រុស្ស៊ី ចង្អុលចំមុខ អាល្លឺម៉ង់ ថា កំពុងអុជភ្លើងសង្គ្រាមនៅអ៊ុយក្រែន ឲ្យកាន់តែឆេះ ធំទៅៗ

ក្រោយទីក្រុងបែរឡាំង បើកដៃឲ្យអ៊ុយក្រែន ប្រើអាវុធអង្គការណាតូ បាញ់ចូលជ្រៅក្នុងដីរុស្ស៊ីនោះ ស្រាប់តែវិមានក្រឹមឡាំងបញ្ចេញប្រតិកម្មខ្លាំងៗ ដោយឈានដល់ការព្រមានចំៗថា ប្រទេសអាល្លឺម៉ង់ កំពុងតែបញ្ឆេះស្ថានការណ៍ឲ្យកាន់តែក្តៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យវិមានក្រឹមឡាំង Dmitry Peskov បាននិយាយចំៗថា «ការប្រែក្រឡាស់គោលនយោបាយរបស់ទីក្រុងបែរឡាំងដោយលែងដាក់កំហិតអ៊ុយក្រែនជុំវិញការប្រើប្រាស់អាវុធរយៈចម្ងាយឆ្ងាយប្រឆាំងរុស្ស៊ីទៀតនោះ បានក្លាយទៅជាសញ្ញានៃការពង្រីកជម្លោះឲ្យកាន់តែធំនិងធ្ងន់ធ្ងរហើយ។ បើរឿងនេះជាការពិត វានឹងបំផ្លាញដល់ការប៉ុនប៉ងសម្រាប់ដំណោះស្រាយដោយសន្តិវិធី»។

ទន្ទឹមនោះ លោក Peskov សង្កត់ធ្ងន់ថា រាល់ការសម្រេចចិត្តផ្លាស់ប្តូរជំហរឲ្យអ៊ុយក្រែនប្រើអាវុធរយៈចម្ងាយឆ្ងាយបាញ់ចូលជ្រៅក្នុងដីរុស្ស៊ីនោះ ក៏គួរតែត្រូវមានការអនុម័តនិងសម្របសម្រួលជាផ្លូវការពីសំណាក់សហរដ្ឋអាមេរិកដែរ។

នេះគឺជាការឆ្លើយតបរបស់ភាគីរុស្ស៊ីទៅទីក្រុងបែរឡាំង បន្ទាប់ពីអធិកាបតីអាល្លឺម៉ង់ Friedrich Merz បើកដៃឲ្យអ៊ុយក្រែន យកអាវុធណាតូ វាយប្រហារចូលជ្រៅក្នុងដីរុស្ស៊ី។ 

លោកនិយាយកាលពីថ្ងៃចន្ទទី២៦ខែឧសភាឆ្នាំ២០២៥ថា ពេលនេះទីក្រុងបែរឡាំងនិងខ្នងបង្អែកលោកខាងលិចផ្សេងទៀតរបស់អ៊ុយក្រែន លែងដាក់កំហិតទីក្រុងកៀវ លើការប្រើប្រាស់សព្វាវុធដែលពួកគេជួយទៀតហើយ។ អ៊ុយក្រែនអាចការពារខ្លួនតាមរយៈការវាយប្រហារទីតាំងយោធាក្នុងប្រទេសរុស្ស៊ី ដោយប្រើបានទាំងមីស៊ីលអង់គ្លេស បារាំង អាល្លឺម៉ង់ ឬសហរដ្ឋអាមេរិក។

សូមជម្រាបជាថ្មី ទីក្រុងមូស្គូតែងខឹងសម្បាចំពោះការដែលប្រទេសលោកខាងលិច បើកដៃឲ្យអ៊ុយក្រែន ប្រើអាវុធរបស់ខ្លួន បាញ់ចូលជ្រៅក្នុងដីរុស្ស៊ី ហើយព្រមានថា ការសម្រេចចិត្តបែបនេះ អាចធ្វើឲ្យប្លុកយោធាណាតូ ក្លាយជាភាគីចូលរួមដោយផ្ទាល់នៅក្នុងជម្លោះ៕

អត្ថបទ៖ សុខ សុវណ្ណ

ចុចអាន៖ អាល្លឺម៉ង់ បើកដៃឲ្យអ៊ុយក្រែន យកអាវុធណាតូ វាយប្រហារចូលជ្រៅក្នុងដីរុស្ស៊ី