ព័ត៌មានអន្ដរជាតិ

តុលាការថៃបើកផ្លូវឲ្យ ថាក់ស៊ីនចេញក្រៅប្រទេសបាន ក្រោយបង្ហាញវត្តមានសាធារណៈច្រើន

បានផុស

១ year មុន

នៅ

ថ្ងៃសៅរ៍ ១ កុម្ភៈ ២០២៥

ដោយ

តុលាការថៃកាលពីថ្ងៃសុក្រទី៣១មករា បានបើកផ្លូវឱ្យអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា អាចចាកចេញពីប្រទេស ដែលជាករណីលើកលែងដ៏កម្រមួយសម្រាប់ចុងចោទដែលប្រឈមនឹងការចោទប្រកាន់ពីបទប្រមាថព្រះមហាក្សត្រ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១ខែកុម្ភៈនេះ។

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដែលបច្ចុប្បន្នមានវ័យ៧៥ឆ្នាំ ត្រូវបានកាត់ទោសឱ្យជាប់ពន្ធនាគាររយៈពេល៨ឆ្នាំពីបទប្រព្រឹត្តអំពើពុករលួយ និងរំលោភអំណាច បន្ទាប់ពីគាត់បានត្រលប់ទៅប្រទេសថៃកាលពី២ឆ្នាំមុន ក្រោយការនិរទេសខ្លួនរយៈពេល១៥ឆ្នាំនោះ។ ប៉ុន្តែ ក្រោយការផ្តន្ទាទោស៦ខែ លោកថាក់ស៊ីនក៏ត្រូវបានព្រះមហាក្សត្រព្រះរាជទានទោសឲ្យ។

កាលពីឆ្នាំមុន លោកថាក់ស៊ីនត្រូវបានចោទប្រកាន់ពីបទប្រមាថព្រះមហាក្សត្រជុំវិញការបញ្ចេញមតិដែលលោកបានធ្វើទៅកាន់ប្រព័ន្ធផ្សព្វផ្សាយកូរ៉េខាងត្បូងកាលពីប្រាំបួនឆ្នាំមុន ហើយនឹងត្រូវប្រឈមមុខនឹងការកាត់ទោសនៅខែកក្កដាឆ្នាំនេះ។ យោងតាមច្បាប់ថៃ ជនជាប់ចោទដែលប្រឈមនឹងការកាត់ទោសត្រូវបន្តនៅក្នុងប្រទេស លុះត្រាតែមានការអនុញ្ញាតពិសេសពីតុលាការ។

កាលពីថ្ងៃសុក្រ តុលាការបានសម្រេចអនុញ្ញាតឱ្យគាត់ចាកចេញ ដោយលើកឡើងពី «អត្ថប្រយោជន៍នៃទំនាក់ទំនងអន្តរជាតិ» ជាហេតុផលសម្រាប់ការចាកចេញរបស់គាត់ជាបណ្តោះអាសន្ន និងមិនបានបញ្ជាក់លម្អិតអំពីគោលបំណងនៃការធ្វើដំណើរក៏ដោយ។

កាលពីខែធ្នូ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានតែងតាំងលោកថាក់ស៊ីន ជាទីប្រឹក្សាអាស៊ានរបស់លោក ខណៈដែលលោកបានធ្វើជាប្រធាននៃប្លុកតំបន់អាស៊ីអាគ្នេយ៍នៅឆ្នាំនេះ។ ទោះបីជាលោក ថាក់ស៊ីន ធ្លាប់បាននិយាយថា លោកនឹងមិនជាប់ពាក់ព័ន្ធក្នុងនយោបាយក៏ដោយ ក៏លោកនៅតែសកម្ម រួមទាំងការធ្វើយុទ្ធនាការឱ្យអតីតគណបក្សភឿថៃផងដែរ។

គួរបញ្ជាក់ថាប្រទេសថៃមានច្បាប់ស្តីពីការប្រមាថព្រះមហាក្សត្រដ៏តឹងរ៉ឹងបំផុតមួយចំនួនក្នុងពិភពលោក ដោយការរិះគន់ព្រះមហាក្សត្រ Maha Vaijralongkorn ឬគ្រួសាររបស់ព្រះអង្គត្រូវផ្តន្ទាទោសដាក់ពន្ធនាគាររហូតដល់ ១៥ ឆ្នាំ។ក្រុមអ្នករិះគន់ និងសិទ្ធិមនុស្សនិយាយថា ច្បាប់នេះបានបំពានសិទ្ធិមនុស្ស និង ដើម្បីរារាំងការជជែកដេញដោលស្របច្បាប់៕