ព័ត៌មានអន្ដរជាតិ

អ៊ុយក្រែននិងប្រទេសដៃគូ ផ្តួចផ្តើមគំនិតថ្មី ដោយបង្កើនការផលិតអាវុធកាន់តែទំនើប

បានផុស

៣២ វិនាទី មុន

នៅ

ថ្ងៃព្រហស្បតិ៍ ៥ មិថុនា ២០២៥

ដោយ

នៅក្នុងកិច្ចប្រជុំរដ្ឋមន្ត្រីការពារជាតិនៃក្រុមប្រទេសទំនាក់ទំនងជួយការពារជាតិអ៊ុយក្រែន (Ukraine Defense Contact Group (UDCG)) នៅក្នុងទីក្រុងប្រ៊ុចសែលនៅថ្ងៃពុធ ក្រុមប្រទេសដៃគូជួយអ៊ុយក្រែនទាំងនេះ និងអ៊ុយក្រែនខ្លួនឯង បានផ្លាស់ប្តូរទៅរកគំនិតផ្តួចផ្តើមថ្មីមួយដែលនឹងបើកឲ្យមានការវិនិយោគលើការផលិតអាវុធកាន់តែទំនើប យន្តហោះគ្មានមនុស្សបើក ទាំងក្នុងប្រទេសអ៊ុយក្រែន និងក្នុងប្រទេសជាដៃគូ។

រដ្ឋមន្ត្រីការពារជាតិអ៊ុយក្រែន លោក Rustem Umerov (កណ្តាល) ក្នុងពេលសន្និសីទសារព័ត៌មាននៅថ្ងៃទី៤មិថុនា។ X

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិអ៊ុយក្រែន បានបង្ហោះសារលើបណ្តាញសង្គម X ដោយបានអះអាងថា៖«បន្ទាប់ពីកិច្ចប្រជុំ UDCG ថ្ងៃនេះ យើងកំពុងចាប់ផ្តើមគំនិតផ្តួចផ្តើមដ៏សំខាន់ថ្មីមួយ៖ ការផលិតរួមគ្នានៃអាវុធអ៊ុយក្រែននៅក្នុងប្រទេសសមាជិក UDCG សម្រាប់តម្រូវការរបស់អ៊ុយក្រែន»។

ក្រសួងការពារជាតិអ៊ុយក្រែន បានបន្តថា៖«ដៃគូជិតស្និទ្ធបំផុតរបស់យើងមួយចំនួន ពោលគឺអ្នកដែលផ្តល់ជំនួយផ្នែកយោធារាប់ពាន់លាន កំពុងស្នើសុំឱ្យរៀបចំកន្លែងផលិតអាវុធទំនើបៗរបស់អ៊ុយក្រែននៅលើទឹកដីរបស់ពួកគេ។ ដៃគូទាំងនេះបានត្រៀមខ្លួនរួចរាល់ហើយក្នុងការផលិតអាវុធដែលរចនាដោយអ៊ុយក្រែនក្រោមអាជ្ញាប័ណ្ណផ្លូវការនៅក្នុងប្រទេសរបស់ពួកគេ»។

ជម្លោះប្រដាប់អាវុធរវាងអ៊ុយក្រែននិងរុស្ស៊ីបានអូសបន្លាយដល់ជាង៣ឆ្នាំ នៅលើកទឹកដីអ៊ុយក្រែន បន្ទាប់ពីការសម្រេចចិត្តរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន ឲ្យលើកកងទ័ពចូលលុកលុយអ៊ុយក្រែនកាលខែកុម្ភៈឆ្នាំ២០២២។ ចាប់តាំងពីពេលនោះមក អ៊ុយក្រែនវាយបករុស្ស៊ីវិញ ដោយមានការគាំទ្រអាវុធពីសំណាក់បស្ចឹមប្រទេស និងប្រទេសដៃគូរបស់មហាអំណាចលោកខាងលិច។

ក្នុងរដ្ឋបាលរបស់អតីតប្រធានាធិបតី លោក ចូ បៃដិន រដ្ឋាភិបាលសហរដ្ឋអាមេរិកបានជួយគាំទ្រអ៊ុយក្រែនយ៉ាងខ្លាំងដោយការដឹកជញ្ជូនអាវុធត្រង់ៗពីសហរដ្ឋអាមេរិក ប៉ុន្តែក្រោយលោកដូណាល់ ត្រាំ បានជាប់ឆ្នោត គោលនយោបាយគាំទ្រអ៊ុយក្រែនបានធ្លាក់ចុះ ហើយ លោក ដូណាល់ ត្រាំ បានព្យាយាមប្រឹងប្រែងតាមមធ្យោបាយការទូតដើម្បីបញ្ចប់សង្គ្រាមនេះ ប៉ុន្តែរងភាពបរាជ័យដោយសារតែភាគីរុស្ស៊ីមិនព្រមទទួលយកបទឈប់បាញ់ជាមុននិងចាប់ផ្តើមចរចា។

ដើម្បីប្រយុទ្ធជាមួយមហាអំណាចនុយក្លេអ៊ែររុស្ស៊ី ប្រទេសអ៊ុយក្រែនដែលស្ថិតទទួលបានការជ្រុមជ្រែងពីមហាអំណាចអឺរ៉ុបមានបារាំង អង់គ្លេស ជាពិសេសប្រទេសអាល្លឺម៉ង់ដែលមានសេដ្ឋកិច្ចរីកលួតលាស់បំផុតក្នុងតំបន់អឺរ៉ុប បានសម្លឹងទៅរកការផលិតអាវុធកាន់តែទំនើប។

ក្រសួងការពារជាតិអ៊ុយក្រែន បានបញ្ជាក់ថា៖«ជំហររបស់យើងនៅតែរឹងមាំ៖ អាទិភាពកំពូលរបស់យើងគឺបំពេញតម្រូវការរបស់កងកម្លាំងការពារជាតិអ៊ុយក្រែន»។

ក្រសួងការពារជាតិអ៊ុយក្រែន បន្ថែមថា៖«ដៃគូបានបញ្ជាក់ថា៖ អ្វីគ្រប់យ៉ាងដែលផលិតនៅកន្លែងទាំងនេះនឹងត្រូវផ្គត់ផ្គង់ដល់យោធាអ៊ុយក្រែនដរាបណាសង្រ្គាមនៅតែបន្ត។ ពួកគេត្រៀមខ្លួនជាស្រេចក្នុងការផ្តល់ហិរញ្ញប្បទានពេញលេញដល់ខ្សែផលិតកម្មទាំងនេះ ហើយថែមទាំងផ្តល់មូលនិធិបន្ថែមទៀតផង»។

ក្រសួងការពារជាតិអ៊ុយក្រែន ចាត់ទុកគំនិតផ្តួចផ្តើមនេះគឺជារបកគំហើញយុទ្ធសាស្ត្រ ហើយ ពួកគេនឹងផលិតយន្តហោះគ្មានមនុស្សបើក កាំជ្រួច គ្រាប់រំសេវ ប្រព័ន្ធសង្គ្រាមអេឡិចត្រូនិក និងប្រភេទអាវុធផ្សេងៗទៀត។ គំនិតផ្តួចផ្តើមនេះនឹងត្រូវបានគាំទ្រនៅក្នុងកម្មវិធី SAFE របស់អ៊ឺរ៉ុប ដែលគិតជាទឹកប្រាក់ចំនួន ១៥០ ពាន់លានអឺរ៉ូសម្រាប់ការអភិវឌ្ឍន៍ឧស្សាហកម្មការពារជាតិ៕

រ៉ាន់ រើយ