ព័ត៌មានអន្ដរជាតិ

ហ្សេលេនស្គី៖ យើងមិនមែនជាសាឡាដលើម៉ឺនុយរបស់ ពូទីន យើងគឺជារដ្ឋឯករាជ្យ

បានផុស

៣ ខែ មុន

នៅ

ថ្ងៃពុធ ១៩ មីនា ២០២៥

ដោយ

Chheang

ក្រោយការហៅទូរសព្ទរវាងមេដឹកនាំអាមេរិក និងសមភាគីរុស្ស៊ីជុំវិញបទឈប់បាញ់នៅប្រទេសអ៊ុយក្រែន លោក វ៉ូឡូឌីមៀរ ហ្សេលេនស្គី បាននិយាយថា អ៊ុយក្រែន និងអឺរ៉ុប ត្រូវតែរួមបញ្ចូលនៅក្នុងការចរចានាពេលអនាគតទាំងអស់ ទាក់ទងនឹងវិធានការបញ្ចប់សង្គ្រាមរយៈពេល៣ឆ្នាំ។

លោក វ៉ូឡូឌីមៀរ ហ្សេលេនស្គី (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បានលើកឡើងកាលពីថ្ងៃទី១៨ខែមីនាថា៖ «ខ្ញុំមិនចង់ធ្វើឲ្យនរណាម្នាក់អាក់អន់ចិត្តទេ ប៉ុន្តែខ្ញុំមិនចង់ឲ្យពួកយើងនៅក្នុងម៉ឺនុយមុខម្ហួបរបស់ ពូទីន»។

ប្រធានាធិបតីអ៊ុយក្រែន បានបន្ថែមថា៖ «យើងមិនមែនជាសាឡាដ… យើងជារដ្ឋឯករាជ្យ។ បើគ្មានយើង ខ្ញុំគិតថាវាខុសនៅក្នុងការចរចា»។

លោក ហ្សេលេនស្គី ក៏បានបញ្ជាក់ផងដែរថា៖ «អឺរ៉ុបត្រូវតែនៅតុចរចា ហើយអ្វីគ្រប់យ៉ាងដែលទាក់ទងនឹងសន្តិសុខអឺរ៉ុបត្រូវតែសម្រេចរួមគ្នាជាមួយអឺរ៉ុប»។

ក្នុងការហៅទូរសព្ទជាមួយលោក ដូណាល់ ត្រាំ ប្រធានាធិបតីរុស្ស៊ីលោក វ៉្លាឌីមៀរ ពូទីន បានប្រាប់ថា លោកបានត្រៀមខ្លួនដើម្បីទទួលយកការផ្អាករយៈពេល ៣០ថ្ងៃលើការវាយប្រហារទាំងអស់ដែលផ្តោតលើហេដ្ឋារចនាសម្ព័ន្ធថាមពល។ នេះគឺជាសំណើដែលលោក ហ្សេលេនស្គី បានបង្ហាញថា លោកយល់ព្រមទទួលយក នៅពេលដែលអ៊ុយក្រែនត្រូវបានផ្តល់ព័ត៌មានលម្អិតរួចរាល់។

បន្ទាប់ពីជំនួបតាមទូរសព្ទ សេតវិមាន និងវិមានក្រឹមឡាំង បានចេញសេចក្តីថ្លែងការណ៍ដាច់ដោយឡែក ដោយបញ្ជាក់ពីផែនការរៀបចំការចរចាសន្តិភាពនៅមជ្ឈិមបូព៌ា។ កិច្ចពិភាក្សា នឹងផ្តោតលើបទឈប់បាញ់លើវិស័យថាមពល និងជំហានឆ្ពោះទៅរកការអនុវត្តបទឈប់បាញ់ដែនទឹកនៅសមុទ្រខ្មៅ។

លោក ហ្សេលេនស្គី បាននិយាយថា អ៊ុយក្រែនគាំទ្ររាល់សំណើដែលនាំទៅរកសន្តិភាពយុត្តិធម៌ តែមិនត្រូវដកអ៊ុយក្រែនចេញពីការចរចាទាំងនេះទេ។

លោកថា៖ «យើងត្រូវតែយល់ពីអ្វីដែលកំពុងកើតឡើង។ ដោយសារតែនៅក្នុងសង្រ្គាមនេះមានភាគីពីរ គឺរុស្ស៊ីនិងអ៊ុយក្រែន។ ហើយដោយគ្មានអ៊ុយក្រែនសម្រាប់ខ្ញុំ វាហាក់ដូចជាគ្មានសង្ឃឹមក្នុងការចរចាឡើយ»៕

ដោយ៖ ឈាង