អ្នកវិភាគអន្តរជាតិបារម្ភថា ការលូកដៃកាន់តែជ្រៅរបស់អាល្លឺម៉ង់ អាចបញ្ឆេះសង្គ្រាមលោកលើកទី៣ 

អាល្លឺម៉ង់ ចាប់ផ្តើមចេញមុខចេញមាត់ខ្លាំងឡើងៗ ជួយអ៊ុយក្រែន ក្នុងការប្រយុទ្ធជាមួយរុស្ស៊ី តាមរយៈការផ្តល់ជំនួយយោធា ជាពិសេសចុងក្រោយបំផុតនេះ ឈានដល់ការបើកដៃឲ្យទីក្រុងកៀវ ប្រើអាវុធលោកខាងលិច បាញ់ចូលជ្រៅក្នុងដីរុស្ស៊ីទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង ជាមួយនឹងការផ្តល់មីស៊ីលរយៈចម្ងាយឆ្ងាយ Taurus ទៅឲ្យទីក្រុងកៀវ, អាល្លឺម៉ង់កំពុងបញ្ឆេះកំហឹងរុស្ស៊ី ធ្វើឲ្យទីក្រុងមូស្គូក្តៅស្លឹកត្រចៀក ដល់ថ្នាក់អ្នកវិភាគអន្តរជាតិចេញមុខព្រមានថា ការលូកដៃកាន់តែជ្រៅរបស់ទីក្រុងបែរឡាំង អាចពង្រីកភ្លើងសង្គ្រាមរុស្ស៊ី-អ៊ុយក្រែន កាន់តែឆេះសន្ធោសន្ធៅ ឈានដល់ផ្ទុះសង្គ្រាមលោកលើកទី៣ទៀតផង។

អ្នកវិភាគភូមិសាស្ត្រនយោបាយនិងសន្តិសុខបូលីវី លោក Jose Hugo Moldiz Mercado បានប្រាប់ សារព័ត៌មាន Sputnik កាលពីថ្ងៃព្រហស្បតិ៍ទី២៩ខែឧសភាឆ្នាំ២០២៥ថា ការសម្រេចចិត្តរបស់អធិកាបតីអាល្លឺម៉ង់ Friedrich Merz ផ្គត់ផ្គង់មីស៊ីល Taurus ទៅឲ្យទីក្រុងកៀវ នឹងពង្រីកជម្លោះរុស្ស៊ី-អ៊ុយក្រែន រីករាលពេញទ្វីបអឺរ៉ុបទាំងមូល ឈានដល់បញ្ឆេះឲ្យមានសង្គ្រាមលោកថ្មីមួយទៀត។ 

លោក Hugo Moldiz និយាយថា «ការអនុញ្ញាតរបស់អធិការបតីអាល្លឺម៉ង់ ឲ្យអ៊ុយក្រែនវាយចូលទឹកដីរុស្ស៊ី គឺជាការជ្រៀតជ្រែករបស់អាល្លឺម៉ង់ដោយប្រយោលពីទស្សនៈវិស័យយោធា និងការជ្រៀតជ្រែកដោយផ្ទាល់ពីទស្សនៈនយោបាយដែលមានគោលបំណងពង្រីកជម្លោះឲ្យរីករាលដាលដល់ទ្វីប ហើយវាច្បាស់ណាស់ថា ជាហានិភ័យដ៏ធំមិនត្រឹមតែសម្រាប់អឺរ៉ុបឬអឺរ៉ាស៊ីប៉ុណ្ណោះទេ ប៉ុន្តែសម្រាប់ពិភពលោកទាំងមូលផងដែរ»។

ទន្ទឹមនោះ ពាក់ព័ន្ធមីស៊ីល Taurus នេះដែរ រុស្ស៊ីព្រមានរួចហើយថា ប្រសិនបើអ៊ុយក្រែន ពិតជាយកមីស៊ីលដែលផ្តល់ឲ្យដោយទីក្រុងបែរឡាំងប្រភេទនេះ ទៅបាញ់ចូលដីរបស់ខ្លួនមែន ទីក្រុងមូស្គូ ក៏ប្រហែលជានឹងវាយប្រហារប្រទេសអាល្លឺម៉ង់ ផងដែរ។

ការគំរាមនេះចេញពីមាត់លោក Andrey Kartapolov ដែលជាប្រធានគណៈកម្មាធិការការពារជាតិនៃសភាជាន់ទាបរុស្ស៊ីនៅក្នុងបទសម្ភាសជាមួយគេហទំព័រ Life.ru កាលពីថ្ងៃព្រហស្បតិ៍ទី២៩ខែឧសភាឆ្នាំ២០២៥។

លោកនិយាយថា៖ «យើងត្រៀមគ្រប់យ៉ាងរួចអស់ហើយ ប្រសិនបើអាល្លឺម៉ង់ ហ៊ានបញ្ជូនមីស៊ីលនេះទៅឲ្យអ៊ុយក្រែនមែន។ អ៊ុយក្រែន មិនចេះប្រើមីស៊ីលនេះទេលុះត្រាតែមានទ័ពអាល្លឺម៉ង់មកជួយធ្វើប្រតិបត្តិការ ដូច្នេះមានន័យថា ទីក្រុងបែរឡាំងនឹងក្លាយជាភាគីចូលដៃដោយផ្ទាល់នៅក្នុងសង្គ្រាមនេះហើយ។ ​យើង​​ត្រៀម​ខ្លួន​ដើម្បី​ស្ទាក់​ចាប់មីស៊ីល​ Taurus, វាយប្រហារ​កន្លែង​បាញ់​បង្ហោះ, អ្នកបញ្ជាបាញ់ ហើយ​បើ​ចាំបាច់ យើងនឹងវាយប្រហារប្រទេសដែលបញ្ជូនមីស៊ីលនេះមកតែម្តង»។

Taurus KEPD 350 គឺជាមីស៊ីលរយៈចម្ងាយឆ្ងាយបាញ់ពីអាកាស ដែលបង្កើតឡើងដោយក្រុមហ៊ុន Taurus Systems GmbH។ មីស៊ីលប្រភេទនេះ ត្រូវបានរចនាឡើងផ្តោតសំខាន់សម្រាប់ការវាយប្រហារច្បាស់ៗ ប្រឆាំងនឹងគោលដៅចូលជ្រៅនៅក្នុងទឹកដីសត្រូវ។

វាមានប្រវែង៥.១ម៉ែត្រ, ប្រវែងស្លាប២.១ម៉ែត្រ, ទម្ងន់ ១ ៤០០គីឡូក្រាម, អាចបំពាក់ក្បាលគ្រាប់បំផ្ទុះពីរដំណាក់ MEPHISTO ទម្ងន់៤៨០គីឡូក្រាម (ធំជាង Storm Shadow)។

Taurus KEPD 350 អាចហោះបានចន្លោះពី៥០០ទៅ៦០០គីឡូម៉ែត្រ ហើយចំពោះតម្លៃវិញ មីស៊ីលនេះមួយគ្រាប់ថ្លៃប្រហែល ១,០៨០,០០០ ដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ រុស្ស៊ី គំរាមវាយអាល្លឺម៉ង់ តែម្តង បើអ៊ុយក្រែន បាញ់មីស៊ីល Taurus ចូលដីខ្លួន