G7 ប្តេជ្ញាបន្ត​បង្កក​លុយ​របស់​រុស្ស៊ី ទាល់​សង្គ្រាមបញ្ចប់ ហើយអ៊ុយក្រែនទទួលសំណង

នៅក្នុងកិច្ចប្រជុំកំពូល G7 កាល​ពី​ថ្ងៃ​ទី​២២​ខែ​ឧសភា​នៅទីក្រុង Banff ប្រទេសកាណាដា ក្រុម​រដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាលមកពី G7 បានអះអាងសាជាថ្មីនូវការប្តេជ្ញាចិត្តរបស់ពួកគេ ក្នុងការបង្កក​ទ្រព្យសម្បត្តិ​របស់រុស្ស៊ី​រហូតដល់កិច្ចព្រមព្រៀងសន្តិភាពត្រូវបានសម្រេច​នៅអ៊ុយក្រែន ហើយទីក្រុងមូស្គូផ្តល់សំណងសម្រាប់ការខូចខាតដែលទាក់ទងនឹងសង្គ្រាម។

ការសម្រេចចិត្តនេះ គឺជាផ្នែកមួយនៃយុទ្ធសាស្ត្រទូលំទូលាយដើម្បីគាំទ្រដល់កិច្ចខិតខំប្រឹងប្រែងកសាងឡើងវិញរបស់អ៊ុយក្រែន និងរារាំងការឈ្លានពានបន្ថែមទៀត។

សេចក្តីថ្លែងការណ៍ G7 បាន​លើក​ឡើង​ថា «យើងថ្កោលទោស​ការបន្តសង្រ្គាមដ៏ឃោរឃៅរបស់​រុស្ស៊ី ប្រឆាំងនឹង​អ៊ុយក្រែន និងសូមសរសើរចំពោះភាពធន់ដ៏ធំធេងពីប្រជាជន និងសេដ្ឋកិច្ចអ៊ុយក្រែន»។ G7 បានសង្កត់ធ្ងន់ថា អ៊ុយក្រែន​បានរងការបំផ្លិចបំផ្លាញយ៉ាងធ្ងន់ធ្ងរ ចាប់តាំងពីការចាប់ផ្តើមនៃការលុកលុយយ៉ាងពេញទំហឹងក្នុងឆ្នាំ​២០២២។ ក្នុងន័យនេះ G7 បានអះអាងជាថ្មីនូវការគាំទ្រយ៉ាងខ្ជាប់ខ្ជួនរបស់ខ្លួនចំពោះ​អធិបតេយ្យភាព បូរណភាពទឹកដី និងសិទ្ធិ​ជារដ្ឋឯករាជ្យ ដោយកំណត់គោលការណ៍ទាំងនេះថាជាកត្តាចាំបាច់សម្រាប់«សន្តិភាពដ៏ត្រឹមត្រូវ និងយូរអង្វែង»។

G7 បានយល់ព្រមបង្កើតប្រាក់កម្ចីចំនួន ៥០​ពាន់លានដុល្លារសម្រាប់អ៊ុយក្រែន ដោយប្រើប្រាស់ប្រាក់ចំណេញដែលរកបានពី​ប្រាក់​ប្រហែល ៣០០​​ពាន់លានដុល្លារនៅក្នុងទ្រព្យសម្បត្តិរបស់រុស្ស៊ីដែលត្រូវបានកាន់កាប់ជាចម្បងនៅក្នុង​សហភាពអឺរ៉ុប។

ជំហរ​របស់​ក្រុម G7 បាន​ទាញ​ប្រតិកម្ម​ខ្លាំងៗ​ពី​ក្រុង​មូស្គូ។ ប្រធានាធិបតី​រុស្ស៊ី វ្ល៉ាឌីមៀរ ពូទីន កន្លង​មក​បានថ្កោលទោសទង្វើនេះថាជា«ចោរកម្ម» ហើយបានព្រមានអំពីការសងសឹកដែលអាចកើតមាន។ មន្ត្រីរុស្ស៊ីអះអាងថា ការបង្កកទ្រព្យសម្បត្តិនេះខ្វះមូលដ្ឋានច្បាប់ និងរំលោភលើសិទ្ធិអធិបតេយ្យភាព។

ទោះ​មាន​ប្រតិកម្ម​មិន​ពេញ​ចិត្ត​ពី​ភាគី​រុស្ស៊ី​ក៏​​​​ដោយ G7 នៅ​តែ​រក្សា​ជំហរ​​នៅ​ក្នុង​វិធី​សាស្ត្រ​របស់​ខ្លួន។ សេចក្តីថ្លែងការណ៍របស់ G7 លើក​នេះ​បានសង្កត់ធ្ងន់លើសារៈសំខាន់នៃការរក្សាការដាក់ទណ្ឌកម្មផ្នែកហិរញ្ញវត្ថុប្រឆាំងនឹង​រុស្ស៊ី និងធានាថា កិច្ចខិតខំប្រឹងប្រែងកសាងឡើងវិញនាពេលអនាគតនៅ​អ៊ុយក្រែនមិនត្រូវបានកេងប្រវ័ញ្ចដោយប្រទេសដែលបានគាំទ្រទីក្រុងមូស្គូក្នុងអំឡុងពេលជម្លោះនោះទេ៕

ដោយ៖ ឈាង