ព័ត៌មានអន្ដរជាតិ

ការដឹកឧស្ម័នរបស់រុស្ស៊ីទៅអឺរ៉ុបឆ្លងកាត់អ៊ុយក្រែន ត្រូវបញ្ឈប់ជាផ្លូវការហើយ!

បានផុស

១ year មុន

នៅ

ថ្ងៃព្រហស្បតិ៍ ២ មករា ២០២៥

ដោយ

Chheang

រដ្ឋាភិបាលក្រុងកៀវ កាលពីថ្ងៃទី១ខែមករាឆ្នាំ២០២៥បានបញ្ឈប់ការផ្គត់ផ្គង់ឧស្ម័នរបស់រុស្ស៊ីដល់អតិថិជនរបស់ខ្លួននៅអឺរ៉ុបតាមរយៈបណ្តាញបំពង់បង្ហូរប្រេងឆ្លងកាត់ទឹកដីអ៊ុយក្រែន បន្ទាប់ពីកិច្ចព្រមព្រៀងនៅមុនពេលសង្គ្រាមបានផុតកំណត់នៅចុងឆ្នាំ២០២៤។

ត្បិតតែរុស្ស៊ីលុកលុយអ៊ុយក្រែនក្នុងខែកុម្ភៈឆ្នាំ២០២២ ឧស្ម័នធម្មជាតិរុស្ស៊ីនៅតែបន្តបង្ហូរតាមបណ្តាញបំពង់បង្ហូរប្រេងរបស់អ៊ុយក្រែន ទៅកាន់អឺរ៉ុប ក្រោមកិច្ចព្រមព្រៀងរយៈពេល៥ឆ្នាំ។ បំពង់បង្ហូរប្រេងនេះ ត្រូវបានបង្កើតឡើងនៅពេលដែលអ៊ុយក្រែន និងរុស្ស៊ីជាផ្នែកមួយនៃសហភាពសូវៀត។

ក្រុមហ៊ុនថាមពលរដ្ឋរបស់រុស្ស៊ី Gazprom អាចរកចំណូលពីឧស្ម័នរបស់ខ្លួន ហើយអ៊ុយក្រែនវិញទទួលបានចំណូលនៅលើថ្លៃដឹកជញ្ជូន។

រដ្ឋមន្ត្រីថាមពលរបស់អ៊ុយក្រែន លោក Herman Halushchenko បានបញ្ជាក់ថា ក្រុងកៀវ បានបញ្ឈប់ការដឹកឧស្ម័ននេះ គឺដើម្បីផលប្រយោជន៍សន្តិសុខជាតិ។

លោក Halushchenko បាននិយាយថា៖ «នេះជាព្រឹត្តិការណ៍ប្រវត្តិសាស្ត្រ។ រុស្ស៊ីកំពុងបាត់បង់ទីផ្សារ ហើយនឹងខាតបង់ហិរញ្ញវត្ថុ។ អឺរ៉ុបបានសម្រេចចិត្តរួចជាស្រេចក្នុងការបញ្ឈប់ឧស្ម័នរុស្ស៊ី ហើយនេះស្របតាមអ្វីដែលអ៊ុយក្រែនបានធ្វើនៅថ្ងៃនេះ»។

នៅក្នុងកិច្ចប្រជុំកំពូលនៅទីក្រុងប្រ៊ុចសែលកាលពីខែធ្នូ ប្រធានាធិបតីអ៊ុយក្រែនលោក Volodymyr Zelenskyy បានប្តេជ្ញាថា ទីក្រុងកៀវ នឹងមិនអនុញ្ញាតឲ្យទីក្រុងមូស្គូប្រើប្រាស់មធ្យោបាយដឹកជញ្ជូន ដើម្បីរកប្រាក់បាន «រាប់ពាន់លានលើញើសឈាម និងជីវិតប្រជាជន» អ៊ុយក្រែនឡើយ។ ទោះជាយ៉ាងណាក៏ដោយ មេដឹកនាំអ៊ុយក្រែនបាននិយាយដោយសង្ខេបថា លទ្ធភាពនៃលំហូរឧស្ម័នគឺនៅអាចបន្តទៀត បើការទូទាត់ទៅឲ្យរុស្ស៊ីត្រូវបានរារាំងរហូតដល់សង្រ្គាមត្រូវបានបញ្ចប់។

មុនពេលសង្រ្គាម រុស្ស៊ីបានផ្គត់ផ្គង់ជិត ៤០% នៃឧស្ម័នធម្មជាតិរបស់សហភាពអឺរ៉ុប។ ឧស្ម័នទាំងនោះ ត្រូវបានបង្ហូរតាមបណ្ដាញបំពង់ចំនួន៤ ដោយមួយនៅក្រោមសមុទ្របាល់ទិក មួយឆ្លងកាត់បេឡារុសនិងប៉ូឡូញ មួយឆ្លងកាត់អ៊ុយក្រែន និងមួយទៀតនៅក្រោមសមុទ្រខ្មៅឆ្លងកាត់ពីតួកគីទៅកាន់ប៊ុលហ្គារី។

លុះបន្ទាប់ពីសង្គ្រាមបានចាប់ផ្តើម រុស្ស៊ីបានកាត់ផ្តាច់ការផ្គត់ផ្គង់ភាគច្រើនតាមរយៈបំពង់បង្ហូរប្រេងបាល់ទិក និងបេឡារុស-ប៉ូឡូញ ដោយលើកឡើងពីជម្លោះលើតម្រូវការសម្រាប់ការទូទាត់ជាប្រាក់រូប្លិ៍។ បំពង់បង្ហូរប្រេងបាល់ទិក ត្រូវបានបំផ្ទុះនៅក្នុងការវាយប្រហារមួយ។

ការកាត់ផ្តាច់របស់រុស្ស៊ី បណ្តាលឲ្យមានវិបត្តិថាមពលនៅអឺរ៉ុប។ អាល្លឺម៉ង់ បានចំណាយប្រាក់រាប់ពាន់លានអឺរ៉ូ បង្កើតស្ថានីយបណ្តែតទឹក ដើម្បីនាំចូលឧស្ម័នធម្មជាតិរាវដែលដឹកតាមកប៉ាល់ មិនមែនតាមបំពង់បង្ហូរប្រេងទេ។ ចំនួនអ្នកប្រើប្រាស់បានធ្លាក់ចុះនៅពេលតម្លៃបានកើនឡើង។ ដោយឡែក ប្រទេសន័រវែស និងសហរដ្ឋអាមេរិក បានដណ្ដើមក្ដាប់យកចំណែកទីផ្សារឧស្ម័នធម្មជាតិមួយផ្នែកធំជំនួសរុស្ស៊ី ដែលនាំឲ្យប្រទេសទាំង២បានក្លាយជាអ្នកផ្គត់ផ្គង់ធំបំផុតនៅលើពិភពលោក៕

ដោយ៖ ឈាង