រុស្ស៊ី ចោទថា សារព័ត៌មានលោកខាងលិច ព្យាយាមផ្សាយ ដើម្បីបំផ្លាញកិច្ចចរចាសន្តិភាព

ថ្លែងទៅកាន់ក្រុមអ្នកកាសែតកាលពីថ្ងៃអង្គារទី២៧ខែឧសភាឆ្នាំ២០២៥ អ្នកនាំពាក្យវិមានក្រឹមឡាំង Dmitry Peskov អះអាងថា បណ្តាសារព័ត៌មានលោកខាងលិចបានព្យាយាមផ្សព្វផ្សាយព័ត៌មានដែលធ្វើឲ្យកិច្ចចរចាសន្តិភាពរុស្ស៊ី-អ៊ុយក្រែន ត្រូវដួលរលំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានសារព័ត៌មាននៅលោកខាងលិចជាច្រើន បានចេញផ្សាយព្រោងព្រាតអំពីទំនាក់ទំនងរុស្ស៊ី-អាមេរិក និងដំណើរការនៃកិច្ចខិតខំប្រឹងប្រែងរបស់ភាគីទាំងឡាយក្នុងការបង្កើតឲ្យមានសន្តិភាព ជាពិសេសកាសែត Politico តែម្តង ដែលផ្សាយថា ប្រធានាធិបតីអាមេរិក ដូណាល់ ត្រាំ កំពុងខឹងសម្បាដោយ​សារតែ ការសម្របសម្រួលរបស់ខ្លួនក្នុងការនាំភាគីជម្លោះឲ្យឈានដល់បទឈប់បាញ់ ហាក់គ្មានបានផលអ្វីសោះ។

ជុំវិញរឿងនេះ លោក Peskov និយាយថា ប្រព័ន្ធផ្សព្វផ្សាយច្រើនណាស់ បានខិតខំធ្វើយុទ្ធនាការបង្អាក់ដំណើរការសន្តិភាព និងញុះឲ្យសហរដ្ឋអាមេរិកដាក់ទណ្ឌកម្មថ្មីលើរុស្ស៊ី ហើយរឿងនេះកាន់តែលាតត្រដាងច្បាស់ទៅៗ។

ការអត្ថាធិប្បាយនេះកើតឡើងបន្ទាប់ពីសារព័ត៌មាន Reuters ចេញផ្សាយថា ត្រាំ ប្រហែលជាដកខ្លួនជាផ្លូវការ ឈប់ជួយដោះស្រាយជម្លោះនេះទៀតហើយ ព្រោះតែការខិតខំរបស់លោក មើលទៅដូចមិនទៅមុខសោះ។

ក្នុងសេចក្តីរាយការណ៍នោះ, Reuters អះអាងថា តាមពិតទៅ លោកត្រាំ បង្ហាញបំណងបែបនេះតាំងតែពីសប្តាហ៍មុនមកម្ល៉េះ ពោលគឺក្នុងអំឡុងពេលសន្ទនាតាមទូរស័ព្ទជាមួយមេដឹកនាំវិមានក្រឹមឡាំង វ្ល៉ាឌីមៀរ ពូទីន ប៉ុន្តែទើបត្រូវសារព័ត៌មានទម្លាយកាលពីថ្ងៃអង្គារទី២៧ខែឧសភាឆ្នាំ២០២៥ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ដាក់ចំៗថា អាល្លឺម៉ង់ កំពុងអុជភ្លើងសង្គ្រាមនៅអ៊ុយក្រែន ឲ្យកាន់តែឆេះ ធំទៅៗ