រុស្ស៊ី បញ្ជាក់កាលបរិច្ឆេទ សម្រាប់កិច្ចចរចាសន្តិភាពថ្មី ជាមួយ អ៊ុយក្រែន

រដ្ឋមន្ត្រីការបរទេសរុស្ស៊ី Sergey Lavrov បានកំណត់យកថ្ងៃចន្ទទី២ខែមិថុនាឆ្នាំ២០២៥ ជាកាលបរិច្ឆេទសម្រាប់ជំនួបចរចាសន្តិភាពថ្មីជាមួយភាគីអ៊ុយក្រែន ហើយទីតាំងរៀបចំគឺនៅតែជាទីក្រុង អ៊ីស្តង់ប៊ុល​ នៃប្រទេសតួកគីដដែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍កាលពីថ្ងៃពុធ លោក Lavrov និយាយថា ចាប់តាំងពីកិច្ចពិភាក្សាកាលពីពាក់កណ្តាលខែឧសភាមក គណៈប្រតិភូរុស្ស៊ីបានរៀបចំឯកសារមួយ ដែលបញ្ជាក់ពីលក្ខខណ្ឌរបស់ខ្លួនសម្រាប់ការសម្រេចបាននូវដំណោះស្រាយយូរអង្វែងចំពោះជម្លោះ។ ប្រមុខគណៈប្រតិភូរុស្ស៊ី លោក Vladimir Medinsky បានត្រៀមខ្លួនរួចជាស្រេច ក្នុងការបង្ហាញឯកសារនេះដល់គណៈប្រតិភូអ៊ុយក្រែន ហើយនឹងបំភ្លឺក្នុងទីក្រុងអ៊ីស្តង់ប៊ុលនៅថ្ងៃចន្ទ ទី២ខែមិថុនាខាងមុខនេះ។

យ៉ាងណាក្តី កាលបរិច្ឆេទខាងលើ មិនទាន់មានការបញ្ជាក់ពីភាគីអ៊ុយក្រែននោះទេ។

រម្លឹកទៅការចរចាកាលពីថ្ងៃទី១៦ខែឧសភា ជំនួបរវាងគណៈប្រតិភូរុស្ស៊ី-អ៊ុយក្រែន បានចាយពេលជិត២ម៉ោង ប៉ុន្តែមិនទទួលបានលទ្ធផលគាប់ប្រសើរ ក្នុងការឈានដល់បញ្ចប់សង្គ្រាមនោះទេ។

ទោះបីជាយ៉ាងណាក៏ដោយ ភាគីទាំងពីរក៏បានសម្រេចលទ្ធផលគួរឲ្យកត់សម្គាល់មួយផងដែរ នោះគឺ ​ការ​ឯកភាពដោះដូរឈ្លើយសឹកគ្នា​​​ម្ខាង ​១ ០០០​​នាក់។

ជំនួបលើកនោះ ត្រូវគេដឹងថា មានការសម្របសម្រួលពីសហរដ្ឋអាមេរិកនិងម្ចាស់ផ្ទះតួកគី ប៉ុន្តែមុននេះប្រមុខសេតវិមាន ដូណាល់ ត្រាំ និយាយថា លោកប្រហែលជាដកខ្លួនជាផ្លូវការ ឈប់ជួយដោះស្រាយជម្លោះនេះទៀតហើយ ព្រោះតែការខិតខំរបស់លោក មើលទៅហាក់ដូចជាគ្មានបានផលអ្វីសោះ។

នេះមិនមែនទើបលើកដំបូងឡើយ ដែលត្រាំ បង្ហើបចង់ដកខ្លួនចេញឈប់ជួយដោះស្រាយបញ្ហាសង្គ្រាមរុស្ស៊ី-អ៊ុយក្រែន ពោលគឺកាលពីខែមេសា ប្រមុខសេតវិមាន ក៏ប្រកាសចង់ដកខ្លួនឈប់ដើរតួនាទីជាអ្នកសម្របសម្រួល ស្វែងរកសន្តិភាពដែរ បើមើលទៅរឿងនេះពិបាកពេក ដោះស្រាយមិនចេញ៕

អត្ថបទ៖ សុខ សុវណ្ណ

ចុចអាន៖ ​រុស្ស៊ី-អ៊ុយក្រែន​​​យល់​ព្រម​​ដោះ​ដូរ​ឈ្លើយសឹក​​​ម្ខាង​១០០​០​នាក់​ ​ប៉ុន្តែ​​គ្មាន​លទ្ធផល​បញ្ចប់សង្គ្រាម​