ជំនួយការលោកហ្សេលេនស្គី៖ អ៊ុយក្រែន ត្រូវការទ័ពប្រយុទ្ធ ជាងកងរក្សាសន្តិភាព

លោក Igor Zhovkva ដែលជាជំនួយការជាន់ខ្ពស់របស់ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបញ្ជាក់ច្បាស់ៗទៅអឺរ៉ុបថា ទីក្រុងកៀវ ត្រូវការទ័ពប្រយុទ្ធ ជាជាងកងរក្សាសន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃព្រហស្បតិ៍ទី២៧ខែមីនាឆ្នាំ២០២៥, លោកនិយាយថា «យើងត្រូវការទ័ពដែលទទួលបានការបណ្តុះបណ្តាលដើម្បីត្រៀមប្រយុទ្ធ។ មិនមែនមានន័យថា ទាំងនោះគឺជាកងទ័ពដែលត្រៀមទៅប្រយុទ្ធជាមួយរុស្ស៊ីទេ ប៉ុន្តែជាកងទ័ពដែលត្រៀមខ្លួនការពារ និងអាចកំញើញសត្រូវបាន»។

សម្តីរបស់លោក Zhovkva កើតឡើងមុនពេលថ្នាក់ដឹកនាំអន្តរជាតិ ជួបប្រជុំគ្នាក្នុងទីក្រុងប៉ារីស ដើម្បីពិភាក្សាអំពីក្រុមចម្រុះមួយដែលមានការចូលរួមទាំងពីសំណាក់អឺរ៉ុបនិងប្រទេសក្រៅពីនេះ ដើម្បីដាក់ទ័ពទៅអ៊ុយក្រែន ក្នុងនាមជាកងរក្សាសន្តិភាព នៅពេលទីក្រុងកៀវនិងមូស្គូ ឈានដល់កិច្ចព្រមព្រៀងសន្តិភាព ពន្លត់ភ្លើងសង្គ្រាមអាយុកាលជាង៣ឆ្នាំ។

និយាយអំពីក្រុមចម្រុះនេះ, នាយករដ្ឋមន្ត្រីអង់គ្លេស Keir Starmer ប្រកាសថា ប្រទេសរបស់លោកនិងបារាំង នឹងជាអ្នកដឹកនាំ ដើម្បីធានាសន្តិសុខនៅអ៊ុយក្រែន។

យ៉ាងណាចំពោះផែនការនេះ ទីក្រុងមូស្គូបានបញ្ចេញប្រតិកម្មខ្លាំងៗរួចហើយ ដោយចោទប្រកាន់ថា អឺរ៉ុបកំពុងចាក់សាំងលើភ្លើង បញ្ឆេះស្ថានការណ៍ឲ្យកាន់តែក្តៅ ហើយថែមទាំងគំរាមសងសឹកទៀតផង។

លើសពីនេះ រុស្ស៊ីព្រមានថា បើអង្គការណាតូដាក់កងរក្សាសន្តិភាពនៅប្រទេសអ៊ុយក្រែនមែននោះ វានឹងបង្កឲ្យមានសង្គ្រាមធំរវាងប្លុកយោធាដឹកនាំដោយអាមេរិក ជាមួយរុស្ស៊ីជាក់ជាមិនខានឡើយ។

អនុប្រធានក្រុមប្រឹក្សាសន្តិសុខនិងជាអតីតប្រធានាធិបតីរុស្ស៊ី លោក Dmitry Medvedev បានព្រមានថា នាយករដ្ឋមន្ត្រីអង់គ្លេសនិងប្រធានាធិបតីបារាំង ពិតជាឆោតល្ងង់ណាស់។ ពួកគេចង់បញ្ជូនទ័ពនិងជំនួយយោធាទៅឲ្យរដ្ឋណាស៊ីសម័យទំនើបនៅទីក្រុងកៀវ។ នោះមានន័យថា សង្គ្រាមជាមួយណាតូនឹងផ្ទុះឡើង៕

អត្ថបទ៖ សុខ សុវណ្ណ

ចុចអាន៖ អង់គ្លេសនិងបារាំង ប្រកាសដឹកនាំក្រុមចម្រុះ ដាក់ទ័ពទៅអ៊ុយក្រែន ទោះគ្មានអាមេរិក