ព័ត៌មានអន្ដរជាតិ

ការប្រយុទ្ធគ្នានៅស៊ូដង់កាន់តែសាហាវបណ្តាលឲ្យស្លាប់និងរបួសជិត៣០នាក់

បានផុស

១ year មុន

នៅ

ថ្ងៃសៅរ៍ ១៤ ធ្នូ ២០២៤

ដោយ

មនុស្ស៩នាក់បានស្លាប់ និងជាង២០នាក់ផ្សេងទៀតបានរងរបួសកាលពីថ្ងៃសុក្រនៅក្នុងការវាយប្រហារដោយមីស៊ីលដោយកងកម្លាំងគាំទ្ររហ័សប៉ារ៉ាយោធា (RSF) លើមន្ទីរពេទ្យមួយក្នុងទីក្រុង El Fasher រដ្ឋធានីនៃរដ្ឋ North Darfur ភាគខាងលិចប្រទេសស៊ូដង់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៤ខែធ្នូនេះ។

លោក Ibrahim Khatir អគ្គនាយកនៃរដ្ឋ North Darfur បាននិយាយថា «កងជីវពលបានបាញ់មីស៊ីលចំនួន ៤ គ្រាប់ពីយន្តហោះគ្មានមនុស្សបើក(ដ្រូន) នៅព្រឹកថ្ងៃនេះ ដោយផ្តោតលើមន្ទីរពេទ្យ Saudi Arabia ដែលបានសម្លាប់អ្នកជំងឺចំនួន៩នាក់ និងរបួសជាង២០នាក់ផ្សេងទៀត»។

មន្ទីរពេទ្យ Saudi Arabia គឺជាមណ្ឌលសុខភាពតែមួយគត់ដែលនៅតែដំណើរការនៅ El Fasher រួមទាំងការវះកាត់ និងព្យាបាល។ ពាក់ព័ន្ធបញ្ហានេះ RSFមិនទាន់ធ្វើអត្ថាធិប្បាយជុំវិញហេតុការណ៍នេះនៅឡើយទេ។

គួរបញ្ជាក់ថា ការប៉ះទង្គិចគ្នាយ៉ាងខ្លាំងបាននិងកំពុងផ្ទុះឡើងក្នុងទីក្រុង El Faser រវាងកងកម្លាំងប្រដាប់អាវុធស៊ូដង់ (SAF) និង RSF ចាប់តាំងពីថ្ងៃទី ១០ ខែឧសភាមកម្លេះ។ ប្រទេសស៊ូដង់ត្រូវបានជាប់គាំងដោយជម្លោះបំផ្លិចបំផ្លាញរវាងកងកម្លាំងប្រដាប់អាវុធស៊ូដង់ និង RSF ចាប់តាំងពីពាក់កណ្តាលខែមេសា ឆ្នាំ ២០២៣។ ជម្លោះដ៏សាហាវនេះបានបណ្តាលឱ្យមនុស្សស្លាប់ជាង ២៧១២០ នាក់ និងមនុស្សជាង១៤លាននាក់បានផ្លាស់ទីលំនៅមិនថាក្នុង និងក្រៅប្រទេសស៊ូដង់ នេះបើយោងតាមការប៉ាន់ស្មានរបស់អង្គការអន្តរជាតិ៕