នេះជាខ្លឹមសារនៃសំបុត្រ ដែលលោក បៃដិន ទុកឲ្យ ត្រាំ ពេលផុតតំណែង 

ទីបំផុត សារព័ត៌មាន Fox News បានទម្លាយខ្លឹមសារនៃសំបុត្រដែលលោក ចូ បៃដិន បន្សល់ទុកឲ្យលោក ដូណាល់ ត្រាំ នៅក្នុងការិយាល័យអូវ៉ាល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយនៅថ្ងៃព្រហស្បតិ៍ទី២៣ខែមករាឆ្នាំ២០២៥, សំបុត្រនោះមានខ្លឹមសារថា «ជូនចំពោះលោកប្រធានាធិបតី ត្រាំ! ពេលដែលខ្ញុំចេញពីតំណែងដ៏ពិសិដ្ឋនេះទៅ ខ្ញុំសូមជូនពរអ្នកនិងគ្រួសារ ឲ្យជួបតែសេចក្តីសុខក្នុងរយៈពេលបួនឆ្នាំខាងមុខ។ ប្រជាជនអាមេរិកនិងប្រជាជនជុំវិញពិភពលោក រំពឹងចង់បានភាពស្ថិតស្ថេរ ហើយខ្ញុំសូមអធិស្ឋានឲ្យប៉ុន្មានឆ្នាំខាងមុខនេះ ក្លាយទៅជាពេលវេលានៃភាពរុងរឿង សន្តិភាព និងកិត្តិយសសម្រាប់ជាតិរបស់យើង។ សូមព្រះប្រទានពរអ្នក និងដឹកនាំអ្នក ដូចដែលទ្រង់បានប្រទានពរនិងដឹកនាំប្រទេសជាទីស្រឡាញ់របស់យើង ចាប់តាំងពីការបង្កើតមក»។

សូមបញ្ជាក់ជាថ្មី អំឡុងពេលចុះហត្ថលេខាលើបទបញ្ជាប្រតិបត្តិក្នុងការិយាល័យអូវ៉ាល់ លោក ត្រាំ បានឆែកមើលថតតុ ហើយក៏ឃើញសំបុត្រមួយ​ច្បាប់ដែលអតីតប្រធានាធិបតី បៃដិន បន្សល់ទុកឲ្យ។

ដំបូងឡើយលោកមិនចាប់អារម្មណ៍ទេ ប៉ុន្តែលោកស្រាប់តែភ្ញាក់ពេលអ្នកសារព័ត៌មានសួរថា តើលោក បៃដិន មានទុកសំបុត្រឲ្យទេ។ លោកត្រាំឆ្លើយថា «ខ្ញុំមិនដឹងដែរ» រួចក៏បើកថតតុឃើញសំបុត្រមួយច្បាប់មានស្រោមសរសេរលេខ៤៧ (សម្គាល់ជាប្រធានាធិបតីទី៤៧របស់អាមេរិក) ហើយក៏លាន់មាត់ថា «wow»។

ការទុកសំបុត្រជា​លាយលក្ខណ៍​អក្សរ ឲ្យអ្នកស្នងតំណែងនៅក្នុងការិយាល័យអូវ៉ាល់ គឺមិនមែនជារឿងចម្លែកទេសម្រាប់សហរដ្ឋអាមេរិក ព្រោះប្រទេសនេះមានប្រពៃណីដូច្នេះ ជាយូរមកហើយ។  

ប្រពៃណីនេះចាប់ផ្តើមតាំងតែពីឆ្នាំ១៩៨៩មកម្ល៉េះ នៅពេលលោក Ronald Reagan ទុកសំបុត្រមួយច្បាប់ឲ្យលោក George H.W. Bush ដែលសរសេរថា «កុំឲ្យតួកគី បំបាក់ទឹកចិត្តអ្នកឲ្យសោះ» លុះក្រោយមកប្រធានាធិបតីអាណត្តិក្រោយៗ ក៏ធ្វើបែបនេះជាបន្តបន្ទាប់៕

អត្ថបទ៖ សុវណ្ណ

ចុចអាន៖ បៃដិន ទុកសំបុត្រមួយច្បាប់ឲ្យ ត្រាំ នៅក្នុងថតតុ