានប្រាប់​ថា លោកនឹងមិនគេចវេះពីការទទួលខុសត្រូវផ្នែកច្បាប់ ឬនយោបាយ​ទេ ដោយបន្ថែមថា លោកនឹងធ្វើតាមការណែនាំរបស់គណបក្សលោក ដើម្បីដោះស្រាយវិបត្តិនយោបាយដែលបណ្តាលមកពី​ការ​ប្រកាស​ច្បាប់​អាជ្ញាសឹក។

នៅ​ពេល​នេះ គេ​នៅ​​មិន​ទាន់​ដឹង​ច្បាស់ទេថា​តើញត្តិដែលស្នើដោយសមាជិកសភាបក្សប្រឆាំង នឹងទទួលបានសំឡេងគាំទ្រ​ពីរភាគបី ដែលតម្រូវ​ឲ្យ​លោក Yoon ទទួលការចោទប្រកាន់ឬយ៉ាងណា​​នោះ​ទេ។

ការចោទប្រកាន់លោក Yoon នឹងតម្រូវ​ឲ្យ​មានការគាំទ្រពីសមាជិកចំនួន ២០០​នាក់ក្នុងចំណោមសមាជិក ៣០០​នាក់​របស់រដ្ឋសភា។ គណបក្ស​ប្រឆាំង​​ទាំង​អស់​ដែល​បាន​រួម​គ្នា​ធ្វើ​ចលនា​ចោទ​ប្រកាន់​នេះ មាន​អាសនៈ​ចំនួន ១៩២។ នោះមានន័យថា ពួកគេនឹងត្រូវការយ៉ាងតិច​៨សំឡេងពីគណបក្សអំណាចប្រជាជន (PPP) របស់លោក Yoon។

សូម​ជម្រាប​​ជា​ថ្មី​ថា កាលពី​យប់​ថ្ងៃ​ទី​៣​ធ្នូ លោក Yoon បានបង្កការភ្ញាក់ផ្អើល ដោយប្រកាសច្បាប់អាជ្ញាសឹកយ៉ាងបន្ទាន់ជាទីបំផុត ដោយអះអាងថា នេះជារឿងចាំបាច់ក្នុងការការពារប្រទេសពីក្រុមបក្សពួកកូរ៉េខាងជើងនិងកម្លាំងប្រឆាំងរដ្ឋ។ ការធ្វើបែបនេះ គឺដើម្បីដកកងកម្លាំងគាំទ្រកូរ៉េខាងជើងចេញពីប្រទេស និងដើម្បីការពារសណ្តាប់ធ្នាប់រដ្ឋធម្មនុញ្ញសេរី។ លោកគ្មានជម្រើសអ្វីក្រៅពីងាកទៅរកច្បាប់អាជ្ញាសឹកឡើយ។ ប៉ុន្តែច្បាប់នោះមានដាក់បានត្រឹម២ម៉ោងប៉ុណ្ណោះ រួចក៏ដកចេញវិញ។

អ្នកជំនាញអះអាងថា មូលហេតុដែលលោកប្រកាសច្បាប់នេះ ព្រោះមើលឃើញស្ថានការណ៍ថា ខ្លួនកំពុងចាញ់ប្រៀបគណបក្សប្រឆាំងក្នុងរឿងនយោបាយរបស់ប្រទេស ហើយច្បាប់នោះទៀតសោត ត្រូវគេបរិហារថា ជាការប្រាសចាករដ្ឋធម្មនុញ្ញ៕

ដោយ៖ ឈាង

ចុចអាន៖ មេ​បញ្ជាការ​កូរ៉េ​ខាង​ត្បូង៣​រូប ត្រូវ​បញ្ឈរ​ជើង​ និង​យោធា​១០​នាក់ ត្រូវ​ហាម​មិន​ឲ្យ​ចេញ​ក្រៅ​ប្រទេស