ព័ត៌មានអន្ដរជាតិ

អាមេរិក និងអ៊ីរ៉ង់ ត្រៀមបន្តកិច្ចចរចានុយក្លេអ៊ែរឡើងវិញនៅថ្ងៃទី១២មិថុនា

បានផុស

១ year មុន

នៅ

ថ្ងៃអង្គារ ១០ មិថុនា ២០២៥

ដោយ

Chheang

សហរដ្ឋអាមេរិក និងអ៊ីរ៉ង់ គ្រោងនឹងបន្តការចរចានុយក្លេអ៊ែរដោយប្រយោលនៅថ្ងៃទី១២ខែមិថុនា ដែលជាកិច្ចចរចាជុំទី៦ក្នុងឆ្នាំ២០២៥។ នេះបើយោងតាមការលើកឡើងរបស់លោក ដូណាល់ ត្រាំ ប្រធានាធិបតីអាមេរិក កាលពីយប់ថ្ងៃទី៩ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិភាក្សានឹងប្រព្រឹត្តទៅនៅទីក្រុង Muscat ដោយមានការសម្របសម្រួលដោយប្រទេសអូម៉ង់សម្រាប់កិច្ចសន្ទនារវាងភាគីទាំងពីរ។

យោងតាមការចុះផ្សាយរបស់ទីភ្នាក់ងារព័ត៌មាន Reuters កិច្ចពិភាក្សានេះមានគោលបំណងស្តារឡើងវិញនូវកិច្ចខិតខំប្រឹងប្រែងការទូត ដើម្បីរារាំងកម្មវិធីនុយក្លេអ៊ែររបស់អ៊ីរ៉ង់ជាថ្នូរនឹងការបន្ធូរបន្ថយទណ្ឌកម្ម។ អ៊ីរ៉ង់តាមសេចក្តីរាយការណ៍បានច្រានចោលសំណើចុងក្រោយរបស់អាមេរិក ប៉ុន្តែកំពុងរៀបចំការតបតវិញ។ ទីក្រុងតេហេរ៉ង់ទទូចលើសិទ្ធិរបស់ខ្លួនក្នុងការបង្កើនសារធាតុអ៊ុយរ៉ាញ៉ូម សម្រាប់គោលបំណងស៊ីវិល និងទាមទារឲ្យមានការដកទណ្ឌកម្មសេដ្ឋកិច្ចសំខាន់ៗ។ យ៉ាងណាមិញ រដ្ឋាភិបាលក្រុងវ៉ាស៊ីនតោនអះអាងថា អ៊ីរ៉ង់ត្រូវតែដាក់កម្រិតសកម្មភាពពង្រឹងសមត្ថភាពនុយក្លេអ៊ែររបស់ខ្លួន និងសហការយ៉ាងពេញលេញជាមួយនឹងអធិការកិច្ចអន្តរជាតិ។

អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បាននិយាយថា «សំណើរបស់អាមេរិកមិនអាចទទួលយកបានទេសម្រាប់ពួកយើង។ វាមិនមែនជាលទ្ធផលនៃការចរចាមុនៗនោះឡើយ។ យើងនឹងបង្ហាញសំណើផ្ទាល់ខ្លួនរបស់យើងទៅកាន់ភាគីម្ខាងទៀតតាមរយៈអូម៉ង់ បន្ទាប់ពីវាត្រូវបានធ្វើរួចរាល់។ សំណើនេះគឺសមហេតុផល ត្រឹមត្រូវ និងមានតុល្យភាព»។

លោក Baghaei បានបន្ថែមថា «មុនការដកទណ្ឌកម្ម យើងត្រូវតែធានាឲ្យបានថា អ៊ីរ៉ង់នឹងទទួលអត្ថប្រយោជន៍ផ្នែកសេដ្ឋកិច្ចប្រកបដោយប្រសិទ្ធភាព ហើយថា ទំនាក់ទំនងធនាគារ និងពាណិជ្ជកម្មរបស់ខ្លួនជាមួយប្រទេសផ្សេងទៀតនឹងវិលមករកភាពប្រក្រតីវិញ»។

សូមរឭកថា កាលពីថ្ងៃពុធសប្ដាហ៍មុន មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានច្រានចោលយ៉ាងដាច់អហង្ការចំពោះសំណើររបស់សហរដ្ឋអាមេរិកដែលមានគោលបំណងទប់ស្កាត់សកម្មភាពចម្រាញ់សារធាតុអ៊ុយរ៉ាញ៉ូមទាំងស្រុងរបស់ទីក្រុងតេហេរ៉ង់។ លោក Khamenei អះអាងថា ការទាមទារបែបនេះធ្វើឲ្យប៉ះពាល់ដល់អធិបតេយ្យភាព និងប្រឆាំងផលប្រយោជន៍ជាតិរបស់អ៊ីរ៉ង់។

ការចម្រាញ់សារធាតុអ៊ុយរ៉ាញ៉ូមនៅតែជាចំណុចសំខាន់នៃការឈ្លោះប្រកែកគ្នានៅក្នុងកិច្ចចរចាចំនួន៥លើកគិតចាប់តាំងពីខែមេសា ដើម្បីចុះហត្ថលេខាលើកិច្ចព្រមព្រៀងថ្មីមួយ ជំនួសឲ្យកិច្ចព្រមព្រៀងចាស់ដែលលោក ត្រាំ ធ្លាប់បានបោះបង់ចោលជាឯកតាភាគីក្នុងអំឡុងពេលអាណត្តិដំបូងរបស់គាត់កាលពីឆ្នាំ២០១៨។

ទីភ្នាក់ងារថាមពលអាតូមិកអន្តរជាតិ (IAEA) នាពេលថ្មីៗនេះ បានរាយការណ៍ថា អ៊ីរ៉ង់បានបង្កើនការចម្រាញ់សារធាតុអ៊ុយរ៉ាញ៉ូមដល់កម្រិតភាពសុទ្ធ ៦០% ដែលកៀកជិតដល់កម្រិត ៩០% ក្នុងការផលិតអាវុធនុយក្លេអ៊ែរ។ របាយការណ៍នេះបានបង្កើនការព្រួយបារម្ភក្នុងចំណោមមន្ត្រីអាមេរិក និងអ៊ីស្រាអែល ដោយលោក ត្រាំ បានព្រមានអំពីសកម្មភាពយោធាដែលអាចកើតមាន ប្រសិនបើកិច្ចខិតខំប្រឹងប្រែងការទូតត្រូវបរាជ័យ៕