អាមេរិក​ដាក់​ទណ្ឌកម្ម​ក្រុមហ៊ុន​មីយ៉ាន់​ម៉ា​និង​រុស្ស៊ីព្រោះជួញអាវុធឱ្យ​​​របប​យោធា​មីយ៉ាន់ម៉ា

ប្រភពព័ត៌មានបានឱ្យដឹងថា សហរដ្ឋអាមេរិក​បាន​ដាក់​ទណ្ឌកម្ម​លើ​ក្រុមហ៊ុនរបស់មីយ៉ាន់ម៉ានិង​រុស្ស៊ីដែល​គាំទ្រ​របបសឹក​យោធាមីយ៉ាន់ម៉ាដោយ​ការ​ផ្គត់ផ្គង់​អាវុធ​​​​ចាប់​តាំងពី​​​ការ​ផ្តួល​រំលំ​រដ្ឋាភិបាល​​​​របស់​លោកស្រី អ៊ុងសាន ស៊ូជី តាម​រយៈរដ្ឋប្រហារ​កាល​ថ្ងៃទី​​១ខែ​កុម្ភៈឆ្នាំ​២០២១​។

ក្រសួងពាណិជ្ជកម្មសហរដ្ឋអាមេរិកបាននិយាយថា ខ្លួនបានដាក់ទណ្ឌកម្មលើក្រុមហ៊ុន Sky Aviator Company Ltd និងក្រុមហ៊ុន Synpex Shwe Company Ltd ដែលមានមូលដ្ឋាននៅទីក្រុងរ៉ង់​ហ្គួន​​ប្រទេស​មីយ៉ាន់ម៉ា ដោយ​សារ​តែក្រុមហ៊ុនទាំងនេះគាំទ្រដល់ការ​ផ្តត់ផ្គង់អាវុធ​ដល់របបសឹកយោធា ដែលធ្វើឱ្យរបបសឹកយោធាមានលទ្ធភាពអាចវាយប្រហារលើជនស៊ីវិល​បណ្តាល​ឲ្យស្លាប់​និង​របួស​រាប់​ម៉ឺន​នាក់​។

អង្គការសិទ្ធិមនុស្សយុត្តិធម៌សម្រាប់មីយ៉ាន់ម៉ា (Justice for Myanmar) បានរាយការណ៍កាលពីចុងឆ្នាំ២០២៣ ថា ក្រុមហ៊ុនទាំងនេះក៏ត្រូវបានចក្រភពអង់គ្លេសដាក់ទណ្ឌកម្មរួច​​ទៅហើយ​ ដោយសារបាននាំចូលឧបករណ៍យោធាពីរុស្ស៊ី និង​អ៊ុយក្រែន រួមទាំងគ្រឿងម៉ាស៊ីន និងគ្រឿងបន្លាស់របស់យន្តហោះចម្បាំង YAK-130។

របប​យោធាមីយ៉ាន់ម៉ា បាន​ប្រើប្រាស់​យន្តហោះចម្បាំង YAK-130 វាយ​ប្រហារតាម​អាកាសលើភូមិពលរដ្ឋមួយចំនួននៅក្នុង​ប្រទេសមីយ៉ាន់ម៉ាដែលបានបណ្តាលឱ្យមានមនុស្សយ៉ាងហោចណាស់១៦៨នាក់បានស្លាប់។

អង្គការសិទ្ធិមនុស្សយុត្តិធម៌សម្រាប់មីយ៉ាន់ម៉ា ក៏បានចោទប្រកាន់ក្រុមហ៊ុន Heli Eagle ដែលជាក្រុមហ៊ុនគ្រប់គ្រងដោយឈ្មោះ Myo Min OU ប្អូនប្រុសរបស់ Kyaw Min OU ដែលជាអ្នកផ្គត់ផ្គង់ឧបករណ៍ដល់របបសឹកយោធា។

អង្គការសិទ្ធិមនុស្សយុត្តិធម៌សម្រាប់មីយ៉ាន់ម៉ាក៏បាននិយាយផងដែរថា ក្រុមហ៊ុន Synpex Shwe បាននិងកំពុងផ្គត់ផ្គង់គ្រឿងបន្លាស់ឧទ្ធម្ភាគចក្រដល់របបសឹកយោធាពីក្រុមហ៊ុន Sins Avia Trading House ដែលត្រូវបានគេស្គាល់ឈ្មោះថា CNS Aviation ចាប់តាំងពីរដ្ឋប្រហារឆ្នាំ២០២១មកម៉្លេះ។

ក្រសួងការពារជាតិសហរដ្ឋអាមេរិកក៏បានដាក់ទណ្ឌកម្មដល់ក្រុមហ៊ុនរុស្ស៊ីចំនួនពីរផងដែរគឺ៖ Aviasnab LLC និង Gorizont ដោយសារការផ្គត់ផ្គង់អាវុធនិងគ្រឿងបន្លាស់ដល់របបសឹកយោធាមីយ៉ាន់ម៉ា៕