តួកគី ព្រមានពីហានិភ័យ នៃជម្លោះរុស្ស៊ី-អ៊ុយក្រែន ផ្ទុះទៅជាសង្គ្រាមនុយក្លេអ៊ែរ

ស្របពេលជម្លោះរុស្ស៊ី-អ៊ុយក្រែន មិនទាន់ឃើញមានសញ្ញាថមថយនោះ ស្រាប់តែប្រទេសតួកគីបានចេញការព្រមានថា សង្គ្រាមនេះអាចបង្កហានិភ័យឈានទៅដល់ការផ្ទុះសង្គ្រាមនុយក្លេអ៊ែរតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ RT, រដ្ឋមន្ត្រីការពារជាតិ Hakan Fidan បានប្រាប់ទៅរដ្ឋសភាតួកគីកាលពីថ្ងៃអង្គារទី១០ខែធ្នូឆ្នាំ២០២៤ថា «យើងមិនអាចច្រានចោលលទ្ធភាពដែលសង្គ្រាមនេះ នឹងវិវត្តទៅរកស្ថានការណ៍កាន់តែគ្រោះថ្នាក់នោះទេ ទាំងកត្តាភូមិសាស្រ្តនិងការប្រើប្រាស់អាវុធនុយក្លេអ៊ែរ»។

ការព្រមាននេះកើតឡើងប៉ុន្មានថ្ងៃប៉ុណ្ណោះ បន្ទាប់ពីទីក្រុងវ៉ាស៊ីនតោន ប្រកាសផ្តល់ជំនួយយោធាថ្មីក្នុងទំហំទឹកប្រាក់ជិត ១ពាន់លានដុល្លារអាមេរិក ទៅឲ្យអ៊ុយក្រែន។

យ៉ាងណា លោក Fidan អះអាងថា ទីក្រុងអង់ការ៉ា នឹងបន្តកិច្ចខិតខំប្រឹងប្រែងការទូត ដើម្បីនាំយកសន្តិភាពមកឲ្យបាននៅឆ្នាំ២០២៥ខាងមុខ។

កាលពីខែកញ្ញា រុស្ស៊ីបានគំរាមបាញ់នុយក្លេអ៊ែរម្តងរួចមកហើយ ជុំវិញការដែលប្រទេសលោកខាងលិច បើកដៃឲ្យអ៊ុយក្រែន បាញ់មីស៊ីលចូលជ្រៅទៅក្នុងទឹកដីរុស្ស៊ី។

ពេលនោះ អនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev បានបញ្ជាក់យ៉ាងច្បាស់ក្នុងសារបង្ហោះលើតេឡេក្រាមថា ទីក្រុងមូស្គូច្បាស់ជាឆ្លើយតបឲ្យចាស់ដៃហើយ ព្រោះថាការអត់ធ្មត់មានកំណត់ ហើយបើនិយាយពីនុយក្លេអ៊ែរវិញ តាមពិតទៅបើមើលពីស្ថានការណ៍ក្នុងជម្លោះជាមួយទីក្រុងកៀវ, វិមានក្រឹមឡាំង មានហេតុផលអាចប្រើអាវុធនេះបានបាត់ទៅហើយ គ្រាន់តែខ្លួនមិនទាន់ចង់ប៉ុណ្ណោះ។

មកទល់ឥឡូវ ភាពតានតឹងនៅតែបន្ត ហើយសង្គ្រាមរុស្ស៊ី-អ៊ុយក្រែន កាន់តែមានការចូលដៃពីសំណាក់ភាគីច្រើនឡើងៗ ដល់ថ្នាក់អ្នកជំនាញអន្តរជាតិ វិភាគថា ស្ថានការណ៍អាចរីកកាន់តែធំ ហួសពីការគ្រប់គ្រង៕

អត្ថបទ៖ សុខ សុវណ្ណ

ចុចអាន៖ [វិភាគអន្តរជាតិ​] ស្ថានភាពសង្គ្រាម​រុស្ស៊ី​-អ៊ុយក្រែន​​អាច​ធ្វើ​ឲ្យ​ត្រាំ​បរាជ័យ ​ក្លាយ​ជាសង្គ្រាម​លោក​លើក​ទី៣​និង​ឈាន​ទៅ​សង្គ្រាម​នុយក្លេអ៊ែរ​​