​ថាក់ស៊ីន​​​ប៉ុងប៉ង​ស្តារ​សន្តិភាព​​នៅ​ភាគខាងត្បូង​ប្រទេស​ដែលធ្លាប់​បះបោ​រទាមទារបំបែកខ្លួន​​

ឧបនាយករដ្ឋមន្ត្រីនិង​រដ្ឋមន្ត្រី​ការពារជាតិថៃ លោក Phumtham Wechayachai បានសម្តែងការគាំទ្រចំពោះទស្សនៈរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា ទាក់ទងនឹងការស្តារសន្តិភាពនៅតំបន់ភាគខាងត្បូងនិងបានជំរុញឱ្យក្រុមបះបោរបញ្ឈប់អំពើហិង្សា។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី២៥ខែកុម្ភៈនេះ។

លោក Phumtham ដែលជារដ្ឋមន្ត្រីក្រសួងការពារជាតិផងដែរនោះ បានដកស្រង់សម្តីលោក ថាក់ ស៊ីន ថា ការស្ដារសន្តិភាពនៅក្នុងតំបន់នឹងតម្រូវឱ្យមានកិច្ចសហប្រតិបត្តិការពីប្រទេសម៉ាឡេស៊ី ព្រុយណេ និងឥណ្ឌូណេស៊ី ជាមួយនឹងការអភិវឌ្ឍជាវិជ្ជមានដែលរំពឹងទុកនៅឆ្នាំនេះ។

យោងតាមឧបនាយករដ្ឋមន្ត្រី លោកថាក់ស៊ីនបានទៅបំពេញទស្សនកិច្ចក្នុងតំបន់ក្នុងតួនាទីជាទីប្រឹក្សាក្រៅផ្លូវការរបស់ប្រធានអាស៊ាន ដើម្បីពិភាក្សាអំពីបញ្ហាសន្តិសុខជាមួយមន្ត្រីនៅភាគខាងត្បូងនិងលើកកម្ពស់សហគមន៍ពហុវប្បធម៌សន្តិភាព។ លោក Phumtham បានអះអាងសារជាថ្មីនូវការប្តេជ្ញាចិត្តរបស់រដ្ឋាភិបាលចំពោះដំណើរការសន្តិភាព និងបានជំរុញឱ្យក្រុមបះបោរបញ្ឈប់អំពើហិង្សា និងបង្ហាញពីការប្តេជ្ញាចិត្តចំពោះសន្តិភាព។

អ្វីដែលគួរឲ្យភ្ញាក់ផ្អើលនោះគឺថាលោក Phumtham គាត់បានលេងការបំផ្ទុះគ្រាប់បែកនៅអាកាសយានដ្ឋាន Narathiwat ភ្លាមៗមុនពេលលោក ថាក់ស៊ីន មកដល់កាលពីថ្ងៃអាទិត្យ ដោយ គ្រាប់បែក​នោះបានលាក់នៅក្នុងរថយន្តភីកអាប់របស់អ្នកពន្លត់អគ្គីភ័យដែលចតនៅជិតប៉មបញ្ជានៅអាកាសយានដ្ឋាន Narathiwat ក្នុងសង្កាត់ Muang និងបានផ្ទុះនៅមុនពេលគណៈប្រតិភូរបស់លោកថាក់ស៊ីនបានចុះចតនៅព្រឹកថ្ងៃអាទិត្យ។

គួរបញ្ជាក់ថាដំណើរ​ទស្សនកិច្ច​នេះគឺ​ជា​លើក​ដំបូង​របស់​លោក​ថាក់ស៊ីន​ទៅ​កាន់​តំបន់​នេះ​ចាប់​តាំង​ពី​បាន​ទៅ​ទីនោះ​កាល​លោក​ធ្វើ​ជា​នាយក​រដ្ឋមន្ត្រី​ប្រហែល​ពីរ​ទសវត្សរ៍​មុន។ ក្នុងអំឡុងពេលទស្សនកិច្ចកាលពីថ្ងៃអាទិត្យ អតីតនាយករដ្ឋមន្ត្រីបានរូបនេះបានសុំទោសចំពោះការសម្លាប់រង្គាល Tak Bai នៅ Narathiwat ក្នុងឆ្នាំ ២០០៤ ដែលបានកើតឡើងក្នុងអំឡុងពេលដែលលោកធ្វើជានាយករដ្ឋមន្ត្រី។

ឧប្បត្តិហេតុ Tak Bai ត្រូវបានគេស្គាល់ថាជា ការសម្លាប់រង្គាល Tak Bai គឺជាការស្លាប់ដ៏ធំរបស់ជនជាតិម៉ាឡេឥស្លាមចំនួន៨៥ នាក់នៅក្នុងខេត្ត Narathiwat ប្រទេសថៃកាលពីថ្ងៃទី ២៥ ខែតុលា ឆ្នាំ ២០០៤។ ឧប្បត្តិហេតុនេះបានកើតឡើងជាផ្នែកមួយនៃការបះបោររបស់ប្រទេសថៃភាគខាងត្បូងរវាងរដ្ឋាភិបាលថៃ និងក្រុមផ្តាច់ខ្លួនម៉ាឡេម៉ូស្លីម។

ជាមួយគ្នានេះ សមាជិកសភាបក្សប្រជាជន (PP) លោក Romdon Panjor កាលពីថ្ងៃច័ន្ទ បានសាកសួរការសុំទោសរបស់លោកថាក់ស៊ីន ចំពោះឧប្បត្តិហេតុ Tak Bai ដោយលើកឡើងថា ភាពស្មោះត្រង់ទាមទារទាំងពាក្យសម្ដី និងសកម្មភាព បន្ទាប់ពីសំណុំរឿង Tak Bai បានផុតកំណត់នៅក្នុងខែតុលា និងចំពេលមានសំណួរថាតើរដ្ឋាភិបាលដឹកនាំដោយគណបក្សភឿថៃបានធ្វើឲ្យមានយុត្តិធម៌ដែរឬទេ។

លោក Romdon ក៏បានកត់សម្គាល់ផងដែរថា ដំណើរទស្សនកិច្ចរបស់លោក ថាក់ស៊ីន គឺភាគច្រើនផ្ដោតលើបញ្ហានយោបាយ និងសន្តិសុខ ខណៈដែលនាយករដ្ឋមន្ត្រី Paetongtarn Shinawatra និងអ្នកស្នងតំណែងមុនគឺលោកSrettha Thavisin មាននិន្នាការផ្តោតលើការអភិវឌ្ឍន៍សេដ្ឋកិច្ច។ ​

ស្របដំណើរ​​ទស្សនកិច្ច​នេះ អតីត​នាយករដ្ឋ​មន្ត្រី​ថៃ លោក សេដ្ឋា ថាវីស៊ីន បានបង្ហើប​​ពី​​សក្តានុពល​នៃ​ព្រែក​ជីក​​នៅ​ភាគខាងត្បូង​ថៃ ដែល​តភ្ជាប់​ពី​​ឈូង​សមុទ្រ​ថៃ​ទៅ​មហាសមុទ្រឥណ្ឌា ដែល​នឹងចំណេញ​យ៉ាងច្រើន​​​ក្នុងវិស័យសេដ្ឋកិច្ច​៕

អត្ថបទ៖ ប៊ុន សុភាព