មហាអំណាចអឺរ៉ុប ប្រកូកប្រកាសឲ្យរឹតទណ្ឌកម្មរុស្ស៊ី បើពូទីន នៅតែរឹងមិនព្រមឈប់បាញ់

បណ្តាប្រទេសជាមហាអំណាចអឺរ៉ុបដូចជាបារាំង អង់គ្លេស និងអាល្លឺម៉ង់ បូករួមទាំងប៉ូឡូញផងដែរនោះបានប្រកូកប្រកាសឲ្យមានការដាក់ទណ្ឌកម្មលើរុស្ស៊ីរឹតខ្លាំង ប្រសិនបើលោក ពូទីន មិនព្រមឈប់បាញ់ទេ ប៉ុន្តែក្នុងនោះគេឃើញថា ប្រមុខរដ្ឋាភិបាលទីក្រុងប៉ារីស អេម៉ាញូអែល ម៉ាក្រុង គឺជាអ្នកចេញមុខចេញមាត់ជាងក្នុងការអំពាវនាវឲ្យដាក់សម្ពាធខ្លាំងលើទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅបើមានការឯកភាពគ្នានោះ បទឈប់បាញ់រុស្ស៊ី-អ៊ុយក្រែន នឹងត្រូវចូលជាធរមានចាប់តាំងពីថ្ងៃចន្ទទី១២ខែឧសភាមកម្ល៉េះ ប៉ុន្តែមកដល់ថ្ងៃនេះហើយ គ្មានឃើញសញ្ញាវិជ្ជមានណាមួយលេចចេញសោះ ជាហេតុធ្វើឲ្យអឺរ៉ុបមិនសប្បាយចិត្ត ទើបលោកម៉ាក្រុង អំពាវនាវបែបនេះតែម្តង។

ក្នុងបទសម្ភាសជាមួយទូរទស្សន៍បារាំងកាលពីថ្ងៃពុធទី១៤ខែឧសភាឆ្នាំ២០២៥ លោកម៉ាក្រុងនិយាយថា៖ «គោលដៅរបស់យើងគឺត្រូវដាក់ទណ្ឌកម្មរុស្ស៊ីនៅប៉ុន្មានថ្ងៃខាងមុខនេះ បើទីក្រុងមូស្គូ នៅតែរឹងទទឹងមិនព្រមឈប់បាញ់។ យើងកំពុងពិចារណាលើរឿងនេះ ជាពិសេសផ្តោតសំខាន់លើវិស័យហិរញ្ញវត្ថុ ព្រមទាំងប្រេងនិងឧស្ម័នរបស់រុស្ស៊ី»។

បទសម្ភាសនេះត្រូវបានចាក់ផ្សាយចំពេលគណៈប្រតិភូរុស្ស៊ីនិងអ៊ុយក្រែន ត្រៀមជួបគ្នាក្នុងទីក្រុងអ៊ីស្តង់ប៊ុលនៃប្រទេសតួកគី ដើម្បីចរចាត្រួសត្រាយផ្លូវឈានឆ្ពោះទៅរកសន្តិភាព។

ទោះបីជាយ៉ាងណាក៏ដោយ មិនទាន់ទាំងចាប់ផ្តើមផង កិច្ចប្រជុំកំពូលនេះ បានដួលរលំបាត់ទៅហើយ បន្ទាប់ពីលោក ពូទីន បដិសេធចូលរួម ដែលជំរុញ​ឲ្យ​ប្រធានាធិបតីអាមេរិក ដូណាល់ ត្រាំ និង​មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី ក៏​​ប្រកាស​ដកខ្លួនចេញដែរ។

លោក ហ្សេលេនស្គី បានសម្តែងការខកចិត្តចំពោះការ​បាត់បង់​ឱកាសសម្រាប់កិច្ចចរចាដោយផ្ទាល់​​​នេះ។

ដោយគ្មានវត្តមានលោកពូទីន, វិមានក្រឹមឡាំងបានបង្ហាញឈ្មោះគណៈប្រតិភូដែលនឹងត្រូវទៅជួបចរចាជាមួយភាគីអ៊ុយក្រែន ដោយគណៈប្រតិភូនោះគឺនឹងត្រូវដឹកនាំដោយលោក Vladimir Medinsky ជាជំនួយការប្រធានាធិបតី ហើយក៏មានការចូលរួមពីសំណាក់អនុរដ្ឋមន្ត្រីការបរទេស Mikhail Galuzin, អនុរដ្ឋមន្ត្រីការពារជាតិ Aleksandr Fomin និងមេចារកម្មយោធា Igor Kostyukov ផងដែរ៕

អត្ថបទ៖ សុខ សុវណ្ណ

ចុចអាន៖ កិច្ចប្រជុំកំពូល ពូទីន-ហ្សេលេនស្គី-ត្រាំ មិន​ទាន់​ចាប់​ផ្ដើម​ផង​ក៏​បរាជ័យ​បាត់​ហើយ