ព័ត៌មានអន្ដរជាតិ

ត្រាំ នឹងនិយាយរឿងបែងចែកទឹកដី និងរោងចក្រថាមពល ក្នុងជំនួបលើកទី២ជាមួយ ពូទីន

បានផុស

១ year មុន

នៅ

ថ្ងៃចន្ទ ១៧ មីនា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកនឹងពិភាក្សាជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន នៅថ្ងៃអង្គារទី១៨ខែមីនា អំពីកិច្ចខិតខំប្រឹងប្រែង ដើម្បីបញ្ចប់សង្រ្គាមនៅក្នុងប្រទេសអ៊ុយក្រែន។ លោក ត្រាំ បានបង្ហាញថា ការសន្ទនានឹងស្ដីពី «ការបែងចែកទ្រព្យសម្បត្តិមួយចំនួន» រួមទាំងទឹកដី និងរោងចក្រថាមពលរវាងរុស្ស៊ី និងអ៊ុយក្រែន។

លោក ដូណាល់ ត្រាំ និងលោក វ៉្លាឌីមៀរ ពូទីន (រូបថត៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅលើយន្តហោះ Air Force One ក្នុងអំឡុងដំណើរត្រឡប់ពីរដ្ឋ Florida ទៅកាន់រដ្ឋធានីវ៉ាស៊ីនតោនឌីស៊ី លោក ត្រាំ បានប្រាប់ថា៖ «ខ្ញុំនឹងនិយាយទៅកាន់ប្រធានាធិបតី ពូទីន នៅថ្ងៃអង្គារ។ យើងចង់ឃើញថាតើយើងអាចបញ្ចប់សង្គ្រាមនេះដែរឬទេ។ ប្រហែលជាយើងអាច ហើយក៏ប្រហែលជាយើងមិនអាច ប៉ុន្តែខ្ញុំគិតថា យើងមានឱកាសល្អណាស់»។

នៅពេលត្រូវបានសួរអំពីសម្បទានអ្វីខ្លះដែលកំពុងត្រូវបានពិចារណានៅក្នុងបទឈប់បាញ់ លោក ត្រាំ បានលើកឡើងថា៖ «យើងនឹងនិយាយអំពីទឹកដី។ យើងនឹងនិយាយអំពីរោងចក្រថាមពល។ ខ្ញុំគិតថា យើងមានការពិភាក្សាជាច្រើនរួចទៅហើយដោយភាគីទាំងពីរ គឺអ៊ុយក្រែន និងរុស្ស៊ី។ យើងកំពុងនិយាយរួចមកហើយអំពីរឿងនោះ គឺការបែងចែកទ្រព្យសម្បត្តិមួយចំនួន»។

បើតាមបេសកជនពិសេសរបស់សហរដ្ឋអាមេរិក លោក Steve Witkoff ជំនួបរវាងមេដឹកនាំអាមេរិក និងរុស្ស៊ី នឹងធ្វើឡើងតាមរយៈការហៅទូរសព្ទ ដូចទៅនឹងកិច្ចពិភាក្សាលើកដំបូងកាលពីថ្ងៃទី១២ខែកុម្ភៈ ក្នុងគោលបំណងធ្វើអន្តរការីបទឈប់បាញ់។

ពាក់ព័ន្ធនឹងជំនួបនេះដែរ ប្រព័ន្ធផ្សព្វផ្សាយរុស្ស៊ី បានរាយការណ៍កាលពីចុងសប្តាហ៍ថា លោក ពូទីន នឹងបដិសេធអំពីការចូលរួមរបស់អ៊ុយក្រែននៅក្នុងអង្គការណាតូសម្រាប់លក្ខខណ្ឌនៃកិច្ចព្រមព្រៀងបទឈប់បាញ់ណាមួយ។ ទន្ទឹមនោះ លោកក៏នឹងនៅតែប្រឆាំងចំពោះដាក់ពង្រាយកងរក្សាសន្តិភាពពីប្រទេសណាតូនៅលើទឹកដីអ៊ុយក្រែនផងដែរ៕

ដោយ៖ ឈាង