មហាអំណាចអឺរ៉ុប២ប្រទេស ចេញមុខព្រមានលោក ត្រាំ ក្រោយគំរាមប្រើកម្លាំងយោធា ដណ្តើមយក Greenland 

ក្រោយពេលលោក ដូណាល់ ត្រាំ គំរាមប្រើកម្លាំងយោធាដើម្បីយកតំបន់ Greenland នោះស្រាប់តែពេលនេះ មហាអំណាចអឺរ៉ុប២ប្រទេសគឺអាល្លឺម៉ង់និងបារាំង បានចេញមុខព្រមាន ប្រធានាធិបតីជាប់ឆ្នោតអាមេរិករូបនេះចំៗតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC កាលពីថ្ងៃពុធទី៨ខែមករាឆ្នាំ២០២៥, អធិការបតីអាល្លឺម៉ង់លោក Olaf Scholz និយាយថា «គោលការណ៍មិនរំលោភព្រំដែនប្រទេសដទៃ ត្រូវតែអនុវត្តចំពោះគ្រប់ប្រទេសមិនថានោះគឺជាប្រទេសតូច ឬប្រទេសមានអំណាចក៏ដោយ។ យើងពិតជាមិនយល់ទាល់តែសោះអំពីសេចក្តីថ្លែងការណ៍ ចេញពីមាត់រដ្ឋបាលសហរដ្ឋអាមេរិកអាណត្តិថ្មី»។ 

ទន្ទឹមនោះ បារាំងក៏ប្រតិកម្មខ្លាំងៗដែរ ដោយរដ្ឋមន្ត្រីការបរទេសលោក Jean-Noël Barrot បានប្រាប់វិទ្យុ France Inter ថា «សហភាព​អឺរ៉ុប​មិន​គួរ​ឲ្យ​គេ​បំភិត​បំភ័យបានឡើយ។ អឺរ៉ុប​គួរ​តែ​ភ្ញាក់​ខ្លួននិង​ពង្រឹងកម្លាំង។ អឺរ៉ុបនឹងមិនបណ្តោយឲ្យប្រទេសផ្សេង វាយប្រហារលើព្រំដែនអធិបតេយ្យរបស់ខ្លួនទេ ទោះពួកគេជានរណាក៏ដោយ។ យើងជាទ្វីបដ៏រឹងមាំ»។

នេះគឺជាការឆ្លើយតបទៅលោក ត្រាំ ដែលបានគំរាមចេញពីសន្និសីទសារព័ត៌មាននៅ Mar-a-Lago កាលពីថ្ងៃអង្គារទី៧ខែមករាឆ្នាំ២០២៥ថា មិនមែនតែ Greenland ទេ លោកក៏អាចប្រើកម្លាំងយោធាឬវិធានការសេដ្ឋកិច្ច ដើម្បីយកព្រែកជីកបាណាម៉ា មកគ្រប់គ្រងផងដែរ។

លោកនិយាយដោយចំហថា «យើងត្រូវការពួកគេសម្រាប់សន្តិសុខសេដ្ឋកិច្ច។ វាចាំបាច់ណាស់សម្រាប់សន្តិសុខរបស់អាមេរិក។ Greenland មានសារៈសំខាន់ផ្នែកយោធា ដើម្បីតាមដាននាវាចិននិងរុស្ស៊ី។ ខ្ញុំកំពុងនិយាយអំពីការការពារពិភពលោកសេរី»។

សូមបញ្ជាក់ថា Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ។

វាស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ចំនួន​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ កោះដ៏ធំបំផុតរបស់ពិភពលោក​មួយ​នេះ មានរដ្ឋធានីនៅជិតទីក្រុងញូវយ៉ក ជាងរដ្ឋធានីកូប៉ិនហាករបស់ដាណឺម៉ាក ហើយ​សម្បូរ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក៕

អត្ថបទ៖ សុខ សុវណ្ណ

ចុចអាន៖ ត្រាំ គំរាម អាចប្រើកម្លាំងយោធា ដើម្បីយកដែនដី Greenland មកគ្រប់គ្រង