ចំណាប់ខ្មាំង៣៣​នាក់ នឹង​ត្រូវ​ក្រុម​ហាម៉ាស​ដោះលែង ​ក្នុង​ដំណាក់​កាល​ដំបូង​នៃ​កិច្ច​ព្រមព្រៀង

ក្នុងដំណាក់កាលដំបូងនៃកិច្ចព្រមព្រៀងបទឈប់បាញ់ដែលកំពុង​​ចរចា​នៅ​រដ្ឋធានី​ដូហា​នៃ​ប្រទេស​កាតា ក្រុមហាម៉ាសត្រូវបានគេរំពឹងថានឹងដោះលែងចំណាប់ខ្មាំងចំនួន ៣៣​នាក់។ នេះ​បើ​យោង​តា​ម​ការ​ចុះ​ផ្សាយ​របស់​​សារព័ត៌មាន CNN ដែល​បាន​ដក​ស្រង់​ប្រភព​ពី​​មន្ត្រីអ៊ីស្រាអែល២​រូប។

មន្ត្រីជាន់ខ្ពស់អ៊ីស្រាអែល​ម្នាក់ បានប្រាប់​កាលពីថ្ងៃចន្ទ​ទី​១៣​ខែ​មករា​ឆ្នាំ​២០២៥ថា ភាគច្រើននៃចំណាប់ខ្មាំងទាំង ៣៣​នាក់​អាច​នៅរស់រានមានជីវិត ប៉ុន្តែសាកសពចំណាប់ខ្មាំងដែលបានស្លាប់ក៏ទំនងជាស្ថិតក្នុងចំណោមអ្នកដែល​ត្រូវ​ដោះលែងក្នុងអំឡុងពេលបទឈប់បាញ់ដំបូងរយៈពេល ៤២​ថ្ងៃ​ផង​ដែរ។

បើយោងតាមរដ្ឋាភិបាលអ៊ីស្រាអែល ចំណាប់​ខ្មាំង​ចំនួន ៩៤​នាក់​នៅ​តែ​ស្ថិត​​ក្នុង​កណ្ដាប់​ដៃក្រុម​ហាម៉ាស និង​បក្ខពួក ក្រោយ​ការ​វាយ​ប្រហារ​ថ្ងៃ​ទី​៧​ខែ​តុលា​ឆ្នាំ​២០២៣ ដែល​យ៉ាង​ហោច​ណាស់ ៣៤​នាក់​ក្នុង​ចំណោម​នោះ​បាន​បាត់បង់​ជីវិត​​រួច​ទៅ​ហើយ។

មន្ត្រីជាន់ខ្ពស់អ៊ីស្រាអែល បាន​បន្ថែម​ថា ភាគីនានាហាក់ដូចជាជិត​ឈាន​ដល់កិច្ចព្រមព្រៀងមួយ ហើយថា អ៊ីស្រាអែលបានត្រៀមខ្លួនដើម្បីអនុវត្តកិច្ចព្រមព្រៀងភ្លាមៗនៅពេលដែលវាត្រូវបានចុះហត្ថលេខា។

ប្រធានាធិបតីអាមេរិកលោក ចូ បៃដិន បានសម្តែងសុទិដ្ឋិនិយមស្រដៀងគ្នានៅក្នុងសុន្ទរកថាមួយកាលពីថ្ងៃចន្ទដែលផ្តោតលើគោលនយោបាយការបរទេស ដោយនិយាយថា សហរដ្ឋអាមេរិកកំពុង «សង្កត់យ៉ាងខ្លាំងដើម្បីបញ្ចប់​រឿងនេះ»។

លោក បៃដិន បាន​រៀបរាប់​ថា៖ «កិច្ចព្រមព្រៀងដែលយើងបានរៀបចំនឹងដោះលែងចំណាប់ខ្មាំង បញ្ឈប់ការប្រយុទ្ធគ្នា ផ្តល់សន្តិសុខដល់អ៊ីស្រាអែល និងអនុញ្ញាតឲ្យ​យើងបង្កើនជំនួយមនុស្សធម៌យ៉ាងសំខាន់ដល់ប៉ាឡេស្ទីនដែលបានរងទុក្ខយ៉ាងធ្ងន់ធ្ងរនៅក្នុងសង្គ្រាមដែលក្រុមហាម៉ាសបានចាប់ផ្តើម»។

អ្នកការទូតម្នាក់ដែលស្និទ្ធនឹងការចរចា បានប្រាប់ CNN ថា ដំណាក់​កាល​ចុងក្រោយនៃកិច្ចចរចាដើម្បីបញ្ចប់បញ្ហា​នានា គ្រោងនឹងធ្វើឡើងនៅទីក្រុងដូហានៅថ្ងៃអង្គារ​នេះ។ នៅថ្ងៃដដែល គ្រួសារចំណាប់ខ្មាំងមួយចំនួនត្រូវបានអញ្ជើញឲ្យ​ជួបនាយករដ្ឋមន្ត្រីអ៊ីស្រាអែលលោក Benjamin Netanyahu។

លោក Qadura Fares ប្រធានគណៈកម្មការប៉ាឡេស្ទីនសម្រាប់អ្នកជាប់ឃុំ និងអតីតអ្នកជាប់ឃុំ បានប្រាប់ CNN ថា លោកកំពុងធ្វើដំណើរទៅកាន់ទីក្រុងដូហា ដើម្បីណែនាំអ្នកចរចាអំពីបញ្ជីឈ្មោះអ្នកជាប់ឃុំដែលត្រូវដោះលែង «ក្នុងករណីដែលកិច្ចព្រមព្រៀងសម្រេចបាន»៕

ដោយ៖ ឈាង