ឥណ្ឌា ដាក់​ពង្រាយ​មីស៊ីល​​អាកាស​ទំនើបៗ​នៅ​ព្រំដែន​ ក្រោយ​ប៉ាគីស្ថាន​ព្រមាន​សងសឹក

ជាការឆ្លើយតបទៅនឹងការកើនឡើងនៃភាពតានតឹងជាមួយប៉ាគីស្ថាន ឥណ្ឌាបានពង្រឹងការការពារព្រំដែនភាគខាងលិចរបស់ខ្លួនយ៉ាងខ្លាំង ដោយការដាក់ពង្រាយមីស៊ីល​ការពារដែនអាកាសចល័ត Igla-S កម្រិតខ្ពស់ (MANPADS) និ​ង​បង្កើន​ទំនើប​កម្ម​​នៃ​​​កងយន្តហោះចម្បាំង Su-30MKI ជាមួយនឹង​​បច្ចេកវិទ្យា​​មីស៊ីល BVR (Beyond Visual Range) និង WVR (Within Visual Range)។

ការដាក់ពង្រាយមីស៊ីល​​ការពារអាកាស Igla-S នេះ​ ធ្វើ​ឡើង​បន្ទាប់​ពី​នាយករដ្ឋមន្ត្រីប៉ាគីស្ថាន Shehbaz Sharif បានប្តេជ្ញាឆ្លើយតបនិងផ្តាំទៅឥណ្ឌា ឲ្យត្រៀមខ្លួនទទួលការសងសឹកជាមួយកម្លាំងដ៏ខ្លាំងអស្ចារ្យ ចំពោះការដែលទីក្រុងញូវដែលី វាយប្រហារឆ្លងដែន សម្លាប់ជនស៊ីវិល៣១នាក់នៅតំបន់កាស្មៀរ កាលពីថ្ងៃពុធទី៧ខែឧសភាឆ្នាំ២០២៥។

កងទ័ពឥណ្ឌា បានទទួល​មីស៊ីល​​ការពារ​ទំនើប​នេះ​​ពី​រុស្ស៊ី ក្នុង​តម្លៃប្រហែល ៣​លានដុល្លារ។ មីស៊ីល​​ការពារ​អាកាស​ជំនាន់ទី៣​ទាំងនេះ ត្រូវបានរចនាឡើងដើម្បីតម្រង់គោលដៅលើយន្តហោះ មីស៊ីល និងយន្តហោះគ្មានមនុស្សបើក ដោយ​បង្កើនសមត្ថភាពការពារដែនអាកាសតាមយុទ្ធសាស្ត្ររបស់ឥណ្ឌា ជាពិសេសនៅតំបន់ Jammu និង​កាស្មៀរ។ ការទិញយក​មីស៊ីល​ការពារ​នេះ បានគូសបញ្ជាក់ពីភាពជាដៃគូយុទ្ធសាស្ត្ររវាងទីក្រុងមូស្គូ និងទីក្រុងញូវដេលី ទោះបីជាមានការដាក់ទណ្ឌកម្មអន្តរជាតិលើប្រទេសរុស្ស៊ីក៏ដោយ។

សូមជម្រាបជាថ្មី នៅថ្ងៃពុធទី៧ខែឧសភាឆ្នាំ២០២៥ ឥណ្ឌាបានបើកប្រតិបត្តិការយោធា «Sindoor» ដោយកំណត់គោលដៅលើជំរំភេរវករនៅក្នុងទឹកដីប៉ាគីស្ថាន ឆ្លើយតបទៅការបាញ់សម្លាប់អ្នកទេសចរហិណ្ឌូ២៦នាក់ នៅតំបន់កាស្មៀរ កាលពីថ្ងៃទី២២ខែមេសា។

ក្នុងការវាយប្រហារទាំងនោះ ឥណ្ឌាអះអាងថា​បានចាយពេលអស់២៥នាទី ហើយកម្ទេចគោលដៅបានយ៉ាងជោគជ័យ។

ជា​ការ​ឆ្លើយ​តប ភាគី​ប៉ាគីស្ថាន​ព្រមាន​ថា​ខ្លួន​នឹង​សងសឹក​ដ៏​ខ្លាំង​ក្លា តែ​មិនបញ្ជាក់ពីពេលវេលានិងទីតាំងនៃការសងសឹកនោះឡើយ។ យ៉ាងណាក៏ដោយ បើយោងតាមរដ្ឋមន្ត្រីការពារជាតិប៉ាគីស្ថាន Khawaja Asif, ទីក្រុងអ៊ីស្លាម៉ាបាដ ទំនងជានឹងវាយប្រហារតែលើគោលដៅយោធាក្នុងប្រទេសឥណ្ឌាប៉ុណ្ណោះ មិនមែនគោលដៅស៊ីវិលទេ ព្រោះខ្លួនគោរពច្បាប់អន្តរជាតិ៕

ដោយ៖ ឈាង

ចុចអាន៖ ប៉ាគីស្ថាន ផ្តាំទៅឥណ្ឌា ឲ្យត្រៀមខ្លួនទទួលការសងសឹក ជាមួយកម្លាំងដ៏ខ្លាំងអស្ចារ្យ