អ្នកទោសនយោបាយ​មីយ៉ាន់​ម៉ា​ ២០នាក់ បាន​ស្លាប់ដោយ​សារ​គ្រោះ​រញ្ជួយ​ដី​​​​

គ្រោះរញ្ជួយដីដ៏ខ្លាំងដែលបានវាយប្រហារភាគកណ្តាលប្រទេសមីយ៉ាន់ម៉ាកាលពីថ្ងៃទី២៨​ខែមីនា បានសម្លាប់អ្នកទោសចំនួន៣០​នាក់ រួមទាំងអ្នកទោសនយោបាយ២០ នាក់ និងរបួសជាង ២៨០នាក់ ក្នុង​ចំណោម​​​​​អ្នក​រងគ្រោះ​​រាប់​ពាន់​នាក់​​។ នេះបើយោងតាមការចេញផ្សាយរបស់សារព័ត៌មាន​ The Irrawaddy នៅថ្ងៃទី២២ខែមេសានេះ។

អង្គការចំនួន៧ ដែលជួយអ្នកទោសនយោបាយ​ បានចេញសេចក្តីថ្លែងការណ៍រួមមួយកាលពីថ្ងៃអាទិត្យ ដោយរាយការណ៍​អំពីជនរងគ្រោះដែលជាអ្នកទោសនយោបាយក្នុងហេតុការណ៍រញ្ជួយដី​​ដ៏​វិនាស​កម្ម​​​កាល​​ពី​ខែ​មុន​​។ អ្នកទោសរាប់ពាន់នាក់ រួមទាំងអ្នកទោសនយោបាយរាប់រយនាក់ ដែលរបបយោធា​មីយ៉ាន់ម៉ាចាប់ដាក់ពន្ធ​នាគារ​​ដោយសារ​តែ​សកម្មភាព​ប្រឆាំង​របបសឹក កំពុងត្រូវបានឃុំឃាំងនៅក្នុងពន្ធនាគារ Obo ដែលជាគុកធំទីពីរក្នុងប្រទេសមីយ៉ាន់ម៉ា បន្ទាប់ពីពន្ធនាគារ Insein ទីក្រុង Yangon។

យោងតាមអង្គការទាំងនេះ ក្នុងអំឡុងពេលរញ្ជួយដី អគារ​ពន្ធនាគារមួយ​ចំនួន​បាន​បាក់​រលំ​។ លើសពីនេះរបបយោធាបាន​បិទព័ត៌មានអ្នកទោសស្លាប់ និងរបួសនៅពន្ធនាគារ Obo ហើយអាជ្ញាធរពន្ធនាគារបានគំរាមកំហែងអ្នកទោសនយោបាយដោយធ្វើការផ្លាស់ទីពួកគេ។

យោងតាម បណ្តាញអ្នកទោសនយោបាយមីយ៉ាន់ម៉ា (PPNM)​​ របប​យោធាមីយ៉ាន់​ម៉ាគ្រោងនឹងផ្លាស់ប្តូរអ្នកទោសនយោបាយដែលមិនព្រមស្នាក់នៅអគារដែលរងការខូចខាតទៅពន្ធនាគារ​ Tharyarwaddy ក្នុងតំបន់ Bago ខណៈការផ្លាស់ទីលំនៅបែបនេះនឹងបង្កការលំបាកដល់សាច់ញាតិក្នុងការបញ្ជូនអាហារ និងសម្ភារចាំបាច់ផ្សេងទៀត ដូចជាថ្នាំពេទ្យទៅឱ្យអ្នកទោស។

ក្រុមអង្គការទាំង​នោះ​ក៏​បាន​អំពាវនាវ​ឲ្យ​ក្រុម​សិទ្ធិ​មនុស្ស​អន្តរជាតិ និង​អង្គការ​សហ​ប្រជាជាតិ​យក​ចិត្ត​ទុក​ដាក់​ចំពោះ​លក្ខខណ្ឌ​​ដ៏​យ៉ាប់​យ៉ឺន​របស់​អ្នកទោសនយោបាយផងដែរ ព្រោះអ្នកទោសនយោបាយដែលរងផលប៉ះពាល់ដោយការរញ្ជួយដីមិនបានទទួលជំនួយពីភ្នាក់ងារជំនួយក្នុងស្រុក និងអន្តរជាតិទេ ហើយអ្នករងរបួសមិនថាផ្លូវកាយ ឬផ្លូវចិត្ត មិនទទួលការព្យាបាលត្រឹមត្រូវនៅក្នុងពន្ធនាគារនោះទេ។

យោងតាម​ការ​បញ្ចេញ​​ព័ត៌មាន​របស់​របបយោធា​មីយ៉ាន់​ម៉ា​ ចំនួនអ្នកស្លាប់ពីការរញ្ជួយដីកាលពីថ្ងៃទី ២៨ខែមីនាបានកើនឡើងដល់ ៣៧៣៥នាក់ របួស៥១០៨ នាក់និង ១២០ នាក់ទៀតកំពុងបាត់ខ្លួន​នៅឡើយ​ គិតត្រឹមថ្ងៃអាទិត្យ ។ ប៉ុន្តែ​បើ​យោង​តាម Mizzima News បានរាយការណ៍ថា មានអ្នកស្លាប់​រហូត​ដល់​​៥៣៥២នាក់ របួស ៧១០៨នាក់ និងបាត់ខ្លួន ៥៣៨នាក់៕

អត្ថបទ៖ ប៊ុន សុភាព