ភ្លើងឆេះសណ្ឋាគារនៅឥណ្ឌា សម្លាប់មនុស្សយ៉ាងតិច១៥នាក់

ភ្លើងឆេះសណ្ឋាគារយ៉ាងសន្ធោសន្ធៅក្នុងទីក្រុង Kolkata ប្រទេសឥណ្ឌា សម្លាប់មនុស្សយ៉ាងតិច ១៥ នាក់ ខណៈមានអ្នកខ្លះលោតចេញតាម​បង្អួច និងឡើងលើដំបូលដើម្បីរត់គេចខ្លួន​ពីមហន្តរាយ​​​​ដ៏​សែន​គ្រោះថ្នាក់​នេះ​។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី៣០ខែមេសានេះ។

មេប៉ូលិស Kolkata លោក Manoj Verma បានប្រាប់ AFP ថា ហេតុការណ៍នេះបានកើតឡើងនៅល្ងាចថ្ងៃអង្គារ ខណៈមនុស្សជាច្រើននាក់ទើបតែត្រូវបានជួយសង្គ្រោះចេញពីបន្ទប់ និងដំបូលសណ្ឋាគារនៅថ្ងៃពុធនេះ។ ចំនួនអ្នកស្លាប់បានកើនឡើងដល់ ១៥ នាក់ក្នុងនោះ ក៏​មានកុមារ ២នាក់ និងស្ត្រីម្នាក់ ខណៈការស៊ើបអង្កេតដើម្បីរកមូលហេតុនៃការ​ឆាប​ឆេះនេះកំពុងដំណើរការ។

សណ្ឋាគារ Rituraj ដែលមានភ្ញៀវចំនួន ៨៨នាក់នៅពេលអគ្គីភ័យបានឆាបឆេះ ស្ថិតនៅក្នុងសង្កាត់ពាណិជ្ជកម្មដែលមានការកកស្ទះនៅកណ្តាលទីក្រុង Kolkata ដែលជាទីក្រុងដ៏អ៊ូអរដែលមានប្រជាជនជាង ១៥លាននាក់ គឺជារដ្ឋធានីនៃរដ្ឋ West Bengal។ មនុស្ស​រាប់​សិប​នាក់​បាន​រង​របួស​ដោយ​រលាក​ភ្លើង និង​កំពុង​ទទួល​ការ​ព្យាបាល។

គួរបញ្ជាក់ថា ភ្លើងឆេះអគារជារឿងធម្មតានៅក្នុងប្រទេសឥណ្ឌា ដោយសារកង្វះឧបករណ៍ពន្លត់អគ្គីភ័យ និងការមិនគោរពតាមបទប្បញ្ញត្តិសុវត្ថិភាព។ កាលពីឆ្នាំមុន មនុស្ស ៦នាក់ ក៏បានស្លាប់នៅក្នុងអគ្គិភ័យមួយនៅសណ្ឋាគារមួយនៅ Patna ក្នុងរដ្ឋ Bihar ផងដែរ៕

អត្ថបទ៖ ប៊ុន សុភាព