ព័ត៌មានអន្ដរជាតិ

តុលាការធម្មនុញ្ញកូរ៉េខាងត្បូងបើកកិច្ចប្រជុំលើកដំបូងពិនិត្យសំណុំរឿងលោក Yoon

បានផុស

១ year មុន

នៅ

ថ្ងៃព្រហស្បតិ៍ ១៩ ធ្នូ ២០២៤

ដោយ

ចៅក្រមតុលាការធម្មនុញ្ញនៃប្រទេសកូរ៉េខាងត្បូងទាំង៦រូបដែលស្ថិតនៅក្នុងតូនាទីបានបើកកិច្ចប្រជុំជាលើកដំបូងដើម្បីពិនិត្យមើលសំណុំរឿងដកអំណាចប្រធានាធិបតី លោក Yoon Suk Yeol ដែលបានប្រកាសច្បាប់អាជ្ញាសឹកត្រឹមតែរយៈពេល៦ម៉ោង មុនសភាបោះឆ្នោតជំទាស់។

ចៅក្រម Kim Bok-hyeong (ឆ្វេង) និងចៅក្រម Km Hyung-du ពេលដើរចូលបន្ទប់ប្រជុំ។ Yonhap

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានកូរ៉េខាងត្បូង Korea Herald បានរាយការណ៍ថា ក្នុងដំណើរការកិច្ចប្រជុំដំបូងនេះ ចៅក្រមទាំង៦រូបត្រូវគេរំពឹងថា នឹងចែករំលែកការយល់ឃើញលើដំណោះស្រាយថាតើត្រូវតម្កល់សេចក្តីសម្រេចរបស់សភា ឬក៏ត្រូវច្រានចោល។

តុលាការធម្មនុញ្ញរបស់កូរ៉េខាងត្បូងនាពេលនេះកំពុងប្រឈមការខ្វះសមាសភាពចៅក្រមរហូតដល់៣រូប ដើម្បីធ្វើឲ្យក្រុមប្រឹក្សាជំនុំជម្រះពេញលក្ខណៈចំនួន៩រូប ហើយ ការសម្រេចសេចក្តីបានការដើម្បីដកហូតដំណែងប្រធានាធិបតី Yoon Suk Yeol គឺត្រូវការសំឡេង២ភាគ៣ ឬ៦សំឡេងក្នុងចំណោមចៅក្រម៩រូប។

តាមសេចក្តីរាយការណ៍របស់សារព័ត៌មានកូរ៉េដដែល រដ្ឋសភាជាតិដែលគ្រប់គ្រងស្ទើរតែ២ភាគ៣ដោយគណបក្សប្រជាធិបតេយ្យដែលជាគណបក្សប្រឆាំងដ៏មានប្រជាប្រិយភាព កំពុងតែពន្លឿននីតិវិធីដើម្បីស្នើតែងតាំងចៅក្រម៣រូប ក្នុងនោះ២រូបស្នើដោយគណបក្សប្រជាធិបតេយ្យ និង១រូបតាំងតែងដោយគណបក្សអំណាចប្រជាជនរបស់លោក Yoon Suk Yeol ដើម្បីទៅបំពេញកៅអីដែលខ្វះនោះ។

តាមការរំពឹងទុករដ្ឋសភាកូរ៉េនឹងបោះឆ្នោតដើម្បីតែងចៅក្រម២រូបដែលស្នើដោយគណបក្សប្រឆាំងនៅថ្ងៃទី២៣ខែធ្នូ និង ប្រជុំបោះឆ្នោតផ្តល់សេចក្តីទុកចិត្តដល់ចៅក្រមមួយរូបដែលស្នើដោយបក្សកាន់អំណាចនៅថ្ងៃទី២៤ខែធ្នូ។

ក្នុងករណីដែលសមាសភាពចៅក្រមទាំង៩រូបខាងលើត្រូវបានអនុម័តយល់ព្រម នោះចៅក្រម៤រូបនឹងមានសមាសភាពមកពីគណបក្សប្រឆាំង និងចៅក្រម៥រូបមានប្រវត្តិតែងតាំងដោយប្រធានាធិបតី Yoon និងគណបក្សកាន់អំណាចរបស់លោក។

ទោះបីជាបែបណាក្តី នៅតែមានការជជែកដេញដោលយ៉ាងខ្លាំងថា ទោះបីសភាអនុម័តបេក្ខភាពចៅក្រមទាំង៣រូបក៏ដោយ ក៏ប្រធានាធិបតីស្តីទី លោក Han Duck-soo មិនមានអំណាចតែងតាំងចៅក្រមទាំងនោះចូលទៅក្នុងប្រអប់ឡើយ ដោយសារអំណាចប្រធានាធិបតីគ្រាន់តែព្យួរ មិនមែនទំនេរទេ។ បើកៅអីប្រធានាធិបតីទំនេរ នោះទើបប្រធានាធិបតីស្តីទីមានសិទ្ធិតែងតាំង។

សភាជាតិកូរ៉េខាងត្បូងបានបោះឆ្នោតគាំទ្រទម្លាក់លោក Yoon Suk Yeol ពីអំណាច ដោយសំឡេង ចំនួន២០៤ទល់នឹងសំឡេងប្រឆាំង៨៥ កាលថ្ងៃទី១៤ខែធ្នូ ដោយសារតែការចោទប្រកាន់ប្រធានាធិបតីប្រកាសដាក់ច្បាប់អាជ្ញាសឹកខុសច្បាប់រដ្ឋធម្មនុញ្ញ បង្កភាពវិកវរនៅក្នុងប្រទេស៕

ដោយ រ៉ាន់ រើយ