ព័ត៌មានអន្ដរជាតិ

លោក ហ្សេលេនស្គី៖ ទាហានកូរ៉េខាងជើងជាង ៣ ០០០នាក់ ស្លាប់និងរបួស ក្នុងការប្រយុទ្ធឲ្យរុស្ស៊ី

បានផុស

២ years មុន

នៅ

ថ្ងៃអង្គារ ២៤ ធ្នូ ២០២៤

ដោយ

ក្នុងការបង្ហោះលើបណ្តាញសង្គម កាលពីថ្ងៃចន្ទទី២៣ខែធ្នូឆ្នាំ២០២៤ ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី និយាយថា មានទាហានកូរ៉េខាងជើងជាង ៣ ០០០នាក់ហើយ ត្រូវស្លាប់និងរបួស ក្នុងការប្រយុទ្ធឲ្យរុស្ស៊ី នៅតំបន់ Kursk។

ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់ប្រធានាធិបតីអ៊ុយក្រែន គឺខុសឆ្ងាយណាស់ពីសេចក្តីរាយការណ៍របស់ចារកម្មកូរ៉េខាងត្បូង កាលពីសប្តាហ៍មុន ដែលដាក់តួលេខទាហានកូរ៉េខាងជើង ស្លាប់មានត្រឹម១០០នាក់ ឬរបួសប្រហែល ១ ០០០នាក់ប៉ុណ្ណោះ។

ទោះបីជាយ៉ាងណាក៏ដោយ ប្រមុខដឹកនាំទីក្រុងកៀវបញ្ជាក់ថា តួលេខរបស់លោក គឺផ្តល់ឲ្យដោយមេបញ្ជាការកងទ័ពអ៊ុយក្រែន អូឡិចសាន់ឌើ សៀស្គី។

ការអះអាងរបស់លោក ហ្សេលេនស្គី កើតឡើងចំពេលយោធាកូរ៉េខាងត្បូង កត់សម្គាល់ថា កូរ៉េខាងជើង កំពុងតែត្រៀមបញ្ជូនកងកម្លាំង និងសព្វាវុធទៅឲ្យរុស្ស៊ីបន្ថែមទៀតហើយ។

តាមការលើកឡើងរបស់អគ្គសេនាធិការចម្រុះរបស់កូរ៉េខាងត្បូង (JCS), កូរ៉េខាងជើងកន្លងមកបានបញ្ជូនប្រព័ន្ធបាញ់គ្រាប់ ១៧០មិល្លិម៉ែត្រ និងប្រព័ន្ធបាញ់រ៉ុកកែត ២៤០មិល្លិម៉ែត្រ ទៅឲ្យរុស្ស៊ីរួចមកហើយ បច្ចុប្បន្នរដ្ឋាភិបាលក្រុងព្យុងយ៉ាង កំពុងសម្ងំផលិតដ្រូនអត្តឃាតច្រើនគ្រឿងទៀតសម្រាប់ដឹកទៅក្រុងមូស្គូ។

មន្ត្រី JCS បាននិយាយថា៖ «ដ្រូនអត្តឃាត គឺជាកិច្ចការមួយដែលលោក គីម ជុងអ៊ុន បានផ្តោតលើ» ដោយបន្ថែមថា កូរ៉េខាងជើងបានបង្ហាញពីចេតនារបស់ខ្លួនក្នុងការផ្តល់ដ្រូនទាំងនោះឲ្យទៅរុស្ស៊ី។

ដ្រូនបែបនេះ ត្រូវបានប្រើប្រាស់យ៉ាងច្រើននៅក្នុងសង្គ្រាមអ៊ុយក្រែន ហើយលោក គីម បានបញ្ជាឲ្យផលិតសព្វាវុធដែនអាកាស និងការធ្វើបច្ចុប្បន្នភាពនៃទ្រឹស្តី និងការអប់រំយោធា ដោយលើកឡើងពីការប្រកួតប្រជែងជាសកលកាន់តែខ្លាំងឡើង៕

អត្ថបទ៖ សុខ សុវណ្ណ

ចុចអាន៖ កូរ៉េខាងត្បូង៖ ក្រុងព្យុងយ៉ាងកំពុងត្រៀមបញ្ជូនដ្រូន និងទ័ពឲ្យរុស្ស៊ីទៀតហើយ