ព័ត៌មានអន្ដរជាតិ

ចិន ប្រកាសកាត់បន្ថយការចាក់បញ្ចាំងកុនហូលីវូដ

បានផុស

៦ ថ្ងៃ មុន

នៅ

ថ្ងៃសុក្រ ១១ មេសា ២០២៥

ដោយ

Chheang

រដ្ឋាភិបាលក្រុងប៉េកាំង បានប្រកាសកាលពីថ្ងៃព្រហស្បតិ៍ទី១០ខែមេសាឆ្នាំ២០២៥ថា ខ្លួននឹងកាត់បន្ថយចំនួនភាពយន្តអាមេរិកដែលត្រូវបានអនុញ្ញាតឲ្យចាក់បញ្ចាំងនៅក្នុងប្រទេសចិន។ ចំណាត់ការនេះ ធ្វើឡើងដើម្បីជាការឆ្លើយតបដោយផ្ទាល់ទៅនឹងប្រធានាធិបតីអាមេរិក ដូណាល់ ត្រាំ ដែលបង្កើនពន្ធគយលើចិនរហូតដល់ ១៤៥%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលភាពយន្តចិន បាននិយាយថា ការកាត់បន្ថយនេះមានគោលបំណង«អនុវត្តតាមច្បាប់ទីផ្សារ គោរពជម្រើសរបស់អ្នកទស្សនា និងកាត់បន្ថយជាមធ្យមនូវចំនួនភាពយន្តដែលបាននាំចូលពីអាមេរិក»។

រដ្ឋបាលភាពយន្តចិន បានបន្ថែមថា៖ «វិធានការខុសរបស់រដ្ឋាភិបាលសហរដ្ឋអាមេរិកក្នុងការបំពានពន្ធគយលើប្រទេសចិន នឹងកាត់បន្ថយចំណង់ចិត្តរបស់ទស្សនិកជនក្នុងស្រុកចំពោះខ្សែភាពយន្តអាមេរិកដោយជៀសមិនរួច»។

យ៉ាងណាមិញ ចំនួនពិតប្រាកដនៃខ្សែភាពយន្តដែលត្រូវកាត់បន្ថយនៅតែមិនទាន់បានបញ្ជាក់ទេ។ ប៉ុន្តែវិធានការរបស់ចិននេះ ទំនងមិនផ្ដល់ផលប៉ះពាល់ខ្លាំងដល់វិស័យភាពយន្តហូលីវូដនោះឡើយ។ ក្នុងរយៈពេលប៉ុន្មានឆ្នាំចុងក្រោយនេះ ទីផ្សារភាពយន្តរបស់អាមេរិកនៅក្នុងប្រទេសចិនបានធ្លាក់ចុះ ដោយនៅលើតារាង Box Office រកបានត្រឹមតែ ៥%ប៉ុណ្ណោះ នៃប្រាក់ចំណូលចាក់បញ្ចាំងកុនសរុបក្នុងឆ្នាំ២០២៤ ខណៈភាពយន្តចិនក្នុងស្រុកបានគ្រប់គ្រងទីផ្សារកាន់តែខ្លាំងឡើង៕

ដោយ៖ ឈាង