ឥណ្ឌា ផ្តាំទៅប៉ាគីស្ថានវិញ! បើហ៊ានសងសឹក ខ្លួននឹងបាញ់ថែមទៀត

ស្របពេលស្ថានការណ៍កំពុងក្តៅដូចបាយពុះ ប្រទេសឥណ្ឌាបានផ្តាំទៅប៉ាគីស្ថានវិញថា បើពួកគេហ៊ានសងសឹកវិញនោះ ទីក្រុងញូវដែលីនឹងបន្តបាញ់ថែមទៀត។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះចេញពីមាត់រដ្ឋមន្ត្រីការបរទេសឥណ្ឌា Vikram Misri អំឡុងពេលលោកថ្លែងទៅកាន់ប្រេសិតមកពី១៣ប្រទេស ដែលជួបប្រជុំគ្នាក្នុងទីក្រុងញូវដែលី។

តាមការចុះផ្សាយរបស់ India Today កាលពីថ្ងៃពុធទី៧ខែឧសភាឆ្នាំ២០២៥, លោក Misri គូសបញ្ជាក់ថា ការវាយប្រហាររបស់ឥណ្ឌានេះ មិនមែនជាការបញ្ឆេះជម្លោះអ្វីទេ ប៉ុន្តែគឺជាការឆ្លើយតបទៅអំពើភេរវកម្មដ៏សាហាវនៅតំបន់ Pahalgam ដែលផ្តាច់ជីវិតជនស៊ីវិលចំនួន២៦នាក់។

ទោះបីជាយ៉ាងណាក៏ដោយ លោកព្រមានថា បើភាគីប៉ាគីស្ថាន ពិតជាឆ្លើយតបវិញនោះ ឥណ្ឌាក៏នឹងវាយបកទៅវិញដូចគ្នា។

ការព្រមាននេះកើតឡើងចំពេល នាយករដ្ឋមន្ត្រីប៉ាគីស្ថាន Shehbaz Sharif បានប្តេជ្ញាឆ្លើយតបនិងផ្តាំទៅឥណ្ឌា ឲ្យត្រៀមខ្លួនទទួលការសងសឹកជាមួយកម្លាំងដ៏ខ្លាំងអស្ចារ្យ ចំពោះការដែលទីក្រុងញូវដែលី បើកប្រតិបត្តិការ Sindoor សម្លាប់ជនស៊ីវិល៣១នាក់ កាលពីថ្ងៃពុធទី៧ខែឧសភាឆ្នាំ២០២៥។

ទោះបែបនេះ លោកមិនបញ្ជាក់ពីពេលវេលានិងទីតាំងនៃការសងសឹកនោះទេ ដោយនិយាយថា បើប៉ាគីស្ថានចង់បាញ់ទីណាឬពេលណា គឺស្រេចលើខ្លួន ប៉ុន្តែរដ្ឋមន្ត្រីការពារជាតិប៉ាគីស្ថាន Khawaja Asif លើកឡើងថា ទីក្រុងអ៊ីស្លាម៉ាបាដ ទំនងជានឹងវាយប្រហារតែលើគោលដៅយោធាក្នុងប្រទេសឥណ្ឌាប៉ុណ្ណោះ មិនមែនគោលដៅស៊ីវិលទេ ព្រោះខ្លួនគោរពច្បាប់អន្តរជាតិ៕

អត្ថបទ៖ សុខ សុវណ្ណ

ចុចអាន៖ ឥណ្ឌា ដាក់​ពង្រាយ​មីស៊ីល​​អាកាស​ទំនើបៗ​នៅ​ព្រំដែន​ ក្រោយ​ប៉ាគីស្ថាន​ព្រមាន​សងសឹក